Edene—I Asaa Naati Koyro Deꞌido Sohoo?
INTTE ataakiltte sohuwan deꞌiyaabadan qoppite. He sohuwan qofaa laaliyaabinne wocamay kumido katamaa deꞌuwan asay yaanne haanne simerettiyoogan siyettiya cenggurssi baawa. Ha ataakiltte sohoy aaho, qassi yan sarotettay xayanaadan oottiyaabi baawa. Hegaappekka aadhiyaabay, intte azzanekketa; harggiyan woy sahuwan waayettekketa. Intte bessi-bollati intte heeran deꞌiyaabaa akeekanau wayssokkona.
Intte koyro dumma dumma meray deꞌiyo ciishshaa, hegaappe simmin goggiya haattaa, awaaninne kuwan daro mittaanne maataa beꞌiyoogan ufaytteeta. Woppu giida carkkoy carkkidi, sawuwaa tonggu giyaabaa inttekko ehees. Mittaa hayttay qaaxxiyoogaa, zaallaa bollaara goggiya haattaa cenggurssaa, kafuwaa yettaanne shamꞌꞌi shamꞌꞌiya guutta meretatu cenggurssaa siyeeta. Intte ha hanotaa qoppiyo wode, hegaa mala sohuwan deꞌanau yeemottekketii?
Asaa naati doomettan deꞌido sohoy hegaa mala gidiyoogaa saꞌa yuushuwan deꞌiya asay ammanees. Ayhuda ammanuwaa, Kiristtaane giyo ammanuwaanne Isilaama ammanuwaa kaalliyaageeti, Xoossay Addaamanne Hewaano wottido, Edene gannatiyaabaa daro xeetu layttau tamaaridosona. Geeshsha Maxaafay yootiyoogaadan Addaameenne Hewaana sarotettaaninne ufayssan deꞌidosona. Etau doꞌaara, eta giddooninne he loꞌꞌiya sohuwan merinau deꞌiyo hidootaa kehatettan immida Xoossaara sarotettay deꞌees.—Doo. 2:15-24.
Hinddu ammanuwaa kaalliyaageetuyyo beni wode gannatiyaabaa xeelliyaagan dumma qofay deꞌees. Budihistteti ayyaanaabaa gita asttamaaree woykko Budahi denddiyo wodiyan alamee gannate mala gidin ubbabay kumi palahees giidi ammanoosona. Qassi Afirkkan deꞌiya dumma dumma ammanoti Addaamenne Hewaani hanotaa milatiya taarikiyaa tamaarisoosona.
Asaa naati kaalliyo daro ammanuwaaninne wogan beni gannatiyaabaa yootiya qofay deꞌees. Issi xaafee hagaadan giis: “Asaa naatu taarikiyaa doomettan deꞌiya polo hanotay, laꞌatettay, sarotettay, ufayssaynne ubbabay kumido, qassi huqqunnay, hirggissiyaabaynne ooshshay baynna gannatiyaabaa dumma dumma wodiyan deꞌida daro asay ammanees. . . . Ha ammanoy asaa naati ubbay he xayida gannatiyaa yeemottanaadaaninne a zaarettidi ehaanau baaxetanaadan oottiis.”
Ha ubba taarikeenne wogay yiidoy issi sohuwaappe gidana danddayii? Asaa naati ubbay hegaadan ammananaadan oottidabay tumuppe deꞌidaba gidana danddayii? Edene gannatee beni wode tumuppe deꞌidabee, qassi Addaameenne Hewaana deꞌida asee?
Siriyaageeti ha qofaa toochoosona. Saynisiyaa eray darido ha wodiyan daro asay hegaa mala qofay hayse yaagees. Hegaa siriyaageetuppe issoti issoti haymaanoote eranchata gidiyoogee garamissiyaaba. Haymaanootiyaa kaalettiya daroti Edene gannatiyaabaa ammanennaadan oottiyaabaa tamaarissoosona. Eti hegaa mala sohoy mule deꞌi erennaagaa yootoosona. Gannatiyaabaa yootiya taarikee tuma gidenna, hayse woykko leemiso giidi yootoosona.
Geeshsha Maxaafan leemisuwan odettidabay deꞌiyoogee tuma. Yesuusi ba huuphe hara leemiso ubbaappe aadhidi erettiya leemisota yootiis. Gidikkokka, Geeshsha Maxaafay Edene gannatiyaabaa yootiyoy leemisodan gidennan, qonccenne akeekanau metenna taarikedaana. SHin, ha taarikee mule hanibeennaba gidikko, yaatin Geeshsha Maxaafan deꞌiya harabaa waatidi ammanana danddayiyoo? Issoti issoti Edene gannatiyaabaa siriyoy aybissakko, qassi eti shiishshiyo gaasoy ammanttiyaabaakkonne ane pilggoos. Yaatidi, ha taarikiyaa nuuni ubbay erana koshshido gaasuwaa beꞌana.