Yihooway ‘Hachi Hachi Ta Toohuwaa Tookkees’
Danddayettennaba malatiya wolqqaama sahoy tana darotoo sakkiyaaba gidikkonne, saluwan deꞌiya nu Aaway ta deꞌo laytta ubban tana siiquwan maaddiyoogaa akeekaas. Qassi 20ppe dariya layttau aqinye gidada Yihoowau haggaazido gishshau keehi ufayttaas.
Taani 1956n yelettoosappe doommada isppaynaa bifida giyo sahuwaa sahettays. Zokko meqettaa giddoora kanttiya narbbee deꞌiyo sohoy poga gididi uttidoogee ta narbbiyaa qohido gishshau, hemettanau metootays; qassi hara wolqqaama sahoy daroy tana oyqqiis.
Taani yelettanaappe guuttaa kasetidi, Yihoowa Markka gidida misoonaaweti tana yelidaageeta Geeshsha Maxaafaa xannaꞌissiyoogaa doommidosona. Taani naatettan deꞌiyo wode, Namibiyan deꞌiya, taani yelettido Usakosa kataman keehi guutta aassiyaageeti deꞌoosona. Harati nuuppe daro haakkidi deꞌoosona. Yaatiyo gishshau, gubaaꞌiyan xannaꞌiyoobaa so asaara issippe tobboos. Tau laappun laytta gidido wode, taani sheeshshaa sheꞌanaadan ta bollaa giddon xooꞌiya kessiyo yurostomii giyo akkamuwaa akkamettaas. Taassi layttay 14 gidido wode, tana eppilepisii giyo harggee oyqqiis. Nu heeran naaꞌꞌantto xekka timirtte keettay keehi haahuwan deꞌiyo gishshaunne sahuwaara gayttidaagan ta aawaynne ta aayyiyaa tana maaddana koshshiyo gishshau, timirttiyaa wurssana danddayabeykke.
Gidoppe attin, ayyaanaaban minnanau murttaas. He wode nu xuufetuppe daroti taani haasayaa doommido, Afrikaans geetettiya qaalan birshshettibookkona. Yaatiyo gishshau, nu maxaafatuppe amaridaageeta xannaꞌanau Inggilizettuwaa nabbabiyoogaa tamaaraas. Taani aassiyaaro gidaas; qassi tau layttay 19 gidiyo wode xammaqettaas. Hegaappe simmin deꞌiya oyddu layttau, taani keehi daro sahuwaa sahettada keehi metootaas. Hegaa bollikka, taani deꞌiyo kataman asay issoy issuwaara daroban gayttiyo gishshau, asau yayyiyoogee mishettada haggaazennaadan diggiis.
Tau layttay 20 heera gidido wode, Namibiyaa biittaappe Tohossa Afirkkaa biittan deꞌanau biida, yaatin taani gubaaꞌiyan koyro shiiqidoy he wode. Hegee keehi ufayssiyaaba! SHin, akkamettanau haranttuwaa shuhettaas; he wode, katta sheeshshay ta bollaappe kiyiyo xooꞌiyaa giigissidosona.
Hegaappe simmin takkennan, woradaa xomoosiyaagee aqinye gididi haggaaziyoogaabaa shiiquwan haasayishin siyaas. I haasayidobay ta wozanaa denttettiis. Sahuwan taani keehi qohettidoogaa erays; shin daro metuwan genccanaadan Yihooway tana waatidi maaddidaakko beꞌaas. Hegaa gishshau, kumetta wode aqinye gidanau qitsiyaa kunttaas. SHin, tana sakkiyo gishshau, cimati paqqadanau mammottidosona.
Gidikkokka, Kawotettaa mishiraachuwaa sabbakiyoogan danddayettida ubbabaa oottanau qofaa qachaas. Ta aayyiyaanne harati maaddin, usuppun aginau aqinyeti haggaaziyoogaa keena saatiyaa haggaazaas. Hegee taani aqinye gidanau murttidoogaanne ta sahoy tana waayissennaagaa qonccissiis. Taani naaꞌꞌanttuwaa qitsiyaa kunttaas; yaatin he wode tau paqqadettiis. Masqqala 1, 1988n taani kumetta wode aqinye gidaas.
Taani aqinye gidada oottido wodiyan, ubbatoo Yihooway tana maaddiyoogaa beꞌaas. Ta hanotaa ubbatoo qoppiyoogaappe hara asaa tumaa tamaarissiyoogee taani naagettanaadaaninne ayyaanaaban minnanaadan maaddiis. Taani daroti Yihoowau bantta huuphiyaa geppidi xammaqettanaadan maaddiyoogan keehi ufayttaas.
Tana haꞌꞌikka wolqqaama sahoy darotoo sakkees. SHin, Yihooway ‘hachi hachi ta toohuwaa tookkees.’ (Maz. 68:19) I taani danddayada deꞌanaadan maaddiyoogaa xalla gidennan, ufayttada deꞌanaadankka maaddees!