Hayquwaappe Ooninne Attenna

GEELLA neeni nashshiyo erettida yettanchcheebaa, A hayttatidoogaabaa biiduwan beꞌaydda deꞌiyaabadan qoppa. He biidoy I naatettaabaa, A muuziqaa tamaariyoogaabaanne A hegaa zaara zaarada meezetiyoogaabaa bessiyoogan doommees. Hegaappe simmin, A daro biittaa manddarada alamiyan erettidaaro gidada daro asay shiiqidosan yexxishin beꞌaasa. Daro takkennan, A cimawusunne guyeppe hayqqawusu.

Ha biidoy hayqqiichchida uraabaa odiya tumu taarike. Izaawi yettanchcha gidin, saynttistte gidin, wottanchcha gidin, woy hara erettida ura gidin, A taarikee hegaappe dummatenna. Izaawi loꞌꞌobaa daruwaa oottiis, shin I cimennaakkonne hayqqennaakko ay keena oottanaakko qoppa.

Hegee kayyoyiyaaba, shin nuna ubbaakka gakkanawu deꞌiyaaba. (Eranchchaa 9:5) Nuuni ay keena baaxetikkonne, cimoosinne hayqqoos. Qassi sahettikko woy daafabay gakkikko nuuni akeekennan hayqqana danddayoos. Geeshsha Maxaafay yootiyoogaadan, nuuni “guutta wodiyau . . . beettidi, guyyeppe xayiya” maallado xaaza mala.—Yaaqooba 4:14.

Nuuni ay wodenne hayqqana danddayiyo gishshawu, “simmi moosinne uyoos; aissi giikko, nuuni wontto haiqqana” giidi asay qoppees. (1 Qoronttoosa 15:32) SHin asay ay wodenne hayqqana danddayiyoogaa eriyo gishshawunne sinttanaa hidootay etawu baynna gishshawu hegaadan deꞌees. Deꞌuwan issi wode, ubba qassi metoy gakkiyo wode issi uri, ‘Deꞌo giyoogee hagaa xallee?’ giidi oychchana danddayees. Zaaruwaa awuppe demmana danddayay?

Daroti saynttistteti zaaruwaa demmana giidi qoppoosona. Saynttisttetinne dottoreti asay daro layttaa deꞌanaadan maaddiyaabata demmidosona. Qassi issi issi saynttistteti asa bariyaa yaa adussanawu baaxetoosona. Saynttisttetussi injjetin aggin, asay hagaadan giidi oychchees: Nuuni cimiyoynne hayqqiyoy aybissee? Nu morkkee hayqoy xayanaagaa yootiyaabi deꞌii? Kaalliya huuphe yohoti ha qofata qonccissana, qassi ‘Deꞌo giyoogee hagaa xallee?’ giya oyshaa zaarana.