Bollaara Heemmiyaagaappe Yiida Dabddaabbiyaa
Nunaara Issippe Oottiya Siiqo Yihoowa Markkatoo:
Ubbaa Haariya, Yihoowa sunttan xeegettiyaageeta gidiyoogee nuuyyo ayba gita maatee! He sunttay merinau deꞌiyaagaa, xayennaagaanne aara laggetiyay baynnaagaa. Nuuni ba sunttan xeegettanaadan oottidaagee Yihoowa gidishin, 1931ppe doommidi, nuuni he dumma sunttan dummatidi xeegettoos. (Isi. 43:10) Nuuni Yihoowa Markka gididi erettiyoogan ceeqettoos.
Xoossaa sunttay erettennaadan oottanau Dabloosi ubbatoo baaxetees. A kaaletuwan, asay Yihoowa sunttaa toochees. Alamiyaa worddo haymaanootiyaa xaaxa waaxa oyqqida, Gita Baabiloona Xoossaa sunttaa ixxawusu; qassi daro Geeshsha Maxaafaa birshshettatuppe he sunttay kiyanaadan oottaasu. Hegaappe dumma ogiyan, Yesuusi bana kaalliyaageeta tamaarissido, leemiso gidiya woosan he sunttaa kaseyiyoogan, ba Aawaa sunttaa xoqqu xoqqu oottiis. I: “Simmi intte hagaadan yaagidi, Xoossaa woossite; ‘Saluwan de7iya nu Aawau, ne geeshsha sunttai anjjetto.’” yaagiis. (Maa. 6:9) Guyyeppe, wozanappe ba Aawaakko woossido woosan: “Taani ne sunttaa eta erissaas; sinttaukka erissana” yaagiis. (Yoh. 17:26) Yesuusa loꞌꞌo leemisuwaa kaalliyoogan, saꞌa ubban awudeegaappenne aaruwan minnidi Yihoowa sunttaa awaajjanau keehi murttida.
‘Mishiraachuwaa loytti markkattite’ yaagiya 2009 layttaa xiqisee, nu haggaazuwaa loyttidi polanaadan oottiis. (Oos. 20:24, NW) Aadhida haggaazo layttan Yihooway nu baaxiyaa keehippe anjjidoogee sirissenna. Yihoowa sunttay bonchettanaadaaninne sabettanaadan alame yuushuwan markkattiyo oosoy gita ogiyan oosettiis. Ooratta xoqqa qooday 7,313,173 gidido aassiyaageeti, ubba asau sabbakanaunne galla galla banttana gakkiya daro metuwaappe kiyanau koyiya, ashkketa tamaarissanau baaxetidosona. Kiristtoosa Hayquwaa Hassayiyo Baalan 18,168,323 asay beettidoogee, ha iita siraatay xayanaappe kase Yihoowa sunttan xeegettanau koyiya miilooniyan qoodettiya hara asay yaanaagaa bessees.
Yihooway paqqadido wodiyan, ubba ogeta goꞌettiyoogan, nu haggaazo moottan deꞌiya asau gattanau ubbatoo Kawotettaa mishiraachuwaa mishettidi sabbakana. (Maa. 24:14; Mar. 13:10) Sooppe soo biidi gidin, ogiyan, dabddaabbiyan, silkkiyan woykko haggaazuwau kiyennan markkattiyoogan, nuuni danddayido keena ubban daro asau Yihoowa sunttaanne a halchuwaa erissanau baaxetiyaageeta gidoos.
Yihooway ba sunttaa geeshshanau mata wode tangguwaa ekkana giidi ammananaadan oottiya daro gaasoy deꞌees. (Hiz. 36:23) He sunttaa mooriya ubbay xayiyo wodee eesuwan gakkiiddi deꞌees. Yihoowa sunttay erettanaadan oottidanne i ubbaa haariyaagaa gidiyoogaa kaafida, Yihoowayyo ammanettida ashkkaratu ubbau he wodee ayba boncho gallassa gidanee!
Yihooway ba asaa siiquwan naagiyoogee, “Naagi Uttite!” yaagiya 2009n alamiyan darosan shiiqido, Awuraajjaa SHiiquwaaninne Daro Biittaappe Yiida Asay SHiiqiyo Awuraajjaa SHiiquwan keehippe qoncciis. He shiiqoti Yihoowa gallassaa naagi uttiyoogee koshshiyoogaa awudeegaappenne aaruwan akeekanaadan nuna denttettiya, tiꞌokiraase taarikiyan xoqqu oottidi xeelliyo shiiqo.—Mar 13:37; 1 Tas. 5:1, 2, 4.
Tumakka, Yihooway nuussi loꞌꞌo; i nu wozanay ufayssan kumanaadan oottiis. I nuna aaca qooruwan allaxxisseesinne woppu giida haattaakko laaggees.—Maz. 23:1, 2; 100:2, 5.
Yiya aginatun intte ubbatoo Yihoowayyo haggaaziyo wode, Yihooway inttena aggennan anjjanaagaa ammanettite!
Alame yuushuwan deꞌiya nu ishatuyyo Kiristtaane siiqoy gakko;
Intte ishantta,
Yihoowa Markkata Bollaara Heemmiyaagaa