Eray?

Beni wode asay layttatanne aginata waati erii?

HIDOOTAA BIITTAN deꞌiya Ibraawetuyyo layttay doommiyoy goyiyoonne zeriyo wodiyaana; eti yaatiyoy haꞌꞌi Masqqalaa/Xiqimitaa geetettiya aginaana.

Asay aginaa giddon deꞌiya gallassata eranawu aginay xeeriyoonne goobaniyo wodiyaa qoodees; hegee 29 gallassa woy 30 gallassa. Eti wodeta goꞌettiyoogan layttay ay keenakko eroosona. Qassi, issi issitoo eti kaalliya layttay doommanaappe kase, hara gallassata woy hara aginaa gujjoosona. Yaatiyoogee, kattaa zeriyoonne shiishshiyo wodiyaara kalanddaree issi mala gidanaadan oottees.

Gidoppe attin, Israaꞌeelatuyyo layttawu koyro aginay Abiiba woy Niisaana gidanaadan Xoossay Muuse wode azaziis. (Kes. 12:2; 13:4) Hegee Laappune/Hosppune agina. Niisaana aginan Israaꞌeelati issi baalaa bonchchana, qassi he baalan eti koyro gakkida banggaa ayfiyaappe amaridaagaa Yihoowawu yarshshana koshshees.—Kes. 23:15, 16.

Kalanddariyan hara aginaa gujjiyo wode hegaa eriyoogee metennaagaa issi eranchchay yootiis. I hagaadan giis: “Paasikay Niisaana (Niisaana 14) aginay goobaniyo wode bonchchettana bessees; hegee ubbatoo peꞌiyoy badhdheesan gallassaynne qammay issi lagge gidiyo wodee aadhdhi simmiina. . . . Yaatiyo gishshawu, Paasikay layttaa wurssettan he gallassaappe kasetidi peꞌiyoogee erettikko, Ayhudati Niisaanaappe kase issi aginaa gujjoosona.”

Yihoowa Markkati Godaa Kahuwaa bonchchiyo gallassaa kuuyiyo wode he hiillaa goꞌettoosona; he gallassay badhdheesan Ibraawetu kalanddariyan Niisaana 14n peꞌees. Kumetta saꞌan deꞌiya gubaaꞌetussi he gallassay kasetidi odettees.

SHin issi aginay wuriyo wodiyaanne ooratta aginay doommiyo wodiyaa Ibraaweti waati eriyoonaa? Ha wodiyan neeni attamettida kalanddariyan woy elektiroonike miishshan beꞌana danddayaasa. Gidoppe attin, yaatiyoogee beni wode metiyaaba.

Nohe wode, aginan 30 gallassay deꞌiyaabadan qofettees. (Doo. 7:11, 24; 8:3, 4) Guyyeppe, Ibraawetu kalanddariyan issi aginay 30 gallassa xalla gidenna. Ibraawetu kalanddariyan issi aginay doommiyoy aginay xeeriyo wodiyaana. Hegee kasetiya aginay doommoosappe 29 woy 30 gallassay aadhdhi simmiina.

Issi wode, Daawitinne Yonaataani ooratta aginay doommiyoogaa xeelliyaagan haasayiiddi hagaadan giidosona: ‘Wonttoy aginay xeeriyo gallassa.’ (1 Sam. 20:5, 18) Hegaa gishshawu, eta wode aginata kasetidi qoodi wottiyaaba milatees. SHin, Israaꞌeelati ooratta aginay doommiyo wodiyaa waati eriyoonaa? Mishiina giyo maxaafay amarida qofaa yootees; hegan Ayhudatu wogay xaafettiis. Ayhudati Baabiloone omoodduwaappe simmi makkin, hegaabaa kuuyiyay Sanhedirine shilootaa (Ayhuda xoqqa pirdda keettaa) gidiyoogaa Mishiina giyo maxaafay qonccissees. Laappun aginatun, he shilootay aginawu 30tta gallassan shiiqees. Kaalliya aginay awude doommiyaakko kuuyiyo maatay he asatuyyo deꞌees. Hegaa eti waati kuuyiyoonaa?

Yerusalaame yuushuwan xoqqasan deꞌiya asay qammi saluwan aginay biron xeeriyo wode beꞌees. Eti sohuwaara Sanhedirine shilootawu yootoosona. Aginay xeeridoogaa bessiya naqaashaa demmidabadan he shilootaa asawu siyettiyo wode, eti ooratta aginay doommidoogaa awaajjoosona. SHaaray woy gubbanay wochchiyaageeti aginay xeeridoogaa beꞌennaadan teqqiyaaba gidikko shin? He wode xeeri uttida aginaayyo 30 gallassay deꞌiyaabadan qofettees, hegaappe simmin kaalliya ooratta aginay doommees.

Eti ooratta aginay doommidoogaa erissanawu Yerusalaame matan deꞌiya Dabira Zayte deriyaa xeeran tamaa eettoosona. He oduwaa gattanawu Israaꞌeela biittan hara xoqqa sohotu ubbankka tamaa eettoosona. Hegaappe simmin deꞌiya wodetun, kiitaa yootiyaageeta kiittoosona. Yaatiyo gishshawu Yerusalaamen, Israaꞌeela biitta ubbaaninne harasan deꞌiya Ayhudati ooratta aginay doommidoogaa eroosona. Hegaappe guyyiyan, keerido gallassatun ubba asay baalata bonchchana danddayees.

Ibraawetu aginati, baalatinne wodeti waani gayttiyaakko akeekanaadan hagaara gayttida sanxxarazhee nena maaddana danddayees.