Pirddaa Gallassi Aybi Hananee?

1. Pirddaa Gallassay Aybee?

Ushacha baggan deꞌiya misiliyan qonccidaagaadan, daro asay Pirddaa Gallassan biilooniyan qoodettiya asaa shemppoy kase oottidobau bessiya pirddaa ekkanau, giishin amaridaageeti saluwan deꞌiyo woytuwaa ekkanau, harati qassi siꞌooliyan barchetanau Xoossaa araataa sinttan eqqoosona giidi qoppees. SHin, Pirddaa Gallassan oottanau halchettidabay asaa naaquwaappe ashshiyoogaa gidiyoogaa Geeshsha Maxaafay yootees. (Maz. 96:13) Yesuusi asaa naatussi zaarettidi suure pirddaa ehiya Daanna gidanaadan Xoossay sunttiis.—Isiyaasa 11:1-5; Oosuwaa 17:31 nabbaba.

2. Pirddaa Gallassan suure pirdday deꞌanay ayba ogiyaanee?

Koyro bitanee Addaamee eriiddi Xoossaa bolli makkalido wode, ba zeretta ubbay nagarau haarettanaadan, tuggatanaadaaninne hayqqanaadan oottiis. (Roo. 5:12) Yesuusi hegaa giigissanau biilooniyan qoodettiyaageeta hayquwaappe denttana. Ajjuutaa maxaafay hegee Kiristtoos Yesuusa shaꞌu layttaa haaruwaa wode polettanaagaa qonccissees.—Ajjuutaa 20:4, 11, 12 nabbaba.

Hayquwaappe denddidaageeti pirddaa ekkiyoy hayqqanaappe kase oottidobaana gidennan, Ajjuutaa shemppo 20n odettida ‘maxaafatun’ xaafettidabau azazettiyoogaana woy azazettennaagaana. (Roo. 6:7) Kiitettida PHauloosi, hayquwaappe denddidi Xoossaabaa tamaaranaageetu giddon “worddoikka xilloikka” deꞌanaagaa yootiis.—Oosuwaa 24:15 nabbaba.

3. Pirddaa Gallassi Aybi Polettanee?

Xoossaa Yihoowabaa siyennaaninne ayyo oottennan hayqqidaageeti kaseegaappe laamettidi loꞌꞌobaa oottiyo qaaday etau deꞌana. Eti loꞌꞌobaa oottiyaaba gidikko, ‘deꞌanau denddidosona’ giyoogaa. SHin, hayquwaappe denddidaageetuppe issoti issoti Yihoowabaa tamaaranau koyokkona. Eti ‘pirddettanau denddidosona’ giyoogaa.—Yohaannisa 5:28, 29; Isiyaasa 26:10; 65:20 nabbaba.

SHaꞌu layttaa Pirddaa Gallassaa wurssettan, Yihooway azazettiya asaa naati koyroogaadan polo gidanaadan oottana. (1 Qor. 15:24-28) Azazettiyaageetu ubbaassi he ufayssiya hidootay deꞌees! Wurssetta paaciyaa wode, Seexaanaa Dabloosi shaꞌu layttau qashettido ciimma ollaappe Xoossay a birshshana. He wodekka Seexaanay asaa Yihoowappe haassanau malana, shin Seexaanaa eqettidaageeti saꞌan merinau deꞌana.—Isiyaasa 25:8; Ajjuutaa 20:7-9 nabbaba.

4. Asaa naatussi anjjuwaa ehaana hara pirdda gallassay awugee?

Geeshsha Maxaafay ha alamee xayiyoogaakka ‘pirdda gallassaa’ yaagees. Ha pirdda gallassay, Nohe wode iita asaa ubbaa xayssida Bashshaa Haattaagaadan qoppennan puttu gaana. “Xoossau goinnenna asati” mata wode xayi simmin, ‘xilloy deꞌana’ saꞌan, asaa naati ooratta dere gididi deꞌanaagee ufayssiyaaba.—2 PHeexiroosa 3:6, 7, 13 nabbaba.