Denttettiya Ogiyan Asaa Haasayissite
1. Beni Kiristtaaneti dumma dumma ogiyan sabbakido hanotaappe ay tamaarana danddayiyoo?
1 Beni Kiristtaaneti dumma dumma wogaynne haymaanootee deꞌiyo asau mishiraachuwaa sabbakidosona. (Qol. 1:23) Sabbakiyo mishiraachoy Xoossaa Kawotettaabaa gidikkonne, ezggiyaageetu hanotaadan hegaa dumma dumma ogiyan yootana koshshees. Leemisuwau, PHeexiroosi Xoossaa Qaalaa wozanappe bonchiya Ayhudatuyyo haasayiyo wode, hananabaa yootiya Yuuꞌeeli giidobaa etau yootiyoogan haasayaa doommiis. (Oos. 2:14-17) Hara baggaara qassi, Oosuwaa 17:22-31n qonccidaagaadan, PHauloosi Giriike asau yootido ogiyaa akeeka. Ha wodiyan, issi issi heeran deꞌiya asay Geeshsha Maxaafaa bonchees; hegaa gishshau sooppe soo biyo wode, asau Geeshsha Maxaafaappe mammottennan yootana danddayoos. Gidoppe attin, Geeshsha Maxaafaabaa woy haymaanootiyaabaa eranau koyenna uraara, woy Kiristtaane giyo haymaanootiyaa kaallenna uraara tobbiyo wode keehi akeekancha gidana koshshees.
2. Geeshsha Maxaafaabaa eranau koyiyaageetussi gidin, koyennaageetussi xuufiyaa waati immana danddayiyoo?
2 Asau Immiyo Xuufiyaa Loytta Goꞌetta: Ha haggaazo layttan asau immiyo xuufee naaꞌꞌu aginan issitoo laamettana; qassi darotoo immiyo xuufeti maxeeteta, trakttetanne brooshureta. Geella nu haggaazo moottan deꞌiya asay Geeshsha Maxaafaabaa eranau koyennabaa gidikkokka, eta qofaa denttettiyaabaa nu xuufetuppe odana danddayoos. Keettaawaara gayttido koyro gallassi Geeshsha Maxaafaappe nabbabennan woy appe xiqiseta yootennan aggana danddayoos; shin keettaaway koyiyaabaa gidikko, Medhidaagaanne A Qaalaa ammananaadan maaddiyaabaa au yootanau zaarettidi oychanau baana danddayoos. Asay Geeshsha Maxaafaabaa eranau koyiyo moottan sabbakiyo wode qassi, xuufe goꞌettananne he xuufiyaa qonccissiyaabaa yootana danddayoos. He aginan asau immiyo xuufee augaanne gido, Geeshsha Maxaafay Tamaarissiyoy giya maxaafaanne Xoossay Yootiyoobaa Siya, woy Xoossay Yootiyoobaa Siya Yaatada Merinau Deꞌa yaagiya brooshureta ay wodenne asau immana danddayoos. Waannabay, asay Yihoowabaa eranau denttettiya ogiyan haasayissiyoogaa.
3. Nu haggaazo moottan deꞌiya asaa wozanay biittaa mala gididoy ayba ogiyaanee?
3 Biittaa Giigissa: Asaa wozanay daroban biittaara issi mala. (Luq. 8:15) Geeshsha Maxaafaa tumay issi issi biittaa qommuwan leemisettida wozanan xaphuwaa yeddidi diccanaappe kase, he wozanaa loytti giigissana koshshees. Koyro xeetu layttan mishiraachchuwaa yootiyaageeti ubba qommo asaukka tumaa loytti yootidosona; qassi hegee eta ufayssiyaaba gidiis. (Oos. 13:48, 52) Nuunikka asaa haasayissiyo ogiyaa kaseegaappe loyttiyoogan hegaadan ufayttana danddayoos.