Nagaray Aybakko Dogidoo?
AMARIDA wodeppe kase, qaaqqatiyoogaa, yorattiyoogaa, uuzettiyoogaa, azalliyoogaa, yiillotiyoogaa, qanaatiyoogaanne otorettiyoogaa malabay iita nagara gidiyoogaa sabaaketi woosa keettan bantta cenggurssaa xoqqu oottidi tamaarissoosona. Sabaakee darotoo, nagaray kaalettiyo iitabaa yooteesinne ezggiyaageeti nagaraappe simmanaadan minttettees. Issi xaafee: “Haꞌꞌi sabaaketi ezggiyaageeta ufayssennabaa tamaarissiyoogaappe, eta ufayssiyaabaa tamaarissanau dooroosona” yaagiis.
Gaazeexan xaafiyaageeti hegaara issi malabaa akeekidosona. Hagaappe kaallidi deꞌiyaageeti gaazeexan kiyidabatuppe amaridaageeta:
▪ “Beni nagara, nagaraappe simmiyoogaanne wozo giyoobaa tamaarissiyoogee attin, issi uri bana xoqqu xoqqu oottiyoonne bana siiqiyo ogiyaa tamaarissiyoogee meeze gidiis.”—Isttar Beken, Ashtabula, Ohayo.
▪ “Nagaraa xeelliyaagan hirggiyoogee muleera attiis.”—Niwuswik.
▪ “Nuuni kase ‘Xoossay taappe koyiyoy aybee’ giyoogaa aggidi, haꞌꞌi ‘Xoossay tau ay oottanee?’ yaagoos.”—Chikaago San Tayms.
Ubbaban dumma dumma gidida asay, issoy issuwaa danddayidi deꞌiyo ha wodiyan, issoy issuwaa kandduwaa iita woy loꞌꞌo gaanau mammottees. Kandduwaaban hara asaa bolli pirddiyoogee bessiyaaba gidenna giidi asay qoppees. Hara asi oottiyooban pirddiyoogee wolqqaama nagaradan qofettees. Yaatiyo gishshau, asay hagaadan qoppees: ‘Ne qofay neeyyo loꞌꞌo gidana danddayees; shin hara asay ne qofaa kaallanaadan sugana koshshenna. Ha wodiyan asay ba deꞌuwau kaaletodan goꞌettiyo, xoqqu oottidi xeelliyoobay issoy issuwaagaappe dumma. Tuma gididabay issi uri kaalliyooba xalla gidenna. Issi uri xoqqu oottidi xeelliyoobay neeni xoqqu oottada xeelliyoobaara lagge.’
Hagaa mala qofay asay nagaraa xeelliyo hanotaa laammiis. “Nagara” giya qaalaa deexetti xeelliyoogee attiis. Hegee daroti qilliiccanau goꞌettiyo qaala gidiis. Higgiyan ekkennan issippe deꞌiyoogaa, wodiraa laammiyoogaanne attumay attumaara, qassi maccay maccaara asho gaytotettaa poliyoogaa deexo nagara oottidi xeelliyoogee attiis.
Asay kase “nagara” woy “nagara gidenna” giyoobaa xeelliyo hanotay laamettidoogee sirissenna. SHin asaa xeelay laamettidoy aybissee? Nagaraa xeelliyaagan laamettidabi deꞌii? Intte xeelay ayba gidikkonne dummatetta medhennee?