NABBABIYAAGEETU OYSHAA

Ahaa xuuggiyoogee Kiristtaanetussi bessiyaabee?

Ahaa xuuggiyo meezee bessennaba geetettidi Geeshsha Maxaafan odettibeenna.

Hayqqida asatu ahay woy eta meqettay xuugettidoogaa yootiya xiqiseti Geeshsha Maxaafan deꞌoosona. (Yaas. 7:25; 2 Odi. 34:4, 5) Hegee he asati maara moogettana bessennaageeta gidiyoogaa bessennan waayi aggana. SHin ahay xuugettiyoy ubbatoo hegaassa gidenna.

Kawuwaa Saaꞌoolanne a naatu hayquwaabaa yootiya taarikiyaappe hegaa akeekana danddayoos. Eti oyddaykka Pilisxxeematuura olettiiddi hayqqidosona. He naatuppe issoy Daawitassi ammanettidi exatida a loꞌꞌo laggiyaa Yonaataana. Galaꞌaaden deꞌiya Yaabeesha giyo katamaa asati hanidaba siyidi, he oyddatu ahaa ehiidi xuugidosonannne eta meqettaa moogidosona. Guyyeppe Daawiti he asati oottidobawu eta galatiis.—1 Sam. 31:2, 8-13; 2 Sam. 2:4-6.

Hayqqida ura hidootay dendduwaa woykko Xoossay izaawussi zaarettidi deꞌuwaa immiyoogaa gidiyoogaa Geeshsha Maxaafay yootees. Hayqqida ura ahay xuugettin aggin, ayyo zaarettidi ooratta bollaanne deꞌuwaa immanaagee Yihoowa metennaba. Beni Kawuwaa Nabukadanaxxoori azazin itoone taman yegettidi hayqqanawu naagiya heezzu Ayhudati hegaadan hayqqikko Xoossay banttana denttana danddayenna giidi hirggibookkona. (Dane. 3:16-18) Naazetu kambbiyan woridi taman xuuggido, Yihoowawu ammanettida ashkkaratubaykka hegaara issi mala. Xoossawu ammanettida ashkkarata darota xuuqqidibay woy harabay worin, eta bollaappe aybanne demmana danddayettibeenna. Gidikkokka, eti denddanaagee erettidaagaa.—Ajj. 20:13.

Yihooway issi ura denttanawu a kase bollaa zaarettidi issippe gatti oyttana koshshenna. Xoossay ayyaanan tiyettidaageeti saluwan deꞌanaadan denttiyoogee hegaa bessees. Tiyettida Kiristtaaneti ‘ayyaanan paxa’ gidida Yesuusaagaadan kaseegeeta gidikkonne, ayyaana bollay deꞌiyoogeeta gididi denddoosona. Eta kase bollaappe aybinne saluwaa beenna.—1 PHe. 3:18; 1 Qor. 15:42-53; 1 Yoh. 3:2.

Nuuyyo deꞌiya dendduwaa hidootay ahaa oottiyoobaara gidennan, Xoossay qaalaa gelidobaa polanawu ayyo deꞌiya wolqqaanne laamotaa ammaniyoogaara gayttidaba. (Oos. 24:15) Xoossay beni wode hayquwaappe issota issota waati denttidaakkonne sinttappe waati denttanaakko nuuni wurssidi erennaagee tuma. Gidikkonne, Yihoowan ammanettoos. I Yesuusa hayquwaappe denttiyoogan hegaa “tumayiis.”—Oos. 17:31; Luq. 24:2, 3.

Ahaa moogiyoogaara gayttidaagan Kiristtaaneti biittaa wogaa, asaa qofaanne higgiyaara gayttidaba qoppana bessees. (2 Qor. 6:3, 4) Yaatikko, hayqqida ura ahaa xuuggiyoogee woy aggiyoogee issi uri woy issi keettaa asay kuuyiyooba.