Akeekan Yimppa
1. Haggaazuwaara gayttidaagan 1 Qoronttoosa 9:26 ayba ogiyan goꞌettana danddayiyoo?
1 Kiitettida PHauloosi, “Taani qofi bainnan woxxiyaabaadan woxxikke. Carkko yimppiya asadankka yimppikke” yaagidi xaafiis. (1 Qor. 9:26) PHauloosi ayyaanaabaa hoolliyaa mintti kaalliyoogaabaa yootiis. SHin ha qaalay haggaazuwaara gayttidaagankka haniyaaba. Nuuni qoppido loꞌꞌobaa polanau akeekan ‘yimppanau,’ woy baaxetanau koyoos. Waatidi?
2. Nuuni awudee, qassi awan sabbakanaakko qoppiyoogaara gayttidaagan PHauloosanne koyro xeetu layttan deꞌida wonggelaawetu leemisuwaa ayba ogiyan kaallana danddayiyoo?
2 Asay Deꞌiyoosaa Ba: PHauloosinne koyro xeetu layttan deꞌida hara wonggelaaweti asay deꞌiyoosaa biidi sabbakidosona. (Oos. 5:42; 16:13; 17:17) Hegaa gishshau, nu haggaazo moottan daro asay son deꞌiyoy omarssaana gidikko, sooppe soo biidi haggaazanau hegee loꞌꞌo wode gidana danddayees. Asay maallado oosuwaa biyo wodenne omarssan oosuwaappe kiyo wode mannaahariyan daro asay deꞌii? Zalꞌꞌe heeran daro asaa demmana danddayiyoy awudee? He wodetun ogiyaappe ogiyan sabbakiyoogee keehippe loꞌꞌo gidana danddayees. Ogiyaappe ogiyan sabbakiyo wode darotoo issi uri barkka haasayissiyoogee loꞌꞌo. Heezzaa gididi issippe hemettiyoogee loꞌꞌo gidenna. Qassi issoy issuwaara nu allaalliyaa haasayiyoogaa aggidi, simmidi hara uraa haasayissiyo wode woyganaakko qoppiyoogee loꞌꞌo.
3. Haggaazo moottan sabbakiyo wode nuuni akeekan yimppana danddayiyoy ayba ogiyaanee?
3 Haggaazo Moottan Loytta Haggaaza: Haggaazo moottan sabbakiyoogaara gayttidaagankka nuuni akeekan yimppana koshshees. Leemisuwau, issisaa daro asaa efiyoogaappe shaakkidi efiyoogee loꞌꞌo; hegaadan oottiyoogee, haggaaziyo moottaa eta bessiiddinne maddabiiddi wodiyaa wurssenna mala maaddees. Hegaara issi mala hanotan, gaxare heeran haggaaziyo wode, nunaara biya asay keehippe daro gidana xayikko, haggaazo moottaa sohuwaara wurssana, qassi daro asaa haasayissana danddayoos. Nuuni haggaazo moottaa baanau daro wodiyaa wurssenna mala, nuussi matattiya moottaa ekkana danddayiyoo?
4. ‘Asaa oyqqiyoogan’ gooba gidanau nuna aybi maaddana danddayii?
4 Sabbakiyaageeta Yesuusi ‘asaa oyqqiyaageetun’ leemisiis. (Mar. 1:17) Moliyaa oyqqiya uraa halchoy gitiyaa yeggiyoogaa xalla gidennan, moliyaa oyqqiyoogaa. Hegaa gishshau, moliyaa oyqqiyoogan gooba gidida asati moliyaa awan, qassi awude oyqqanaakko eriyo gishshau yaa boosona; biidi sohuwaara gitiyaa yeggoosona. Eti bantta oosuwaa akeekan oottiyoogee tuma. Nuunikka hegaara issi mala hanotan, nu haggaazuwaa minnidi haggaaziyaageeta gidoos.—Ibr. 6:11.