‘Loytti Markkattite’
1. Kiitettida PHauloosi haggaazuwan loꞌꞌo leemiso gidiyaabaa ay oottidee?
1 “Wonggeliyaa mishiraachchuwaa yootiyaagee oottiyo oosuwaa . . . pola.” (2 Xim. 4:5) Kiitettida PHauloosi zoriya wozanay a qumꞌꞌennan Ximootiyoosa hegaadan giidi zoriis. PHauloosi 47-56 M.L. gakkanaashin deꞌiya wodetun heezuttoo biidi miisonaawe oosuwaa oottiis. PHauloosi mishiraachuwaa loytti markkattidoogee Oosuwaa maaxaafan darosan qoncciis. (Oos. 23:11; 28:23) Nuuni ha wodiyan hegaadan waati oottana danddayiyoo?
2. Nuuni sooppe soo biidi haggaaziyo wode loyttidi markkatana danddayiyoy ayba ogiyaanee?
2 Sooppe Soo: Mishiraachuwaa siyi erenna asaa demmanau nuuni gallaassaa giddon dumma dumma saatiyan biyoogee koshshana danddayees. Keettaaway omarssan woy Qeeraanne Wogaa gallassi son deꞌana danddayees. Ubba keettaa asaa, qassi son demmibeennaageeta haasayissanau nuuni zaaretti zaaretti baana koshshees. Intte yaatidikka oonanne demmana xayikko shin? Dabddaabbiyaa xaafiyoogan woy silkkiyaa dawaliyoogan loꞌꞌo ayfe demmana danddayeeta.
3. Dabaabaaninne haggaazuwau kiyennan markkattanau neeyyo injjetiya hanotay awugee?
3 Dabaabaaninne Haggaazuwau Kiyennan: Yihoowa ashkkarati ha wodiyan siyanau koyiya asa ubbau ‘aadhida eratettaa’ yootoosona. Eti issi issitoo “ogiyan” woy “dere gutaran” yootoosona. (Lee. 1:20, 21) Galla galla oosuwaa oottiyo wode nuuni haratuyyo markkattanau qoppiyoo? Ubbatoo qaalaa mintti yootoos gaana danddayiyoo? (Oos. 18:5) Hegaadaana gidikko, ‘loytti markkattanaadan’ nuuyyo imettida oosuwaa poliiddi deꞌoos giyoogaa.—Oos. 10:42; 17:17; 20:20, 21, 24.
4. Woosaynne wotti dentti qoppiyoogee nuuni loyttidi sabbakanaadan waatidi maaddii?
4 SHin nuuni azalla woy dungguuxa gidiyo gishshau issi isstoo markkattennan aggana danddayoos. Yihooway nu abbiyaa pacaa akeekees. (Maz. 103:14) Gidikkokka, nuuni hegaa mala injjiyaa demmiyo wode, xalan yootanau maaddana mala akko woossana danddayoos. (Oos. 4:29, 31) Qassi buzo xinaatiyaa xannaꞌiyo wodenne Xoossaa Qaalaa wotti dentti qoppiyo wode mishiraachuwaa goꞌꞌaa loytti akeekana danddayoos. (Phil. 3:8) Hegee mishettidi sabbakanaadan nuna denttettana!
5. Nuuni Yuuꞌeela hiraagay yoottiyoogaadan oottana danddayiyoy ayba ogiyaanee?
5 Gitanne daroppe yashshiya Yihoowa gallassay yaanaappe kase, Xoossaa asay ‘sinttau hemettanaageenne’ teqqiyaabi baynnan sabbakanaagee Yuuꞌeela hiraagan kasettidi odettiis. (Yuu. 1:14; 2:2, 7-9) Zaarettidi oosettenna ha markkattiyo oosuwaa nuuyyo deꞌiya wolqqa ubban oottiyaageeta gidoos!