Bezbol Giyo Kaassaa Aybippenne Aaruwan Dosays!

KASE DEꞌUWAA

Taani Kosta Rika giyo kataman diccaas. Tana yelidaageetussi hosppun naati deꞌoosona; taani laappuntto naꞌa. Taayyo layttay hosppuna gidiyo wode ta aaway hayqqiis. Hegaa gishshawu, ta aayyiyaa nuna barkka dichchaasu.

Taani naatettaappe doommada ispporttiyaaa dosays; qassi hegee ta deꞌuwan aybippenne aadhdhiyaaba gidiis. Taani yelagatettan deꞌiyo wode, amatere ligiyan annaacettiya citan kaaꞌiyoogaa doommaas. Taani amatere ligiyan kaaꞌishin tawu layttay 20 gidin, gooba kaassanchchaa koyiya issi bitanee Nikaraguwan deꞌiya erettida citawu kaaꞌanaadan tana oychchiis. SHin he wode ta aayyiyaa sahettiyo gishshawunne iyyo koshshiyaabaa kunttiya asi baynna gishshawu taani Nikaraguwa baanawu koyabeykke. Yaatiyo gishshawu hegan maayettabeykke. Hegaappe simmin, gooba kaassanchchaa koyiya hara bitanee amatere ligiyaappe doorettida kaassanchchati deꞌiyo Kosta Rika biittawu kaaꞌanaadan tana shoobbiis. He wode, shoobiyaa ekkaas. Yaatada 1949ppe 1952 gakkanawu, ta biittawu kaaꞌaas; qassi Kuuban, Meksikkooninne Nikaraguwankka kaaꞌaas. Taani he citan gooba kaassanchcha. Qassi 17 kaassata aynne moorennan kaaꞌaas!

Taani shori baynna deꞌuwaa deꞌidoogan zilꞌꞌettays. He wode taassi issi laggiyaa deꞌiyaaba gidikkonne, hara maccaageeturakka mattumaa gayttays. Taani ushshaa likkiyaappe aattada uyays. Issi qammi taani keehi mattottido gishshawu, wonttin hiittaappe denddiyo wode soo waana simmidaakko hassayikke! Taani domino giyo ceeriyaa kaaꞌaysinne lotoriya qanxxays.

He wode, ta aayyiyaa Yihoowa Markka gidaasu. A taayyo Geeshsha Maxaafaabaa yootanawu baaxetidaba gidikkonne, taani ispporttiyaabaa xallaa qoppiyo gishshawu siyabeykke. Taani loohiyo wode he kaassaabaa xallaa qoppiyo gishshawu, qumaa miyo wodiyaakka hassayikke! Taani aybippenne aaruwan he kaassaa dosays!

SHin taayyo layttay 29 gidido wode, he kaassaa kaaꞌishin kuwaasiyaa oyqqanawu malaydda keehi qohettaas. Taani paxa simmada, he kaassaa kaaꞌiyoogaa aggaas. SHin amatere ligiyan kaaꞌiyaageeta loohissiyoogaa aggabeykke.

TAANI LAAMETTANAADAN GEESHSHA MAXAAFAY MAADDIIS

Taani 1957n, Yihoowa Markkatu gita shiiquwan shoobbettada kase taani kaaꞌido isttaademiyan shiiqaas. Taani uttada ezggiyo wode, kase kuwaasiyaa beꞌanawu he isttaademiyan shiiqiya asaappe Yihoowa Markkati keehi dummatiyoogaanne eti issoy issuwaa bonchchiya asa gidiyoogaa akeekaas. He shiiquwan beꞌidobay taani Yihoowa Markkatuura Geeshsha Maxaafaa xannaꞌanaadaaninne eta shiiqota shiiqanaadan tana denttettiis.

Taani Geeshsha Maxaafaappe tamaarido darobaa keehi dosaas. Leemisuwawu, Yesuusi ba erissiyo ashkkarati wurssettaa wodiyan Xoossaa Kawotettaa mishiraachchuwaa kumetta alamiyan sabbakanaagaa kasetidi yootiis. (Maatiyoosa 24:14) Qassi tumu Kiristtaaneti Xoossawu oottiyoy miishshaa demmanaassa gidennaagaa akeekaas. Yesuusi, “Intte coo ekkideta; coo immite” yaagiis.—Maatiyoosa 10:8.

