Hananabaa Yootidaageetu Leemisuwaa Kaallite—Hooseꞌa
1. Intte inttena woygiya oyshaa oychana danddayeetii?
1 Yihoowa kehatettaanne a maarotaa wotti denttidi qoppiyo wode intte, ‘Taani au ay qanxxana danddayiyaanaa?’ giidi qoppennan aggekketa. (Maz. 103:2-4; 116:12) Hooseꞌi Yihooway azazidobay i ba goꞌꞌaa agganaadan oottiyaaba gidikkokka, eeno giidi poliis. Nuuni Hooseꞌa leemisuwaa waati kaallana danddayiyoo?
2. Aggennan sabbakiyoogan Hooseꞌa loꞌꞌo leemisuwaa nuuni kaallana danddayiyoy ayba ogiyaanee?
2 Injjetenna Wodiyankka Sabbakite: Hooseꞌi hananabaa yootidoy tumu goynuwaa aggida tammu Israaꞌeela zaretu kawotettan deꞌiya asaassa. Yoꞌaasha naꞌay, Kawuwaa Iyorbbaami Yihoowa sinttan iitabaa oottiis; i Nabaaxa naꞌay Iyorbbaami doomissido maraa misiliyau asay goynniyoogaa aggennaadan oottiis. (2 Kaw. 14:23, 24) Appe simmidi kawotidaageetikka tammu zaretu kawotettay 740 K.K. xayana gakkanaashin ayyaanaaban mooretti mooretti baanaadan oottidosona. SHin eeqaa goynoy ubbasan deꞌiyaaba gidikkokka, Hooseꞌi ammanettidaagaa gididi 59 gidiya layttau hananabaa yootiis. Asay siyanau koyennaba woy eqettiyaaba gidikkokka, hegaadan nuunikka layttaappe layttan aggennan sabbakanau murttidoo?—2 Xim. 4:2.
3. Hooseꞌa deꞌoy Yihoowa maarotaa qonccissidoy ayba ogiyaanee?
3 Yihoowa Maarotaa Qooppite: Yihooway Hooseꞌi “shaaramuxa maccaasiyo” ekkanaadan azaziis. (Hoo. 1:2) A maccaasiyaa Goomera au attuma naꞌaa yelidaba gidikkokka, hegaappe simmada naaꞌꞌu naata hara asau yelidaba milatees. Hooseꞌi ba machiyo atto gaanau eeno giidoogee azazettenna Israaꞌeelati nagaraappe simmido wode Yihooway bessido gita maarotau leemiso. (Hoo. 3:1; Roo. 9:22-26) Nuuni ubba asau Yihoowa maarotaa erissanau nu koyiyoobaa agganau eeno giyoo?—1 Qor. 9:19-23.
4. Nuuni Yihoowassi giidi aggiyo issi issibati aybee?
4 Yihoowayyo oottiya issoti issoti kaseegaappe aaruwan haggaazanau daro miishshaa demissiya oosuwaa aggidosona. Harati qassi Xoossaa Kawotettaara gayttidabaa oottanau ekkennan woy gelennan woykko naata yelennan deꞌanau dooridosona. Hooseꞌa deꞌuwaa qoppiyo wode nuuni, ‘Taani i oottidobaa mule oottana danddayikke’ gaana danddayoos. SHin nuuni Yihoowa aaro kehatettaa kaseegaappe aaruwan nashshiyo wode, qassi a geeshsha ayyaanaa maaduwan ammanettiyo wode, Hooseꞌaagaadan, nuuni mule danddayettennabadan qoppiyo hanotan Yihooway nuna goꞌettana danddayees.—Maa. 19:26; Pili. 2:13.