Bollaara Heemmiyaagaappe Yiida Dabdaabbiyaa
Nunaara Issippe Oottiya Siiqo Yihoowa Markkatoo:
Ha wodiyan laappun miilooneppe dariya, Yihoowayyo ammanettidi oottiya intteyyo ha dabddaabbiyaa xaafiyoogan ufayttoos. Hara biittan deꞌiya intte mala Kiristtaaniyaara gayttiyo wode, intte he uraa keehippe siiqeeta. (Yoh. 13:34, 35) Intte dumma dumma biittan deꞌiya ishatunne michotu ammanuwaanne eti ammanettidi deꞌiyaageeta gidiyoogaa ufayssiya ogiyan qonccissiya, ha Laytta Maxaafaa nabbabiyo wode, dumma gidida he siiquwaabaa loyttidi akeekana.
Alame yuusho irpporttee intteppe dariya baggay So Asaa Goynuwaa prograamiyaa minttidi kaalliyoogaa qonccissees. Guutta naati deꞌiyoogeeti, naati he prograamiyaa ufayssan kaallanaadan daro hiillaa goꞌettideta. (Efi. 6:4) Aqo oyqqidaageeti issippe xannaꞌiyoogee eta aqo deꞌoy minnanaadan oottees. (Efi. 5:28-33) Xoossaa Qaalaa ciimma gidida hanotan xannaꞌiyo ha giigissuwan so asaynne banttarkka deꞌiyaageeti goꞌettiiddi deꞌoosona.—Yaa. 1:8, 9.
Meretay gattiyo daafan mata wode qohettida ubbatuyyo nuuni keehippe azzanoos. Hegaa mala meto wodiyan sohuwaara maaddida darota ha injjiyan galatoos. (Oos. 11:28-30; Gal. 6:9, 10) Hegaa bollikka, ubba gubaaꞌetun nu ishatuyyo asatettan koshshiyaabaa akeekidi eta maaddideta. Beni wode deꞌida Dorqqidan, inttekka ‘loꞌꞌobaa oottidetanne hiyyeesata maaddideta.’ (Oos. 9:36) Intte oottiyo darobaa Yihooway akeekidi intteyyo bessiyaabaa immanaagaa hassayite.—Maa. 6:3, 4.
Issi issi biittan, ‘higgiyaa shaariya geella daannati’ nu ishati bantta maataa goꞌettenna mala eta naaqqidosona. (Maz. 94:20-22) Hegaa mala yedetay gakkanaagaa Yesuusi kaseti yootidoogaa intte akeekiyoogan, xalan genccidetanne Yihoowa intteyyo qato oottideta. (Yoh. 15:19, 20) “Xoossai intteyyo immana giido inttenan de7iyaagau gaaso oichchiya ooyyoonne zaaro immanau ubba wode giigi” uttido gishshau, nuuni ubbatoo nu siiqo ishantta gidida intte gishshaa woossiyoogaa hassayite.—1 PHe. 3:13-15.
Seexaanay inttena mooranau shemppoy baynnan genebaa oottiyaaba gidikkokka, miilooniyan qoodettiya intte layttaappe layttan kandduwaaban geeshsha gididi deꞌiyo gishshau wozanappe galatoos. Alamee kandduwaaban keehippe mooretti moorettidi biyo ha wodiyan, intte “Godaaninne a gita wolqqan” minnidi deꞌeeta. (Efi. 6:10) ‘Xoossay intteyyo immiyo olaa maayo ubbaa’ maayido gishshau, ‘Xalahe halaqaa iita cimuwaa teqqanau’ danddayeeta. (Efi. 6:11, 12) Intte loꞌꞌo leemiso gidiyoogee Yihooway bana boriya Seexaanau suure zaaruwaa immanaadan oottiyoogaa hassayite!—Lee. 27:11.
Zillaytti 2011n Godaa Kahuwaa bonchanau 19,374,737 asay shiiqido gishshau nuuni keehippe ufayttida. Hegaa keena daro asay shiiqidoy, zillaytti Hosppuniyaa aginan kaafiya aqinye gidanaadan shoobbido wode intte loꞌꞌo zaaruwaa immido gishshataassa. Yihoowayyo ammanettida a Markkati issippetettan yootiyoobaa cenggurssaa saꞌa ubban deꞌiya miilooniyan qoodettiya asay siyiis! (Roo. 10:18) Intte he aginan kaafiya aqinye gididi haggaazida 2,657,377 ishata gidin woy hara ogiyan intte haggaazuwaa xoqqu oottanau baaxetida ishata gidin, eeno giidi azazettido gishshaunne wozanappe oottido gishshau, nuuni keehippe ufayttida.—Maz. 110:3; Qol. 3:23.
Zillaytti 263,131 asati bantta huuphiyaa Yihoowayyo geppidi xammaqettidosona. Hegaa gishshaunne harata, “‘Haaya’ . . . Qassi hagaa siyiya ooninne, ‘Haaya’ yaago. Saamettida asi ooninne haa yo. De7o haattaa koyiya asi ooninne coo ekko” yaagidi nunaara issippe shoobbiyo gishshau inttena ubbaa galatoos. (Ajj. 22:17) Ubba qassi Xoossaa Kawotettaabaa 2011n awuraajjaa shiiquwan loytti akeekido gishshau, kaseegaappe aaruwan, “Xoossaa Kawotettay Yo!” yaagoos. Yesuusi, “Taani matan yaana” giidi yootido gishshau, nuuni kiitettida Yohaannisaagaadan wozanappe “Amin77i. Godaa Yesuusa, neeni haaya” yaagoos.—Ajj. 22:20.
He ufayssiya wodiyaa intte naagiyo wode, Yihoowa “oosuwaaninne tumatettan” siiqiya nu siiqo ishatanne michota, inttena ubbaa nuuni wozanappe siiqiyoogaa hassayite!—1 Yoh. 3:18.
Intte ishantta,
Yihoowa Markkata Bollaara Heemmiyaagaa