Ta koyiyoobaa xallaa polaydda deꞌaas

KASE DEꞌUWAA:

Taani yelettoosappe guutta layttay aadhana gakkanaassi nu soo asay CHeekenne Polandde biittatu zawaa heeran, Arshsho Jarmanen, Leypzik giyoosaa matan deꞌiis. Tawu usuppun laytta gidido wode, ta aawaa oosuwaa gaasuwan hara biitti biida—koyro Brazile, hegaappe simmin qassi Ekuwadore biida.

Tawu layttay 14 gidin, Jarmane baada yan aqidi tamaariyo timirtte keettan tamaaranaadan yeddidosona. Ta aawaynne ta aayyiyaa Tohossa Amarkkan taappe keehi haahosan deꞌiyo gishshawu, tawu koshshiyaabaa kunttiyay tana. Taani zorin siyenna asa gidaas. Taani oottiyooban harata qohi qohennee gaada mule qoppikke.

Tawu layttay 17 gidido wode, ta aawaynne ta aayyiyaa Jarmane guyye simmidosona. Koyro etaara deꞌaas. SHin taani ta koyiyoobaa xallaa polanawu koyiyo gishshawu, ta aawaayyoonne ta aayeessi azazettada deꞌana danddayabeykke. Tawu layttay 18 gidido wode, sooppe kiyaas.

Deꞌuwawu halchidobi aybakko taani eranawu koyiyo gishshawu, woppaa xayaas. Dumma dumma deꞌuwaa maaraanne dumma dumma dirijjitiyaa beꞌa simmada, ha loꞌꞌiya saꞌaa asay xayssanaappe kase yuuyada beꞌiyoogee ta deꞌuwan oottana danddayiyo loꞌꞌoba gidiyoogaa ammanaas.

Motoriyaa shammada Jarmaneppe Afirkkaa baanawu denddaas. SHin daro takkennan, ta motoriyaa giigissanawu Jarmane simmaas. Hegaappe simmin takkennan, Portugaale biittan abbaa doonaa gakkaas. Motoriyan biyoogaa aggabayada wolwoluwaa laaggiyoogaa doommanawu he wode qofaa qachaas.

Atlanttike Ano Abban wolwoluwaa laagganawu giigettiya amarida yelagatu yame gidaas. Guyyeppe taani ekkido Lori giyo etappe issinniira he wode gayttaas. Koyro, Karibiyan haruurota giyoosaa wolwoluwan biida. Hegaappe simmin, Porto Rikon guutta wodiyaa deꞌidi Awurooppaa simmida. Deꞌiyoosa oottidi giigissana danddayiyo, motoriyan biya wolwoluwaa yan demmana giidi qoppida. SHin heezzu agina xallawu koyi simmin, he qofaykka atti aggiis. Jarmane biittan wotaaddara oosuwaa oottanaadan tana xeesidosona.

Abbaa giddon olettiya Jarmane olanchatuura 15 aginaa oottaas. He wode Loriira azinanne macho gididi, nu yuushshaa yuuyanawu giigettida. Taani wotaaddara oosuwaa oottanaappe guuttaa kasetidi, nuuni issi wolwoluwawu bolla bagga wonggire malabaa shammida. Taani wotaaddara oosuwaa oottiyo wode, hegaa giigissidi wolwolo kessida. He wolwoluwan uttidi ha loꞌꞌiya saꞌaa yuuyidi beꞌanawu halchida. Taani wotaaddara oosuwaa wurssa simmin, he wolwoluwaa giigissi wurssanaappe kase, nuuni Yihoowa Markkatuura gayttidi Geeshsha Maxaafaa xannaꞌiyoogaa doommida.

TAANI LAAMETTANAADAN GEESHSHA MAXAAFAY MAADDIIS:

Koyro heeran, ta deꞌuwan darobaa laammana koshshiyoobadan qoppabeykke. Taani ekkido macheera deꞌays, qassi sijaaraa uyiyoogaa aggaas. (Efisoona 5:5) Nuuni saꞌaa yuuyanawu halchidoogaakka, Xoossay medhido maalaalissiyaabaa beꞌiyooba gidiyo gishshawu loꞌꞌoba gaada qoppaas.

SHin taani laamettana koshshees; ubba qassi ta eeshshay laamettana koshshees. Taani keehi otorettiyo gishshawunne zorinkka siyenna gishshawu, ta eraabaanne taani oottiyoobaa xallaa qoppays. Ta koyiyoobaa xallaa polaydda deꞌaas.

