Ha Saꞌay Bashshaappe Attanaagaa Xoossay Qaalaa Geliis

Hagee kumetta saꞌan pilggiyageetu citay carkkuwa hanotay laamettiyogaa xeelliyagan wurssettan kuuyido qofa. Neeni asawu qoppiya Medhdhidaagan ammaniyaba gidikko, eranchchati kuuyido ha qofay saꞌay bana barkka qohuwappe giigissanaadan oottidi Xoossay medhdhidoogaa neeni hassayanaadan oottana danddayees.

Gidikkonne asay saꞌaa keehi moorido gishshawu, saꞌay barkka bana muleera giigissana danddayenna. Xoossay hegaa giigissanawu issibaa oottanaagaa nuuni ammanettana danddayiyoy aybissee?

Ha saꞌay bashshaappe attanaagaanne ubba haa loꞌꞌanaagaa nuuni ammanettanaadan oottiya, saaxiniyan deꞌiya xiqiseta akeeka.

• Ha saꞌaa medhdhiday Xoossaa. “Xoossai salotanne sa7aa koiro medhdhiis.”—Doomettaabaa 1:1

• Ha saꞌan deꞌiya ubbabay Xoossaaba. “Sa7ainne sa7an kumidabai ubbai [Yihoowaba, NW].”a—Mazamure 24:1

• Xoossay ha saꞌay bashshaappe attanaadan giigissidi medhdhiis. “Neeni sa7aa a baasuwaa bolli essadasa; i meri merinaukka qaaxxenna.”—Mazamure 104:5

• Deꞌon deꞌiyabati saꞌan kaseppe haa loꞌꞌidi merinawu deꞌanaagaa Xoossay qaalaa geliis. “GODAI, [biittaa] giigissidi oottidaagee, . . . asi de7anaadaanappe attin, biittaa coo medhdhibeenna.”—Isiyaasa 45:18

• Asay ha saꞌan merinawu deꞌanaagaa Xoossay qaalaa geliis. “Xilloti biittaa laattananne yan merinau de7ana.”—Mazamure 37:29

Xoossay asay saꞌaa moorennan an ufayttidi deꞌanaadan giigissiis. Asay yaaretidi oottido ha saꞌaa mooriyabata, Xoossaa Yihooway ba keerido wodiyan xayssanaagaa Geeshsha Maxaafay yootees.—Ajjuutaa 11:18

Hegaappe simmin Xoossay ha saꞌaa giiganne keehi loꞌꞌiya gannate oottanaagaa, qassi ba kushiya miccidi ‘paxa deꞌiyageetu ubbaa amuwa alanaagaa’ Geeshsha Maxaafay yootees.—Mazamure 145:16