BENI TAARIKIYAA
Ignatz Zemalvisa
IGNATZ ZEMALVISI daroti eriyo asa gidenna; shin a oosoy ha wodiyan deꞌiya daro so asaa maaddees. I Hangaare biittan Buda, haꞌꞌi Budapest geetettiya kataman yelettiis; i Viyena Yuniversttiyaappe 1844n akkamuwaa digiriyan anjjettiis. Zemalvisi Viyenan maccaasay yeliyo hosppitaaliyan 1846n issi profeseriyaa maaddiyaagaa gididi oottiyo wode, keehi azzanttiyaabaa akeekiis; hegeekka, yan yeliya xeetu maccaasatuppe 13ppe dariyaageeti naata yeliyo wode chayldbed fiver giyo gacinotu sahuwan hayqqiyoogaa.
He harggiyawu gaasodan qoppiyo dumma dummabay deꞌikkokka, tumu gaasuwaa ooninne erana danddayibeenna. Hayqqiyaageetu qoodaa guuttanawu baaxetidobay ubbay hada attiis. Daro aayeti keehi waayettidi hayqqiyoogaa beꞌiyo gishshawu, Zemalvisi he harggiyaa gaasuwaa eranawunne teqqanawu qofaa qachiis.
Zemalvisi oottiyo hosppitaaliyan maccaasay yeliyo naaꞌꞌu kiliniketi deꞌoosona; koyro kilinikiyan hayqqiya aayetu qooday naaꞌꞌantto kilinikiyan hayqqiya aayetu qoodaappe keehi darees. He naaꞌꞌu kilinikiyan deꞌiya dummatettay koyroogan, dottore gidanaageeti tamaaroosona; qassi naaꞌꞌanttoogan, maaretissiyoogaa loohiyaageeti tamaaroosona. Yaatin, issuwan hayqqiya aayetu qooday haraagaappe keehi dummatidoy aybissee? Zemalvisi he harggiyawu gaaso gidana giidi qoppiyo ubbabaa teqqanawu maliis; shin he ubbabaykka maaddibeenna.
Zemalvisi 1847 doomettaa heeran he harggiyaa gaasuwaa eranawu maaddiyaabaa akeekiis. Aara issippe oottiya a laggee, Yakob Kolechiki anhaa maramariiddi masunxxido gaasuwan suuttay hambbalaashettin hayqqiis. Haakimeti Kolechika anhaa maramaridi xaafidobaa Zemalvisi beꞌidi, a harggiyaa malaataynne chayldbed fiver giyo gacinotu harggiyan sahettiyaageetu malaatay amarida hanotan issi mala gidiyoogaa akeekiis. Hegaa gishshawu, Zemalvisi anhaara gayttidaagan hambbalaashiyaabay shahaara maccaasay chayldbed fiver giyo gacinotu harggiyan oyqqettanaadan oottana danddayiyoogaa qoppiis. Dottoretinne dottore gidanawu tamaariyaageeti, yeliya maccaasay deꞌiyo kifiliyaa gelanaappe kase darotoo anhaa maramariyo gishshawu, eti shahaara maccaasaa maramariyo wode woy maaretissiyo wode akeekennan eta he harggiyan oyttoosona! Naaꞌꞌantto kifiliyan hayqqiyaageetu qooday guutta gididoy, maaretissiyoogaa tamaariyaageeti anhaa maramarenna gishshataassa.
SHahaara maccaasaa maramaranaappe kase kushiyaa hegawu giigida kemikaliyan meecettana bessiyoogaa Zemalvisi sohuwaara yootiis. Hegee hayqqiyaageetu qooday keehi guuxxanaadan oottiis: Hosppuniyan xeetaappe 18.27 asay hayqqikkokka, he layttaa wurssettan xeetaappe 0.19 asa xallay hayqqiis.
“Ta qofay maccaasay yeliyo hosppitaaliyan gakkiya azzanttiyaabaa teqqiyoogaa, azinawu a machiyo, qassi naꞌawu a aayyiyo hayquwaappe ashshiyoogaa.”—Ignatz Zemalvisa
Zemalvisi oottidoban ufayttiday ubba asa gidenna. I gacinotu hayquwawu gaaso gididabaara gayttidaagan oottidobay a halaqay qoppiyoogaappe dumma gidiyo gishshawu, Zemalvisi hegaa xeelliyaagan yootiyooban a halaqay yiillotiis. Guyyeppe Zemalvisi Viyenan oottiyoogaa aggidi, Hangaare simmiis. I yan Pest giyoosan deꞌiya hosppitaaliyan maccaasaa maaretissiyo kifiliyaa halaafe gididi oottiis; i oottidobay gacinotu sahuwan hayqqiyaageetu qooday xeetaappe 1kka gakkennaadan oottiis.
Zemalvisi ba deꞌuwan oottidobaa xeelliyaagan, Ze Kowuz, Konsept, end Profileksis of CHayldbed Fiver giyo maxaafaa 1861n attamissiis. SHin i pilggidi akeekidobaa goꞌꞌay amarida layttay aadhanaashin erettibeenna. He wodetun, attana danddayiya daroti hayqqidosona.
Zemalvisi halaafe gididi oottiyo aakime keettan akkamiyaageeti geeshshatettaa naaganaadan azaziis.—Robert Toomi medhido misiliyaa
Zemalvisi harggiyan oyttiya jarmetuppe naagettana danddayiyo ogiyaa akeekida koyro asatuppe issuwaa gidiyoogee guyyeppe erettiis. A oosoy ayfiyan beettennabati harggiyawu gaaso gidiyoogaa eranawu maaddiis. Harggee Jarme gaasuwan oyqqiyoogaa kasetidi akeekida asatuppe issoy a; qassi i oottidobay akkamuwaa saynisiyaaranne oosuwaara gayttidaagan keehi maaddiyaaba gidiis. SHin 3,000 layttappe kase, Muuse Higgiyan anhaara gayttidaagan oottana bessiya kaaletoy odettiis; guyyeppe hegee Geeshsha Maxaafan xaafettiis.