Iyyoobi Xoossaassi Ammanettida Asa

HA SAHETTIYA bitanee nena qarettennee? A sunttay Iyyooba; qassi ha maccaasiyaa a machchiyo. Iyyoobayyo a woygaydda deꞌiyaakko eray? ‘Xoossaa qanggada hayqqaaga’ yaagausu. O hegaa malabaa giissiday aybakkonne qassi, Iyyoobi hegaa keenaa aybissi tuggattidaakko ane beꞌoos.

Iyyoobi Yihoowayyo azzazeti deꞌida ammanettida asa. I deꞌidoy, Kanaaneppe daronne haakkenna Uuxa giyo biittaana. Yihooway Iyyooba keehippe siiqees shin, a ixxiya issi uri deꞌees. I oonakko eray?

I Seexaanaa Dablloosa. Seexaanay, Yihoowa ixxiya iita kiitanchcha gidiyoogaa hassaya. I Addaamanne Hewaano Yihoowassi azazettennaadan oottana danddayiis; qassi oonakka gidin Yihoowassi azazettennaadan oottana danddayiyaadan qoppiis. SHin hegaa oottana danddaydee? CHii, danddaybeenna. Nuuni etabaa tamaarido ammanettiya daro attumaasatanne maccaasata ane qoppa. Etappe aappunatu sunttaa hassayay?

Yaaqoobinne Yooseefi Gibxxen hayqqogaappe guyyiyan, kumetta saꞌan ooppenne aadhdhidi Yihoowassi ammanettidi deꞌida asi Iyyooba. Seexaanay asa ubbaa iita gidanaadan oottanau danddayennaagaa i eranaadan, Yihooway a hagaadan giis: ‘Iyyooba beꞌa. I taassi ay keena ammanettida asakko xeella’ yaagiis.

Seexaanay: ‘I neessi ammanettida asa gidana danddayidoy, neeni a anjjido gishshataassanne assi daro loꞌꞌobay deꞌiyo gishshataassa. SHin hegaa ubbaa neeni xayssikko, i nena qanggana’ yaagidi palamettiis.

Hegaa gishshau Yihooway: ‘Ba; baada assi deꞌiyaabaa xayssa. Iyyooba bolli gakkanaadan neeni koyido iitaba ubbaa ootta. I tana qanggiyaakko aggiyaakko ane beꞌana. SHin a worenna mala’ yaagiis.

Seexaanay koyro, Iyyooba dorssati hayqqanaadaaninne asay a mehetanne gaameelata wuuqqanaadan oottiis. Hegaappe guyyiyan, a attumanne macca naata 10 gotiyan woriis. Kaallidi, Seexaanay Iyyooba ha iita harggiyan sahettanaadan oottiis. Iyyoobi keehippe tuggatiis. Iyyooba machchiyaa: ‘Xoossaa qanggada hayqqaaga’ yaagidoy hegaassa. SHin Iyyoobi hegaadan oottibeenna. Qassi, heezzu worddo laggeti yiidi, neeni kase iitabaa oottadasa yaagidosona. SHin Iyyoobi ammanettiya asa gidiyoogaa aggibeenna.

Hegee, Yihoowa keehippe ufayssiisinne misiliyan neeni beꞌana danddayiyoogaadan, guyyeppe i Iyyooba anjjiis. Yihooway harggiyaappe a pattiis. Iyyoobi hara 10⁠u mera loꞌꞌo naata yeliis; qassi kaseegaappe naaꞌꞌu kushe dariya mehiyaa, dorssaanne gaameelaa haariis.

Iyyoobadan Yihoowassi ubbatoo ammanettiyaagaa giduutee? Ammenettiyaagaa gidikko, Xoossay nenakka anjjana. Kumetta saꞌay Edene ataakiltte sohuwaadan loꞌꞌiyaasa gidiyo wode neeni merinau deꞌana danddayaasa.