Taani Geeshsha Maxaafaa xannaꞌada, Geeshsha Maxaafay yootiyoobaa Yihoowa Markkati oottiyoobaara geeddarssaas. Eti Xoossaa Kawotettaabaa sabbakanawu minnidi oottiyoogan maalaalettaas. Yesuusi ba erissiyo ashkkaratussi yootidoogaadan, eti keha gidiyoogaa akeekaas. Yaatiyo gishshawu, Yesuusi Marqqoosa 10:21n “yaada tana kaalla,” giidi shoobbidoogaa nabbabada Yihoowa Markka gidanawu koyaas.

Taani laamettiyoogee amarida wodiyaa ekkiis. Leemisuwawu, daro layttatuyyo taani taayyo “qaada” gaada wottido payduwan saaminttan saaminttan nu biittaa lotoriyaa kaaꞌaas. SHin, “Qaada giyo eeqaayyo” goynniyaageetanne yaaretiyaageeta Xoossay ixxiyoogaa taani Geeshsha Maxaafaappe tamaaraas. (Isiyaasa 65:11; Qolasiyaasa 3:5) Yaatiyo gishshawu, taani ceeriyaa kaaꞌiyoogaa agganawu kuuyaas. SHin taani ceeriyaa kaaꞌiyoogaa aggoosappe koyro Woggaa galla taani “qaada” gaada wottido paydoy xooniis! Taani he saaminttan kaaꞌenna gishshawu asay ta bolli miicciis; qassi taani zaarettada kaaꞌana mala eti tana iisettidosona; shin taani kaaꞌabeykke. Taani zaarettada ceeriyaa kaaꞌabeykke.

Taani Yihoowa Markkatu gita shiiquwan xammaqettido galla hara paacee tana gakkiis. (Efisoona 4:24) He qammi taani shemppido hooteeliyaa biyo wode, ta kase laggiyaa ta kifiliyaa penggen eqqada tana naagawusu. A “Saamii, haaya; issippe ufayssiya wodiyaa aattoos!” gaada tana iisettaasu. SHin taani iyyo sohuwaara “Akkay!” gaada zaaraas. Mattumaa gaytettaanne aqo deꞌuwaa xeelliyaagan Geeshsha Maxaafay yootiyoobawu taani haꞌꞌi azazettiyoogaa iyyo yootaas. (1 Qoronttoosa 6:18) A dagammada “hee, woygay?” gaasu. Yaatada, A mattumaa gaytettaanne aqo deꞌuwaa xeelliyaagan Geeshsha Maxaafay yootiyoobay aynne maaddennaba gidiyo gishshawu nuuni kaseegaadan deꞌana bessees gaada yootaasu. Gidikkonne, taani ta kifiliyaa gelada kariyaa gorddaas. Taani 1958ppe doommada Yihoowayyo ammanettada deꞌiyoogan, ha wodiyan keehi ufayttays.

TAANI GOꞌETTIDO HANOTAA

Taani demmido anjjota ubbaa xaafana giyaakko gita maxaafa gidana gaada qoppays! Ha wodiyan taayyo daro tumu laggeti deꞌoosona, giiga deꞌuwaa deꞌaysinne wozanappe ufayttays; hegeeti taani demmido anjjotuppe amaridaageeta.

Taani haꞌꞌikka he kaassaa dosays; shin taani ta deꞌuwan hara keehi koshshiyaabaa xoqqu ootta xeellays. Taani he kaassan erettida asa gididabanne daro miishshaa demmidaba gidikkonne, hegeeti merinawu deꞌiyaaba gidokkona. SHin Xoossaaranne ta ishanttuura deꞌiya dabbotay merinawu deꞌana. Geeshsha Maxaafay hagaadan gees: “Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau de7ana.” (1 Yohaannisa 2:17) Taani haꞌꞌi aybippenne aaruwan Xoossaa Yihoowanne A asaa siiqays!