KIRISTTAANETI DEꞌIYO DEꞌUWAA
Layttan Layttan SHiiqiyo Gita SHiiqotun Siiquwaa Bessana Danddayoos
Nuuni layttan layttan shiiqiyo gita shiiqotun keehi ufayttiyoy aybissee? Beni Israaꞌeelatuugaadan, ha wodiyan nu gita shiiqotun xeetan, ubba qassi shaꞌan qoodettiya nu mala Kiristtaanetuura Yihoowawu issippe goynnana danddayoos. Yihoowakko nuuni shiiqidi deꞌanaadan maaddiya ubba timirtteta dosoos. Nu laggetuuranne nu so asaara issippe aattiyo loꞌꞌo wodiyaa keehi xoqqu oottidi xeelloos. Hegaa gishshawu, nuuni heezzu gallassaa kumettaa shiiqana koyoos.
Nuuni issippe shiiqiyo wode, nuuni goꞌettana danddayiyoogaa xalla gidennan, haratussikka siiquwaa waati bessanaakko qoppana koshshees. (Gal 6:10; Ibr 10:24, 25) SHiiquwaa sohuwan nuussi koshshiya oydetu xallaa oyqqiyoogan, nu ishanttussinne nu michchonttussi qoppiyoogaa bessoos. (Pili 2:3, 4) Gita shiiqoti ooratta laggeta demmanawu keehi loꞌꞌo wode. SHiiquwaa prograamee doommanaappe kasenne wuri simmin, qassi laaxaa saatiyan, kase erenna issi uraara haasayanawu halchchana danddayoos. (2Qor 6:13) Geella nuuyyo merinawu lagge gidiya ura demmana danddayoos. Hegaappekka aaruwan, harati nuuni siiquwaa bessiyoogaa akeekiyo wode, nunaara issippe Yihoowayyo goynnanawu kuuyana danddayoosona.—Yoh 13:35.
‘SIIQOY MULE XAYENNA’! DARO BIITTAAPPE YIIDAAGEETI SHIIQIYO GITA SHIIQUWAA GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:
Daro biittaa ishantti issippe shiiqiyo 2019 shiiquwan kare biittaappe yiida ishanttussi harati siiquwaa waati bessidonaa?
Yihoowa asaa giddon deꞌiya issippetettaynne siiqoy keehi maalaaliyoy aybissee?
Bolla Gididi Heemmiyaagaa yarati siiquwaa macaratuppe awugeeta qonccissidonaa?
Nu gita shiiqotun qoncciya siiquwawu ne gishshaa ay oottana danddayay?
Jarmanenne Tohossa Kooriyaa ishanttussi issippetettay deꞌanaadan siiqoy waati maaddidee?
Nuuni ay oottanawu murttana koshshii?