Woggaa Gallassi Haggaazana Danddayeetii?
1. PHauloosinne aara issippe oottiyaageeti Piliphisiyuusa kataman oottidobaappe ay tamaarana danddayiyoo?
1 He gallassay Piliphisiyuusa kataman deꞌiya daro Ayhudati shemppiyo Sambbata gallassa. PHauloosinne aara issippe oottiyaageeti misoonaawe oosuwau biiddi he kataman takkidosona. Eti he gallassikka bantta haggaazuwaappe shemppi ekkiyaakko ooninne eta borenna. SHin, Ayhudati katamaappe gaxan woossanau shiiqiyoogaa eti eroosona; yaatiyo gishshau, he injje wodiyaa etau sabbakanau goꞌettidosona. PHauloosinne aara issippe oottiyaageeti Lidiyaa siyido wodenne i son deꞌiya asa ubbay xammaqettido wode ay keena ufayttidonaashsha! (Oos. 16:13-15) Ha wodiyan daro asay Woggaa galla shemppiyo gishshau, he gallassi amarida saatiyaa etayyo sabbakanau aybissi goꞌettekketii?
2. Woggaa gallassi metootennan sabbakanau Yihoowa Markkati xoonido metoy aybee?
2 Woggaa Gallassi Sabbakanau Baaxetido Baaxiyaa: Woggaa gallassi amarida saatiyaa haggaazanaadan Yihoowa asay 1927n minttettuwaa demmidosona. Hegee asay eta sohuwaara ixxanaadan oottiis. Woggaa gallassi Sambbataa higgiyaa kanttido gishshau, sarotettaa moorido gishshaunne piqaadee baynnan bayzzido gishshau Amarkkan daroti qashettidosona. SHin Yihoowa Markkati sabbakiyoogaa aggibookkona. Eti 1930-1939 gakkanaassi deꞌiya wodiyan aassiyaageeti heeran deꞌiya gubaaꞌiyaappe issippe shiiqidi issi moottaa gattanau zamachan sabbakidosona. Issitoo sunttati aassiyaageeta oyqqido wode, diggana danddayennaagaa keena aassiyaageeti keehi daro. Nuuni Woggaa gallassi metootennan sabbakanaadan, he ishantti bantta goꞌꞌaa aggidoogaa tumuppe nashsheetii?
3. Woggaa gallassay haggaazanau loꞌꞌo gallassa gididoy aybissee?
3 Sabbakanau Keehi Injje Gallassa: Woggaa gallassi daro asay oosuwaa beꞌenna. Eti he gallassi darotoo allaxxoosona. Woosa keetti biya issoti issoti he gallassi Xoossaabaa haasayanau koyennan aggokkona. Nuuyyo shiiqoy Woggaa gallassi deꞌiyaaba gidikko, haggaazuwau haniya maayuwaa maayi uttido gishshau, shiiquwaappe kase woy shiiquwaappe simmin haggaazanau aybissi halchokkonii? Koshshiyaaba gidikko, guutta qumaa ekkidi baana danddayettees.
4. Nuuni Woggaa gallassi amarida saatiyaa haggaazikko, ayba ufayssaa demmiyoo?
4 Nuuni Woggaa gallassi amarida saatiyaa haggaaziyaaba gidikkonne, nuussi koshshiyaagaa keenaa shemppiyo wodiyaa demmoos. SHemppiyo wodekka geeshsha oosuwaa oottidoogan ufayttoos. (Lee. 19:23) Ubba Lidee mala asaa demmiyoogan ufayttana danddayoos!