Issi Gita Mittan Leemisettida Kawotettaa

Issi galla qammi, Naabukadanaxoori yashshiya aymo aymottiis. I he aymuwaa birshshettaa baassi yootana mala ba aadhida eranchata xeesiis. SHin etappe ooninne a aymuwaa birshshana danddayibeenna. Wurssettan, kawoy Daaneelayyo yootiis.

Naabukadanaxoori Daaneelawu hagaadan giis: ‘Ta aymuwan, taani issi mittaa beꞌaas. He mittay xeeray saluwaa gakkiyoogaa keenaa dicciis. Hegee saꞌaa gaxaappe gaxaa gakkanaashin beettees. He mittawu loꞌꞌiya hayttaynne keehi daro ayfee deꞌees. Doꞌati a kuwan shemppidosona; kafotikka a daashshaa giddon keexxidi deꞌidosona. He wode kiitanchay saluwaappe wodhiis. I hagaadan giis: “Ha mittaa qanxxite; a tashiyaa karite. SHin durumaanne a xaphuwaa birataappenne nahaasiyaappe qoxxido sanssalatan qachite. He mittaa wozanay kahay asaagaappe doꞌaagawu laamettana. Hegaadan hanidaashin, a bolli laappun layttay wurana. Ubbaappe Xoqqiya Xoossay asaa naatu kawotetta ubbaa haariyoogaanne kawotettaa i ba koyiyo uraassi immana danddayiyoogaa asay ubbay erana.”’

He aymuwaa birshshettay aybakko Yihoowi Daaneelawu qonccissiis. Daaneeli aymuwaa birshshettaa akeekido wode, dagammiis. I hagaadan giis: ‘Kawuwawu, ha aymoy ne morkketussi gideerenneeshsha; shin ha aymoy nebaa yootees. Qanxxettiya he gita mittay nena! Kawotettay neeppe ekettana; ekettin neeni bazzo doꞌaadan maataa maana. SHin kiitanchay durumaa a xaphuwaara aggiiganaadan yootido gishshawu, ne haranttuwaa kawo gidana.’

Issi layttappe guyyiyan, Naabukadanaxoori ba kawo keettaa bolli dembbayidi keexxidosan hemettiiddi, Baabiloone katamaa nashshees. I, ‘Taani keexxido wolqqaama katamaa beꞌite. Taani ay keena gitakko xeellite!’ yaagiis. I haasayiiddi deꞌishin, saluwaappe, ‘Naabukadanaxooraa! Haꞌꞌi ne kawotettay neeppe ekettiis’ yaagiya qaalay yiis.

He wode sohuwaara, Naabukadanaxoora wozanay kahay laamettin, i bazzo doꞌa mala gidiis. I ba kawo keettaappe kiyanaadan gooddin, bazzon doꞌaara deꞌees. Naabukadanaxoora binnaanay argganttaa baalliyaadan aduqqiis; qassi a xugunttaykka kafuwaa xugunttaadan dicciis.

Laappun layttay aadhi simmin, Naabukadanaxoori paxiis; paxin i Baabiloona kawo gidanaadan Yihoowi oottiis. Hegaappe guyyiyan Naabukadanaxoori hagaadan giis: ‘Taani saluwaa Kawuwaa Yihoowa galatays. Yihoowi haariyaagaa gidiyoogaa taani haꞌꞌi eraas. I otorettiyaageeti bantta huuphiyaa kawushshanaadan oottees; qassi i ba koyiyo urawu ooyyoonne kawotettaa immana danddayees.’