Yesuusi deriyaa bollan tamaarissido erettida timirttiyaa issi galla nabbabaas. (Maatiyoosa, shemppo 5-7) Koyro, Yesuusi yootido ufayssaabay tana garamissiis. Leemisuwawu, i namisettiyaageetinne saamettiyaageeti ufayttiyoogaa yootiis. (Maatiyoosa 5:6) Taani issi uri hiyyeesa gidiyoogee a waatidi ufayssana danddayii gaada qoppaas. Taani xannaꞌiyoogan sinttawu sugada nuussi ubbaassi ayyaanaabaa pacay deꞌikkokka, he pacay kumana mala kasetidi nu huuphiyaa kawushshidi he pacay deꞌiyoogaa ammanana koshshiyoogaa akeekaas. Yesuusi giidoogaadan, “Bantta ayyaanan hiyyeesa gididoogaa eriyaageeti anjjettidaageeta.”—Maatiyoosa 5:3.

Nuuni Jarmanen Geeshsha Maxaafaa xannaꞌiyoogaa doommi simmin, Loranne taani koyro Paransaaye, hegaappe simmin qassi Xaaliyaa biida. Nuuni biyoosan ubban Yihoowa Markkatuura gayttoos. Eti issoy issuwaa wozanappe siiqiyoogaaninne eta issippetettan taani keehi maalaalettaas. Yihoowa Markkati tumuppe kumetta saꞌan deꞌiya ishanttu maabara gidiyoogaa beꞌaas. (Yohaannisa 13:34, 35) Guyyeppe, Loranne taani xammaqettidi Yihoowa Markka gidida.

Taani xammaqetta simmadakka ta eeshshaa laammiyoogaa aggabeykke. Loranne taani Afirkkaa bagga abbaa xanxxaa gakkanaassi, yaati simmidi qassi Atilanttike Ano Abbaa kanttidi Amarkkaa gakkanaassi wolwoluwaa laagganawu halchida. Keehi aaho abbaa giddon nu naaꞌꞌaa xallay guutta wolwoluwaa giddon deꞌiyo wode, nuna Medhidaagaa wolqqaamaara geeddarssiyo wode taani keehi laafa gidiyoogaa akeekaas. Abbaa giddon oottiyoobi darenaagaappe denddidaagan taayyo daro wodee deꞌiyo gishshawu, Geeshsha Maxaafaa keehi nabbabaas. Yesuusi saꞌan deꞌido deꞌuwaabaa yootiya taarikee tana keehi maalaalissees. I taani qoppanawukka danddayennaagaa keena eray deꞌiyo, wottiyoobi baynna asa gidikkokka, mule babaa yootibeenna. I ba deꞌuwan saluwan deꞌiya ba Aawaa gayriisippe attin bana gayribeenna.

Taani Yesuusi oottidobaa wotta denttada qoppiyo wode, taani koyiyo dumma dummabaa oottaydda Xoossaa Kawotettaabaa qoppiyoogaa aggada he Kawotettaa ta deꞌuwan kaseyana koshshiyoogaa akeekaas. (Maatiyoosa 6:33) Taaninne Lora wurssettan Amarkkaa gakkido wode, saꞌaa yuuyiyoogaa aggidi yan uttidi wozanappe Yihoowawu goynnanawu qofaa qachida.

TAANI GOꞌETTIDO HANOTAA:

Taani kase ta koyiyoobaa xallaa polaydda deꞌiyo wode, ta hachidobaa darotoo sirays. SHin haꞌꞌi bali baynna aadhida eratettaa pulttuwaa demmaas. (Isaiah 48:17, 18) Qassi kase deꞌabeenna ufayssiya deꞌuwaa deꞌays; hegeekka Xoossawu goynniyoogaanne haratikka abaa eranaadan maaddiyoogaa.

Loranne taani Geeshsha Maxaafan deꞌiya maaraa kaallidoogee nu aqo deꞌoy keehi minnanaadan oottiis. Yihoowa eriyaanne a siiqiya loꞌꞌiya naꞌiyo yelido gishshawukka anjjuwaa demmida.

Nu deꞌoy ubbatoo woppu giida abban wolwoluwaa laaggiyoogaa mala gidenna. SHin Yihooway maaddiyo gishshawu, ayyo haggaaziyoogaa woy an ammanettiyoogaa mule aggenna mala murttida.—Leemiso 3:5, 6.