Xala Bitaniyaa

SAꞌAN asaa qooday dariiddi biido wode, etappe daroti Qaayeelaagaadan iitabaa oottidosona. SHin issi bitanee etappe dumma. He bitanee hagaa; a sunttaykka Heenooka. Heenooki xala asa. I deꞌiyo wode deꞌiya asa ubbay keehi iitabaa oottees; shin Heenooki Xoossaayyo oottiyoogaa aggibeenna.

He wode deꞌida asay keehi iitabaa oottidoy aybissakko eray? Addaameenne Hewaana Xoossaassi azazettennaadaaninne i mooppite giido mittaa teeraappe maanaadan oottiday oonee? Ane qoppa. Ee, hegee issi iita kiitanchchaa. Geeshsha Maxaafay, a Seexaanaa yaagi xeegees. I oonikka gidin iita gidanaadan baaxetees.

Issi gallassi Xoossaa Yihooway, asay siyanau koyennabaa Heenooki etau yootanaadan oottiis. Hegeekka: ‘Xoossay issi gallassi iita asaa ubbaa xayssanau deꞌees’ yaagiyaagaa. Asay hegaa siyo wode keehippe yiillotennan aggenna. Ubba Heenooka woranau malennan aggokkona. Yaatiyo gishshau, Heenooki Xoossay oottanau deꞌiyoobaa asaassi yootanau keehippe xalanaagaa koshshiis.

Xoossay he iita asatu giddon Heenooki adussa wodiyaa deꞌanaadan oottibeenna. Heenooki 365 laytta xalla deꞌiis. Ayssi “365 laytta xalla” yaagiyoo? He wode deꞌiya asay, ha wodiyan deꞌiya asaappe keehi minonne adussa wodiyaa deꞌiyo gishshataassa. Ubba Heenooka naꞌay Maatusaali 969 layttaa deꞌiis!

Heenooka hayquwaappe simmin, asay kaseegaappe yaa iiti iiti biis. Geeshsha Maxaafay ‘eti wozanan qoppiyoobay ubbay ubba wodekka iita xalaala;’ qassi ‘saꞌa ubbay makkalan kumiis’ yaagees.

He wode saꞌan metoy keehi darido gaasotuppe issuwaa eray? Asay iitabaa oottanaadan Seexaanay hara ooratta ogiyan goꞌetto gishshataassa. Kaallidi hegaa tamaarana.