Ibraawe Asaassi
1 Xoossay I erissidobaa yootiyageetu baggaara beni nu mayzza aawatuyyo darotoo daro ogetun yootiis. 2 I ubbabaa laattanaadan sunttido, qassi ubbabaa maaraa* A baggaara giigissido Naꞌaa baggaara haꞌꞌi ha wodiyan* nuuyyo yootiis. 3 Naꞌay bonchchuwan Xoossaa milateesinne muleera A duutti ekkiis; qassi ba wolqqaama qaalan ubbabaa shiishshi oyqqiis. Qassi I nuna nagaraappe geeshshi simmidi, gita Xoossaappe ushachcha baggan xoqqasan uttiis. 4 Hegaappe denddidaagan, I kiitanchchatuugaappe xoqqa sunttaa laattido gishshawu etappe aadhdhiis.
5 Leemisuwawu, Xoossay, “Neeni ta naꞌaa; hachchi taani neeyyo aawa gidaas,” woy, “Taani ayyo aawa gidana, qassi I taayyo naꞌa gidana” yaagidoy kiitanchchatu giddon oonee? 6 Shin I ba Bayra Naꞌaa haranttuwa saꞌaa kiittiyo wode, “Xoossaa kiitanchchati ubbay ayyo ziggona” yaagees.
7 Hegaa bollikka, I kiitanchchatubaa, “Ba kiitanchchata ayyaana, qassi baassi haggaaziyageeta* tamaa laco kessees” yaagees. 8 Shin Naꞌaabaa I hagaadan gees: “Xoossay meri merinawu ne araata, qassi ne Kawotettaa xamꞌꞌay suuretettaa xamꞌꞌa. 9 Neeni xillotettaa siiqadasa, qassi iitatettaa ixxadasa. Ne Xoossay ne bolli zaytiya tigidoynne hara kawotuugaappe aaruwan neeni ufayttanaadan oottidoy hegaassa.” 10 Qassi, “Godawu, doomettan neeni saꞌaa essadasa, salotikka ne kushiya oosota. 11 Eti xayana, shin neeni awudekka deꞌana; qassi eti ubbay maayuwadan ceeggana. 12 Neeni eta afalaadan xaaxananne maayuwadan laammana. Shin neeni laamettakka, qassi neeni deꞌiyo layttay mule wurenna.”
13 Shin I, “Taani ne morkketa neeni yedhdhanaadan oottana gakkanaashin taappe ushachcha baggaara utta” yaagidoy kiitanchchatu giddon oonee? 14 Eti ubbay geeshsha haggaazaa haggaaziyanne* Xoossay ashshana asata eti maaddanaadan I kiittido ayyaanata gidokkonaa?