Eray?

Beni Israaꞌeelen galla galla asay higgiyaara gayttidaagan palamettiyooban Muuse Higgiyaa maaran pirdday imettii?

ISSI issitoo, ee. Ane issi leemisuwaa beꞌoos. Zaarettido Wogaa 24:14, 15y hagaadan gees: “Ne ishaa gidiya Israa7eela asa gidin, woikko ne biittaa katamaappe issuwan de7iya kare biitta asa hiyyeesaa qaxarada naaqqoppa. . . . Hegee xayikko, metootanchchai neeppe GODAU waassin, neeyyo nagara gidana.”

Hegaa mala yohuwaara gayttidaban issi uri woossidobay laappuntta xeetu layttan K.K. xaafettiis. Hegee Ashddooda giyoosaa matan beettiis. He yohoy shiishshana bessiyaagaa keena kattaa shiishshennan aggiis geetettida oosanchchaaba gidennan aggenna; hegaa konꞌꞌaa bolli xaafidoogee hagaadan gees: “Ne ashkkaray [woossiyaagee] shiishshido kattaa amarida gallassappe kase dooriyoogaa wurssi simmin, SHobaya naꞌay Hoshayahu yiidi ne ashkkaraa maayuwaa wotti ekkiis. . . . Taani yootidobay tuma gidiyoogaa . . . suulliya awan tanaara kattaa shiishshida ta laggeti ubbay markkattana. Taani aynne moorabeykke. . . . Biittaa haariya ta godawu, ne ashkkaraa maayuwaa zaarissana bessennabaadan qoppikkokka, tawu qarettada zaarissa! Ne ashkkaray kallo deꞌishin coꞌꞌu gaada xeelloppa.”

Taarike eranchchay Saymen SHami ha woosay nuuyyo qonccissiyoy “issi oosanchchay [ba maayuwaa] zaarissanawu keehi koyiyoogaa xalla” gidennaagaa yootiis. I gujjidi hagaadan giis: “Geeshsha Maxaafan Wogaabaaninne Zaarettido Wogan hiyyeesata naaqqana bessennaagaa yootiya higgiyaa woossiyaagee eriyoogaakka he woosay bessees.”