Yesuusi iitabaa oottida bitanee saluwan deꞌanaagaa ayyo yootidee?

Ha oyshay denddidoy, Yesuusi ba miyyiyan kaqettida, iitabaa oottida bitanee sinttappe Gannatiyan deꞌanaagaa yootido gishshataassa. Yesuusi, “Taani neessi tumaa odais[; hachchi] neeni tanaara gannatiyan de7ana” yaagiis. (Luqaasa 23:43) He Gannatee awaanakko Yesuusi yootibeennaagaa hassaya. Yaatin, Yesuusi iitabaa oottida bitanee banaara saluwan deꞌanaagaa yootidee?

Koyro, iitabaa oottida he bitanee saluwaa biyaageetuppe koyettiyaabaa kunttidaakko ane beꞌoos. Saluwaa biyo hidootay deꞌiyoogeeti haattaaninne geeshsha ayyaanan xammaqettoosona; yaatidi, Yesuusi erissiyo ashkkaranne Xoossaa naata gidoosona. (Yohaannisa 3:3, 5) Qassi harabay, eti Xoossay kessido kandduwaa maaraadan deꞌoosona; hegaadankka, ammanettiyoogaa, suure deꞌiyoogaanne qaretaa mala eeshshay deꞌiyoogeeta. (1 Qoronttoosa 6:9-11) Eti qassi hayqqana gakkanaashin Xoossaunne Kiristtoosau ammanettidi deꞌana bessees. (Luqaasa 22:28-30; 2 Ximootiyoosa 2:12) Eti hegaadan oottiyoogan hayquwaappe denddana bessiyoogeetanne saluwan demmana gita maataa demmanau, giishin kawonne qeese gididi Kiristtoosaara shaꞌu layttau asaa naata haaranau danddayiyaageeta gidiyoogaa bessoosona.—Ajjuutaa 20:6.

Hegaappe dumma ogiyan, Yesuusa miyyiyan kaqettida bitanee iitabaa oottiiddi deꞌiis; hegaa gishshau hayqqiis. (Luqaasa 23:32, 39-41) I Yesuusa, “Ne kawotettaa wolqqan yiyo wode, tana dogoppa” yaagidoogee a bonchiyoogaa bessiyaaba. (Luqaasa 23:42) Gidikkokka, i xammaqettiyoogan Yesuusi erissiyo ashkkaranne Xoossaa naꞌa gidibeenna; qassi ba deꞌo layttan Xoossay kessido kandduwaa maaraadan deꞌida, ammanettida asa gidenna. Hayqqana gakkanaashin ammanettida ba erissiyo ashkkaratuura saluwan kawotanaadan Yesuusi he bitaniyau qaalaa geliis giidi qoppiyoogee bessiyaabee?—Roome 2:6, 7.

Leemisuwau, issi uri ne miishshaa wuuqqidi neeni ayyo atto gaanaadan oychikko, a mootennan aggana danddayaasa. SHin an ammanettada ne zalꞌꞌiyau woy ne keettaa asau aawatanaadan oottay? Hegaa mala aawatettaa keehippe ammanettiyo ura xallau immaasa. Hegaadankka, saluwaa biyo hidootay deꞌiyoogeeti, sinttappe asaa naata haariyo wode Xoossay kessido xillotettaa maaraa naaganaagaa bantta deꞌuwan qonccissidaageeta gidana bessees. (Ajjuutaa 2:10) Iitabaa oottida bitanee hayqqana haniyo wode ba mooruwaa ammanikkokka, saluwan deꞌana asatuppe koyettiyaabaa oottibeenna.

SHin Yesuusi iitabaa oottida bitanee he gallassi banaara saluwan deꞌana gibeenna. Yesuusi ba huuphe he gallassi saluwaa bibeenna gishshau, hegee hanennaba. Yesuusi “biitta giddon” woy duufuwan heezzu gallassaa takkiis. (Maatiyoosa 12:40; Marqqoosa 10:34) I ubba hayquwaappe denddi simmidikka, saluwaa baanaappe kase 40 gallassaa saꞌan takkiis. (Oosuwaa 1:3, 9) Yaatiyo gishshau, iitabaa oottida bitanee he gallassi Yesuusaara saluwan deꞌana danddayenna.

Yaatin, iitabaa oottida bitanee deꞌana Gannatee awaanee? I hayquwaappe denddidi, Yesuusi haariyo Gannate saꞌan deꞌana. (Oosuwaa 24:15; Ajjuutaa 21:3, 4) He Gannatiyaabaanne Xoossay neeppe koyiyoobaa gujjada eranau, Yihoowa Markkata haasayissa.