Nu Maxeeteti Daro Asaa Ufayssiya Ogiyan Giigoosona
1. Ammanettida wozannaama ashkkaray kiitettida PHauloosa leemisuwaa kaalliyoy ayba ogiyaanee?
1 Kiitettida PHauloosi ‘ubba asay’ attanaadan mishiraachuwaa eta hanotaadan yootidoogaadan, ammanettida wozannaama ashkkaraykka dumma dumma hanotan deꞌidanne dumma dumma haymaanootee deꞌiyo asau mishiraachuwaa yootanau maxeeteta goꞌettees. (1 Qor. 9:22, 23) Wochiyo Keelaanne Beegottite! maxeeteta loytti goꞌettanau, ha maxeeteti giigido asaanne he asaa hanotaa nuuni akeekana koshshees.
2. Beegottite! maxeetee oona ufayssiya ogiyan giigidee?
2 Beegottite!: Kiitettida PHauloosi, “Ateena asatoo” giidoogeetu mala asay nabbabanaadan ha maxeetee giigiis. (Oos. 17:22) He asati Kiristtaane gidokkona; Geeshsha Maxaafaabaakka eriyoy he keena. Hegaadankka, Beegottite! maxeetee giigiyoy Geeshsha Maxaafaabaa guuttaa eriyaageetussa woy aybanne erennaageetussa. He asati Kiristtaanetu timirttiyaabaa aybanne erennaageeta, haymaanootiyan darin ammanettennaageeta, woy Geeshsha Maxaafay goꞌꞌiyoogaa erennaageeta gidana danddayoosona. Beegottite! maxeetee giigiyo waanna halchoy, a nabbabiyaageeti tumu Xoossay deꞌiyoogaa ammanaadan maaddanaassa. Qassikka ha maxeetiyaa halchoy a nabbabiyaageeti Geeshsha Maxaafaa ammananaadaaninne Yihoowa Markkati hara haymaanoote citatuppe dummatiyoogaa eti akeekanaadan maaddanaassa.
3. Naaꞌꞌu qommo Wochiyo Keelay ooni ooni nabbabanaadan qoppidi giigissidobee?
3 Wochiyo Keelaa: Asau immiyo Wochiyo Keelay, Xoossaanne Geeshsha Maxaafaa guuttaa bonchiya asay nabbabanaadan qoppidi giigissidoba. Eti Geeshsha Maxaafaa guuttaa eroosona; shin i tamaarissiyoobaa suure akeekokkona. Eti PHauloosi ‘Xoossaassi yayyiyaageeta’ giidoogeetu mala. (Oos. 13:14-16) Xannaꞌiyo Wochiyo Keelay waannatidi giigiyoy Yihoowa Markkatussa. PHauloosi ba dabddaabbiyaa nabbabiyaageeti Geeshshaa Maxaafaa eriyaageetanne tumaa suure eriyaageeta gidiyoogaa qoppidi xaafiis. (1 Qor. 1:1, 2) Hegaadan, xinaatiyau giigiya maxeetee shiiquwan nunaara shiiqiyaageetussinne Yihoowa Markkati goꞌettiyo qaalatanne qofaa eriyaageetussi xaafettees.
4. Nuuni haggaazuwan goꞌettiyo maxeeteta loytti erana koshshiyoy aybissee?
4 Nuuni maxeeteta issippe asau immiyaaba gidikkonne, asau immanau darotoo erissiyoy etappe issuwaa xalla. Yaatiyo gishshau, naaꞌꞌu maxeetetakka loytti eranau halchite. Yaatikko, intte demmiyo asaa ufayssiya huuphe yohuwaa goꞌettanau giigettidaageeta gidana danddayeeta.