Oyshaa Saaxiniyaa

◼ Asau Xuufiyaa Immanaadan Woy Immennaadan Oottiyaabay Aybee?

Keehi qoppana bessiyaabay izaawu koshsha. I wozanappe koyiyaaba gidikko, naaꞌꞌu maxeetiyaa, issi brooshuriyaa, issi maxaafaa, woy hara xuufiyaa immana danddayoos. Alame yuusho oosuwaa kaafanau ayyo miishshi guutta gidiyoogaa woy baynnaagaa akeekiyo wodekka xuufiyaa immiyoogee bessiyaaba. (Iyy. 34:19; Ajj. 22:17) Hara baggara, xuufiyaa nashshenna uraassi alꞌꞌo xuufeta immokko.—Maa. 7:6.

Keettaaway koyiyoogaa waati erana danddayiyoo? I nunaara haasayanau koyiyoogan hegaa erana danddayoos. Nuuni haasayiyo wode akeekan siyiyaaba, oychiyo wode zaariyaabanne ba qofaa yootiyaaba gidikko, i nunaara haasayanau koyiyoogaa bessees. Nuuni Geeshsha Maxaafaa nabbabiyo wode i kaalliyoogee, Xoossaa Qaalaa bonchiyoogaa bessees. Nuuni immiyo xuufiyaa i nabbabanaakkonne oychiyoogee darotoo maaddees. Aassiyaageeti izaawu koyiya woy koyennaakko eranau akeekancha gidana koshshees. Leemisuwau, ogiyan haggaaziyo wode, ogiyaara aadhiya asa ubbau maxeetiyaa, brooshuriyaa woy maxaafaa coꞌꞌu giidi immiyoogee bessiyaaba gidenna. Izaawu koyiyoogaa woy koyennaagaa nuuni erana xayikko, shoobiyaa woraqataa woy trakttiyaa immiyoogee loꞌꞌo.

Hegaadankka, aassiya uri xuufe kifiliyaappe haggaazuwan goꞌettiyoogaa keena xuufiyaa qoppidi ekkana besseesippe attin, woqqu miishsha immanaakko qoppiyoogan gidana bessenna. Nuuni immiyo miishshay xuufiyaassi qanxxiyooba gidenna; shin alame yuusho sibikate oosuwaara gayttida ubbabaa kaafanaassa. Nuussi deꞌiya miishshay ay keena gidikkokka, nashshiyaageeta gidiyoogee palahido gishshataassa gidennan, pacay deꞌishinkka kehatettan Kawotettaara gayttida oosuwaa kaafanaadan denttettees. (Mar. 12:41-44; 2 Qor. 9:7) Hegee nuuni goꞌettiyo xuufe xallaa ekkanaadankka maaddees; yaatiyoogan asay xuufiyau immido miishshaa suure goꞌettoos.

[Sinttaa 2n deꞌiyaagaa qonccissuwaa]

Aassiyaageeti izaawu koyiya woy koyennaakko eranau akeekancha gidana koshshees