‘Asa Ubbaara Sarotettan Deꞌite’
1. Eta soo biido gishshau hanqqettiya asaara gayttiyo wode, oosuwan peeshshana koshshiyo Geeshsha Maxaafaa zoree awugee?
1 Yihoowa asay sarotettaa dosiya asa; qassi nu haggaazuwankka sarotettaa yootoos. (Isi. 52:7) SHin issitoo issitoo nuuni eta soo biido gishshau hanqqettiya asaara gayttoos. Hegaa mala wodiyan nuuni asaara sarotettan deꞌanaadan aybi maaddii?—Roo. 12:18.
2. Nuuni akeekancha gidiyoogee koshshiyaaba gididoy aybissee?
2 Akeekancha Gidite: Issoti issoti tumaa eqettidi hanqqettiyaaba gidikkokka, harati hara gaasuwan hanqqettana danddayoosona. Hegee, geella keettaawau injjetenna wodiyan biido gishshataassa gidana danddayees. Woy i ba buzo allaalliyaara gayttidaagan hanqqettana danddayees. A hanqqetissidabay nu yootiyo mishiraachuwaa gidikkokka, i hegaadan hanidoy balaana gidana danddayiyoogaa hassayana koshshees. (2 Qor. 4:4) Akeekancha gidiyoogee nuuni woppu gaanaadan, qassi i hanqqettidoy nu bollaana gidennaagaa akeekanaadan maaddees.—Lee. 19:11.
3. Nuuni keettaawaa ayba ogiyan bonchana danddayiyoo?
3 Bonchiyaageeta Gidite: Haggaazo moottan demmiyo daro asati bantta ammanuwaa mintti oyqqidaageeta. (2 Qor. 10:4) Nuuni yootiyoobaa siyiyoogee woy aggiyoogee eta maata. Nuuni keettaawaa ammanuwaa karana woy appe erancha milatana koshshenna. Nuuni aggidi baanaadan i yootiyaaba gidikko, bonchuwan aggidi baana koshshees.
4. Kehabaa haasayiyoogaa giyoogee woygiyoogee?
4 Kehabaa Haasayite: Eti nu bolli iita qaalaa haasayiyaaba gidikkokka, nuuni siyanau ufayssiya kehabaa haasayana koshshees. (Qol. 4:6; 1 PHe. 2:23) Etaara palamettiyoogaappe maayettanaadan oottiyaabaa haasayanau baaxetana koshshees. Keettaaway eqettanaadan oottidabi aybakko kehatettan a oychana danddayoos. SHin i haa hanqqettenna mala, issi issitoo haasayennan aggiyoogee loꞌꞌo.—Lee. 9:7; 17:14.
5. Haggaaziyo wode asaara sarotettan deꞌanau baaxetiyoogee ay demissii?
5 Nuuni asaara sarotettan deꞌiyaaba gidikko, keettaaway nubaa hassayidi, haroode hara uri markkattiyo wode siyana danddayees. (Roo. 12:20, 21) I keehi eqettiyaaba milatikkokka, issi wode nu isha gidana danddayees. (Gal. 1:13, 14) I tumaa siyanau mule koyennaba gidikkokka, nu huuphiyaa naagidi asaara sarotettan deꞌanau baaxetiyo wode, Yihoowa bonchissoos; qassi nu timirttee ufayssiyaagaa gidanaadan oottoos.—2 Qor. 6:3.