QOFA 1

Miishshaanne Aquwaa Gidennan, Asaa Siiqa

GEESHSHA MAXAAFAY TAMAARISSIYOY AYBEE? “Miishsha siiqiyoogee iitatetta ubbau pultto.”—1 Xim. 6:10.

XUBE GIDIYAABI AYBEE? SHammiyoobaa erissiyaageeti nuuni nuuyyo deꞌiyaaban ufayttennaadan denttettoosona. Nuuni ooratta, kaseegaappe loꞌꞌonne gita gididabaa shammanau miishshaa demmanau shemppoy baynnan oottanaadan koyoosona. Miishshay cimmiyo gishshau, nuuni sohuwaara a siiqana danddayoos. Gidoppe attin, duretettaa siiqiya uri bau deꞌiyaabay gidana geennaagaa Geeshsha Maxaafay yootees. Kawuwaa Solomoni, “Bira dosiya uraassi biri gidi erenna; [duretettaa] siiqiya uraikka miishshaa kalli erenna” yaagidi xaafiis.—Era. 5:10.

AY OOTTANA DANDDAYAY? Yesuusa leemisuwaa kaalla; qassi aquwaappe aattada asaa siiqiyoogaa tamaara. Yesuusi asaa siiqiyo gishshau, bau deꞌiya ubbabaa aggi bayanau, ubba ba shemppuwaakka aatti immanau eeno giis. (Yoh. 15:13) I, “Ekkiyaagaappe immiyaagee anjjettidaagaa” yaagiis. (Oos. 20:35) Nu wodiyaanne nuuyyo deꞌiyaabaa haratussi immiyoogaa meeze oottikko, etikka nuussi hegaadan oottana. Nuuni immiyoogaa meeze oottikko asay ‘nuuyyo immanaagaa’ Yesuusi yootiis. (Luq. 6:38) Miishshaanne aquwaa yedettiyaageeti metuwaaninne waayiyan banttana qohoosona. (1 Xim. 6:9, 10) Hara baggaara, tumu ufayssay beettiyoy harata siiqiyoogaananne harati nuna siiqiyoogaana.

Sima deꞌuwaa deꞌanau danddayiyaakkonne aybissi ne hanotaa qorikkii? Neeyyo deꞌiyaabaa woykko deꞌanaadan koyiyoobaa qoodaa guuttanau danddayay? Hegaadan oottiyaaba gidikko, deꞌuwan keehippe koshshiyaabau, giishin asaa maaddanaunne neeyyo deꞌiya ubbabaa immida Xoossau oottanau amarida wodiyaanne wolqqaa demmana danddayaasa.—Maa. 6:24; Oos. 17:28.

[Sinttaa 4n deꞌiya misiliyaa]

‘Immite; asay intteyyo immana’