Woosaa

3 Ayba Ogiyan?

DARO haymaanoote wogan, woossiyo ogiyaa, woosan goꞌettiyo qaalatanne woossiyo wogaa mala woosaara gayttidabata asay xoqqu oottidi xeellees. Gidikkokka, Geeshsha Maxaafay nuuni hegaa mala hanotaa gidennan, “Waatidi woossana bessii?” yaagiya, keehippe koshshiya oyshaa xoqqu oottidi xeellanaadan maaddees.

Ammanettida Xoossaa ashkkarati daro sohuwan, qassi daro ogiyan woossidoogaa Geeshsha Maxaafay yootees. Eti hanotau koshshiyaagaadan cenggurssaa sissennan woykko sissidi woossidosona. Eti pude saluwaa xeelliiddi woykko hokkidi woossidosona. Eti misiliyaa, shuuyettida gozddaa woykko woosaa maxaafaa, woossiyo wode maaddiyaabadan goꞌettiyoogaappe, bantta qoppidobaa wozanappe woossidosona. Eta woosaa Xoossay siyanaadan oottiday aybee?

Hagaappe kasetiya huuphe yohuwan beꞌidoogaadan, eti issi Xoossaa, Yihoowa xallaakko woossidosona. Keehippe koshshiya harabay deꞌees. “Xoossai koyiyoogaadan, ainne nuuni a woossikko, i siyiyoogaa nuuni eriyo gishshau, a sinttan yayyokko” yaagiya qofay, 1 Yohaannisa 5:14n deꞌees. Nu woosay Xoossaa sheniyaara moggana koshshees. Hegee woygiyoogee?

Xoossaa sheniyaara moggiya ogiyan woossanau, a shenee aybakko nuuni erana koshshees. Yaatiyo gishshau, Geeshsha Maxaafaa xannaꞌiyoogee woosau keehippe koshshiyaaba. Hegaa giyoogee nuuni Geeshsha Maxaafaa erancha gidana xayikko Xoossay nu woosaa siyenna giyoogee? Gidenna; shin Xoossay nuuni a sheniyaa eranaadan, hegaa akeekanaadaaninne oosuwan peeshshanaadan koyees. (Maa. 7:21-23) Nuuni tamaariyoobaara moggiya ogiyan woossana koshshees.

Nuuni Yihoowabaanne a sheniyaabaa eriyo wode, nu ammanoy minnees; hegee woosan keehippe koshshiya harabaa. Yesuusi, “Intte ammanidi Xoossaa woossiyoobaa aiba gidikkokka ekkana” yaagiis. (Maa. 21:22) SHin ammanoy naqaashi baynnaba gidenna. Hegaappe, mino naqaashay deꞌiyoobay beettennaba gidikkonne, an ammaniyoogaa giyoogaa. (Ibr. 11:1) Nuuni beꞌana danddayenna Yihooway deꞌiyoogau, i ammanttiyaagaa gidiyoogaunne banan ammaniyaageetu woosaa siyanau koyiyoogau Geeshsha Maxaafan daro naqaashay deꞌees. Hegaa bollikka, nuuyyo ammanuwaa gujjanaadan ubbatoo woossana danddayoos; qassi nuussi koshshiyaabaa immiyoogee Yihoowa ufayssees.—Luq. 17:5; Yaaq. 1:17.

Woossana bessiya ogiyaa xeelliyaagan keehippe koshshiya harabaykka deꞌees. Yesuusi, “Ta baggaarappe attin, ooninne ta Aawaakko baanau danddayenna” yaagiis. (Yoh. 14:6) Yaatiyo gishshau, nuuni Aawaa, Yihoowakko shiiqana danddayiyo ogee Yesuusa. Hegaa gishshau, Yesuusi bana kaalliyaageeti ba sunttan woossanaadan yootiis. (Yoh. 14:13; 15:16) Hegaa giyoogee, nuuni Yesuusakko woossana koshshees giyoogaa gidenna. Hegaappe, polonne geeshsha gidida nu Aawaakko shiiqana danddayidoy Yesuusa baggaara gidiyoogaa akeekidi, Yesuusa sunttan woossoos.

Yesuusau keehippe matattiya a kaalliyaageeti issi wode, “Godau, . . . nuuni woigi woossanaakko, nuna tamaarissa” yaagidi oychidosona. (Luq. 11:1) Woosaa xeelliyaagan nuuni beꞌidobatu malabaa eti oychibeennaagee qoncce. Eti ‘Aybaa xeelliyaagan woossana koshshii?’ giidi oychiyoogaa mala hanotan, woossana allaalliyaa tumuppe eranau koyidosona.

[Sinttaa 6n deꞌiya misiliyaa qonccissuwaa]

Xoossay siyiyo woosay a sheniyaara moggiya, ammanuwaaninne Yesuusa sunttan woossiyo woosa