Goynuwawu Goꞌettiyo Ooratta Mazamuriyaa!
1 Xiqimita 4, 2014n shiiqido Wochi Tawer Baybil end Trakt Soosayti of Penssilvaaniyaa laytta shiiquwan mazamuriyaa maxaafaa zaarettidi giigissanawu halchidoogee odettiis. Hegee keehi ufayssiyaaba! He shiiquwan deꞌiya ubbay goynuwaara gayttidaagan Kawotettaa mazamure xoqqu oottidi xeelliyooba gidiyoogaa akeekidosona.—Maz. 96:2.
2 Geella neeni, ‘Mazamuriyaa maxaafaa zaarettidi giigissiyoogee aybissi koshshidee?’ gaada qoppana danddayaasa. Hegawu daro gaasoy deꞌees. Koyruwan, nuuni Geeshsha Maxaafaa akeekiyo ogee kaseegaappe giigi giigi biyo gishshawu, nu mazamuriyan deꞌiya issi issi danttoykka giigana bessees . (Lee. 4:18) Issi issibaa giigissanaadan oottida hara gaasoy qassi hagaa: Haꞌꞌi goꞌettiyo mazamure maxaafan deꞌiya daro qaalaynne qofay beni Ooratta Alamiyaa Birshshettaappe ekettidaba. He danttotun deꞌiya qofay zaaretti giigissido Ooratta Alamiyaa Birshshettaara maayiyaagaa gidana koshshees. Ooratti eridobaara maayiya ogiyan danttota giigissanawu darobaa oottana koshshiyo gishshawu, mazamure maxaafan amarida ooratta mazamureta gujjanawu qofaa qachida.
3 Yaatin ha ooratta mazamureta goꞌettanawu mazamure maxaafay attamettana gakkanaashin naagana koshshii? CHii, koshshenna. Kaalliya amarida aginaa giddon ooratta mazamureti daroti jw.org Weyb sayttiyan kiyana; hegee keehi ufayssiyaaba. Ooratta mazamure kiyiyo wode, Haggaazo SHiiquwaa wurssettan a yexxana.
4 Ooratta Mazamureta Waati Meezetanee? Ooratta mazamuriyaa meezetiyoogee metiyaaba gidana danddayees. Gidikkokka, nuunikka mazamuraawiyaagaadan gubaaꞌe shiiquwan yexxana koyoosippe attin ‘coꞌꞌu gaana’ koshshenna. (Maz. 30:12) Ooratta mazamuriyaa meezetanawu kaallidi deꞌiyaagaadan oottana danddayaasa.
• Ooratta mazamuriyaa muuziqay piyanuwan giigidaagee nu Weyb sayttiyan kiyiyaagaa zaaretta zaarettada ezgga. Neeni muuziqaa zaaretta zaarettada ezggikko, hassayanawu metootakka.
• Danttota xannaꞌa; qassi hassayanawu mala.
• Muuziqaara issippe danttuwaa yexxa. Mazamuriyaa loytta eranaashin hegaadan ootta.
• Intte soo asay loytti yexxana gakkanaashin, So Asaa Goynuwaa wode ooratta mazamureta meezetite.
5 Amarida aginaappe guyyiyan Haggaazo SHiiquwaa wurssettan ooratta mazamuriyaa yexxiyo prograamee kiyiyo wode, gubaaꞌiyan deꞌiyaageeti issitoo piyaanuwan giigidaagaa siyana. Hegaappe guyyiyan, gubaaꞌiyan deꞌiyaageeti piyaanuwan giigida muuziqaa siyidi hara mazamuriyaa yexxiyoogaadan yexxana.
6 SHiiquwan yexxiyoogee, issippetettan Yihoowawu sabbiyoogan ufayttanaadan maaddees. Hegaa gishshawu, mazamuree yexettiyo wode denddidi yaa haa baana bessenna.
7 Geeshsha gidida nu mazamureta nashshiyoogaa bessiyo hara ogeekka deꞌees. Gita shiiqotun guurankka saateppe guyyiyankka prograamee doommanaappe kase amarida daqiiqawu muuziqaa ezggoos. Layttan naaꞌꞌutoo, alamiyan dumma dumma sohuwan deꞌiya, Xoossawu aqida ishatinne michoti nuuni goynuwaa wode goꞌettiyo ufayssiya mazamureta giigissanawu Niwu Yorkken deꞌiya Patersene bantta miishshan boosona. Gita shiiqotun nu sohuwan uttidi ufayssiya hanotan giigida he muuziqaa ezgganaadan liqambbaree shoobbiyo wode, uttidi ezggana koshshees. Yaatiyoogee nuuni hegaappe kaallidi tamaaranabaa loytti ezgganawu nu wozanaa giigissanaadan maaddees.—Ezra 7:10.
8 Mata wode laytta shiiquwaa shiiqida asay siyido mazamuretuppe issoy “Xoossaa Kawotettay Eqqiis—He Kawotettay Yo!” yaagiyaagaa. Ha mazamuree Xoossaa Kawotettay eqqido 100tta layttaa hassayanawu giigissidoba.
9 Tumukka, ooratta mazamuree nuuni Yihoowappe demmido ‘loꞌꞌoba.’ (Maa. 12:35a) Neeni he ooratta mazamureti giigido qaalaa eriyaaba gidikko, hegaa meezetanawunne wozanappe yexxanawu murtta; hegee nuuni Xoossawu bessiya sabaanne bonchuwaa immiyo oge!—Maz. 147:1.