Goshshan Deꞌiya Kattay Cahaa Bessiis
1. Keehippe koshshiya ayba oosoy oosettiiddi deꞌii?
1 Yesuusi Samaare biittaa maccaaseessi sabbaki simmidi, erissiyo ashkkaratuyyo, “Goshshaa loitti xeellite; kattai cahaa bessiis” yaagiis. (Yoh. 4:35, 36) Ayyaanaaban cakkiyo oosoy oosettiiddi deꞌees; alame yuushuwan oosettiya he oosuwaa Yesuusi kasetidi yootiis. Yesuusi saluwan, bau imettida aawatettan he cahaa oosuwaa loytti maaddiiddi deꞌees. (Maa. 28:19, 20) Ha oosoy kuuyettana haniyo wodiyan, eesuwan keehippe oosettanaagaa bessiyay aybee?
2. Cahaa oosoy alame yuushuwan eesuwan keehippe oosettiiddi deꞌiyoogaa bessiyaabay aybee?
2 Alame Yuusho Cahaa: Haggaazo laytta 2009n, aassiyaageetu qooday alame yuushuwan xeetaappe 3.2 kushiyaa gujjiis. Sabbakiyo oosoy digettido biittatun xeetaappe 14 kushiyaa gujjiis. Aginan aginan iripportte oottido Geeshsha Maxaafaa xinaatetu qooday 7,619,000ppe bolla; hegee aassiyaageetu xoqqa qoodaappe dariyaagaa gidishin, zillaytti iripportte oottido xinaatetu qoodaappe bagga miilooniyaa gidiyaagaa darees. Oosoy daro heeratun eesuwan aakkiiddi deꞌiyo gishshau, daroti Giiliyaaden loohida misoonaaweti bantta biitti baanaadan oychoosona. Daro biittatun kare biittaa qaalan haggaaziyo hanotay loꞌꞌo ayfiyaa ayfiiddi deꞌees. Cahaa oosoy kuuyettana haniyo wodiyan, he oosuwaa Yihooway eesoyiiddi deꞌiyoogee qoncce. (Isi. 60:22) Intte haggaazo moottan deꞌiya ‘goshshaa’ bessiyaagaadan xeelleetii?
3. Issoti issoti bantta moottan oosettiya cahaa oosuwaa xeelliyaagan woygidi qoppana danddayiyoonaa?
3 Intte Heera Cahaa: Issi uri, “Nu haggaazo moottay darin ayfenna mootta” gaana danddayees. Issi issi haggaazo moottay hara moottaadan darin ayfennaagee woykko kaseegaadan ayfennaagee tuma. Issi issi Yihoowa Markkati cahaa oosoy he heeratun kaseti oosettiichiis gi qoppidi, haꞌꞌi attida poshiluwaa qoriyoobadan qoppana danddayoosona. SHin hegee tumee?
4. Nu haggaazuwaa xeelliyaagan bessiya ayba xeelaa oyqqana koshshii, aybissi?
4 Cahaa wodee, doomettaappe biidi wurssettaa gakkanaashin minnidi oottiyo wode. Hegee eesoti oottiyooba gidiyoogaa Yesuusi, “Kattai daro; shin cakkiya asai guutta. Simmi kattaa Godai kattaa cakkanau oosanchcha yeddana mala, a woossite” giido qaalaappe akeekite. (Maa. 9:37, 38) Kattaa Goday, Yihooway kattay awude, qassi awan ayfanaakko hanotaa injjeyees. (Yoh. 6:44; 1 Qor. 3:6-8) Nuussi imettida oosoy aybee? Geeshsha Maxaafay, “Maallado guuran gidinkka omarssan, ne zerettaa zeriyoogaa aggoppa” yaagidi zaarees. (Era. 11:4-6) Cahaa oosoy kuuyettana matido wodiyan nuuni zeriyoogaa aggana bessenna!
5. Ayfennaba milatiya haggaazo moottan, nuuni aggennan mishettidi oottana koshshiyoy aybissee?
5 Cakkiyoogaa Aggoppite: Nu haggaazo moottay zaaretti zaarettidi oosettidabanne asaykka siyennaba milatikkokka, mishettidi eesuwan oottana bessiyo loꞌꞌo gaasoy deꞌees. (2 Xim. 4:2) Alamiyan qoppennan hanettiyaabati asay ba qofaa laammanaadaaninne sinttanaabaa loyttidi qoppanaadan oottoosona. Yelagati gasttiiddi biyo wode, garssa sarotettaanne woppaa demmanau koyana danddayoosona. Nuuni aggennan oottiyoogee harati siyanaadan denttettana danddayees. Ee, kase siyennan ixxidaageeti guyyeppe siyanau koyana danddayoosona. Nuuni yootiyo kiitaa eriiddi ixxiyaageetikka seera siyana bessees.—Hiz. 2:4, 5; 3:19.
6. Nu haggaazo moottay waayissiyaagaa gidikko, aggennan mishettidi oottanau aybi maaddana danddayii?
6 Nu haggaazo moottay waayissiyaagaa gidikko, aggennan mishetti oottanau aybi maaddii? Sooppe soo haggaaziyoogaa bolli, zalꞌꞌe heeratuuninne silkkiyan markkaatiyoogaa mala hara ogetunkka haggaazana danddayoos. Woy asaa kase haasayissi erenna dumma dumma ogiyan haasayaa doommana danddayoos. Omarssan woykko asay son beettiyo hara wodetun haggaazanau nu hanotaa giigissana danddayoos. Mishiraachuwaa loytti aassanau geella hara qaalaa tamaaranau koyana danddayoos. Kumetta wode aqinye gidiyoogan nu haggaazuwaa aassana danddayoos. Woy cahaa oosuwan shaahettiyaageeti guutta gidido heeri baana danddayoos. Cahaa oosuwau bessiya xeelay nuussi deꞌikko, ha keehippe koshshiya oosuwan nuussi danddayettida keena ubbaa oottanau baaxetana danddayoos.
7. SHiishshiyo oosuwaa nuuni awude gakkanaashin aggennan oottana koshshii?
7 Goshshanchati kattaa shiishshiyoy guutta wode giddoona; yaatiyo gishshau, oosoy wurana gakkanaashin loddan oottokkona. Ayyaanaaban oottiyo cahaa oosoykka hegaadan eesuwan oosettana koshshees. SHiishshiyo oosuwaa nuuni awude gakkanaashin oottana koshshii? “Wurssettai” gakkanaashin ‘wurssetta wodetu’ ubban oottana koshshees. (Maa. 24:14; 28:20) Yihoowayyo waanna Oosanchay oottidoogaadan, nuuyyo imettida oosuwaa polanau koyoos. (Yoh. 4:34; 17:4) Yaatiyo gishshau, wurssettay gakkanaashin nu haggaazuwaa mishettidi, ufayssaaninne loꞌꞌo xeelaa oyqqidi aggennan oottiyaageeta gidoos. (Maa. 24:13) Cahaa oosoy polettiichibeenna!
[Sinttaa 2n Deꞌiya qonccissuwaa]
Cahaa wodee, doomettaappe biidi wurssettaa gakkanaashin minnidi oottiyo wode