Taani Naatettan Dooridobaa

Amarkkan Ohayon, Kolombose giyo kataman taani tamaariyo timirtte keettaa Kambboodiyaa biittaa naati 1985n yiido wode tau layttay tamma. Yiida naatuppe issoy Inggilizettuwan amarida qaalaa erees. I misiliyaa tana bessiiddi barchiyaa bessido, woridonne kessi ekkida asaabaa azzanttiya taarikiyaa tau yootiyoogaa doommiis. Qammi qammi he naatubaa qoppiyo wode yeekkays. Taani etau Gannatiyaabaanne dendduwaabaa yootanau koyaas; shin eti ta qaalaa erokkona. Taani he wode guutta naꞌa gidikkonne, tanaara tamaariya naatussi Yihoowabaa yootanau Kambboodiyaa biittaa qaalaa tamaaranau qofaa qachaas. Hagee tana sinttappe waati maaddanaakko he wode akeekabeykke.

Kambboodiyaa biittaa qaalaa tamaariyoogee deexxiyaaba. Hegaa tamaariyoogaa agganau naaꞌꞌutoo qoppaas; shin Yihooway ta aawaanne ta aayee baggaara tana minttettiis. Guyyeppe, taani daro miishshaa demissiya oosuwaa oottana mala tana tamaarissiyaageetinne tanaara tamaariya naati zoriyoogaa doommidosona. SHin taani aqinye gidanau koyido gishshau, amarida saate xallaa oottaydda aqinye gidada haggaazanau maaddiya timirttiyaa tamaaranau dooraas. Taani timirttee baynna wode, aqinyetuura gayttada haggaazays. Qassi Inggilizettuwaa biron tamaariyaageeta xannaꞌissaas; hegee guyyeppe tana keehi maaddiis.

Tau layttay 16 gidiyo wode, Amarkkan, Kaliforniyan Long Biich giyo kataman Kambboodiyaa qaalaa citay deꞌiyoogaa siyaas. Taani yaa baada Kambboodiyaa biittaa qaalaa waati nabbabiyaakko tamaaraas. Taani timirttiyaa wurssosaara aqinye gidada nu heeran deꞌiya Kambboodiyaa biittaa asau sabbakaas. Tau 18 laytta gidiyo wode, Kambboodiyaa biitti baanau qoppaas. Kambboodee deꞌuwau hirggissiya biitta; shin yan deꞌiya tammu miiloone asaappe Kawotettaa mishiraachuwaa siyidaageeti keehi guutta gidiyoogaa siyaas. He wode, yan deꞌiyay issi gubaaꞌe xalla; he gubaaꞌiyan 13 aassiyaageeti deꞌoosona. Taani Kambboodiyaa koyro biyo wode tau 19 laytta. Naaꞌꞌu layttappe guyyiyan, yaa baada deꞌanau qofaa qachaas. Haggaazaydda tau koshshiyaabaa kunttanau, amarida saatiyau Inggilizettuwaa tamaarissiyoonne he qaalan birshshiyo oosuwaa demmaas. Guuttaa takkada, taagaa mala hoollee deꞌiyo machiyo ekkaas. Nuuni issippe Kambboodiyaa biittaa asati daroti bantta huuphiyaa Xoossau geppanaadan maaddida.

Yihooway taani ‘wozanan amottiyoobaa’ tau immiis. (Maz. 37:4) Asaa erissiyo ashkkara oottiyoogee hara ay oosuwaappenne aaruwan ufayssiyaaba. Taani Kambboodiyan deꞌido 16 layttan, 13 aassiyaageeti deꞌiyo he guutta gubaaꞌee diccin haꞌꞌi yan 12 gubaaꞌetinne 4 citati deꞌoosona.— Jesen Blakweli yootidoogaa.