Worqqaappe Merettida Maraa

HAHA! Asay ay oottiiddi deꞌii? Issi maraakko woosaa shiishshiiddi deꞌoosona. Hegaa eti ayssi oottiyoonaa?

Muusee deriyaa kiyidi daro gallassaa gamꞌꞌin, asay: ‘Muusee waanidaakko nuuni erokko. Yaatiyo gishshau, ha biittaappe nuna kaalettidi kessiya xoossa ane medhdhoos’ yaagidosona.

Muuse ishaa Aarooni: ‘Eeno; intte hayttan deꞌiya worqqaa kessidi, taayyo ekki yiite’ yaagiis. Asay ehin, Aarooni hegaa seerissidi worqqa maraa medhdhiis. Asaykka: ‘Gibxxeppe nuna kessida nu Xoossay hagaa!’ yaagiis. Hegaappe Israaꞌeeleti gita gibiraa giigissidi, worqqaappe merettida maraassi goynnidosona.

Yihooway hegaa beꞌidi daro yiillotiis. Yaatiyo gishshau, Muusessi: ‘Eesuwan duge wodhdha. Asay daro iittabaa oottees. Eti ta higgiyaa dogidi worqqaappe merettida maraayyo goynniiddi deꞌoosona’ yaagiis.

Muusee ellellidi deriyaappe duge wodhdhiis. I etakko matattido wode kaallidi deꞌiyaabaa beꞌiis. Asay worqqa maraa yuushuwan yexxoosonanne duroosona! Muusee keehippe yiillotido gishshau, higgeti etan xaafetti uttido naaꞌꞌu masettida shuchchata olin, he shuchchati kinchchetti aggidosona. Hegaappe Muusee, Worqqa maraa ekkidi seerissiis. Hegaappe guyyiyan gaaccidi liiqissiis.

Asay keehippe iitabaa oottiis. Yaatiyo gishshau, Muusee asaappe amaridaageeti bantta bisuwaa oyqqanaadan yootiis. Muusee: ‘Worqqaappe merettida maraassi goynnida iita asay hayqqana bessees’ yaagiis. Yaatin he asati 3,000⁠u asaa woridosona! Nuuni Yihoowappe attin hara ayba eeqaayyonne goynnennaadan naagettana koshshiyoogaa, hagee bessenee?