Xaaruwaa Bolli Xaafettida Asa Sunttaa

Heezzu shaꞌu layttappe kase urqqaappe merettida meꞌo xaaruwaa 2012n biitta giddoppe demmidoogee eranchata keehi maalaalissiis. He xaaroy keehi dumma gididoy aybissee? A bolli xaafettidabaa gaasuwaana.

Biittaa bookkidi xannaꞌiyaageeti he suuppata issippe gatti shiishshidi, he xaaruwaa bolli xaafettida beni Kanaanetu xuufiyaa nabbabana danddayidosona. Xuufee, “Eshibaꞌaala Ben Beda [naꞌaa]” yaagees. Biittaa bookkidi xannaꞌiyaageeti woocettidi xaafettida beniban ha sunttaa hegaappe kase demmi erokkona.

Geeshsha Maxaafan Eshibaꞌaala geetettida hara asikka deꞌees; i Kawuwaa Saaꞌoola naatuppe issuwaa. (1 Odi. 8:33; 9:39) Hegaa bookkidi demmidaageetuppe issuwaa gidida Profeeser Yooseef Garfinkeli, “Kawuwaa Daawita wode goꞌettiyo, Geeshsha Maxaafan deꞌiya Eshibaꞌaala giyo sunttay haꞌꞌi bookki demmidoban deꞌiyoogee maalaalissees” yaagiis. Issi issi asay he sunttay he wode deꞌiya asa xallay goꞌettiyoogaa giidi qoppees. Geeshsha Maxaafan qonccidabay bookkidi demmido naqaashaara maayettiyoogaa hegaappe akeekoos.

Geeshsha Maxaafan hara sohuwan Eshibaꞌaala giyo sunttay laamettidi Yaabustta geetettiis. (2 Sam. 2:10) Aybissi laamettidee? Eranchati hagaadan goosona: “Eshibaꞌaala giyo sunttay Kanaanetu eeqa xoossaa, Baꞌaala hassayissiyaaba gidiyo gishshawu naaꞌꞌantto Sameela xaafidaagee he sunttaa goꞌettanawu koyidaba milatenna; shin he sunttay . . . Hanidabaa Odiya maxaafan haꞌꞌikka deꞌees.”