Eray?
Beni Baabiloonen beetida xuubetinne eti merettido ogee Geeshsha Maxaafay tuma gidiyoogaa waati bessiyoonaa?
BENI Baabiloone katamaa gimbbanawu goꞌettido xuubetuppe daro miiloone gidiyaagaa biittaa bookki xannaꞌiyaageeti demmidosona. Biittaa bookki xannaꞌiya Roobert Koldevi yootidoogaadan, hegaa mala xuubeti “loꞌꞌo urqqay deꞌiyoonne xuugganawu goꞌettiyo daro mittay deꞌiyo katamaappe kareera” merettoosona.
Baabiloone kawotettaa sunttati he xuuggiyo sohuwaa keehi azzanttiyaabaa oottanawukka goꞌettiyoogaa bessiyaabaa biittaa bookki xannaꞌiyaageeti demmidosona. Torontto Yuniversttiyaa profeeseree Pool-Alan Booliyu hagaadan giis: “Kawoy bawu azazettibeennaageeti woy Baabiloone xoossata bonchchibeennaageeti xuugiyo sohuwan olettanaadaaninne yan xuugettanaadan azaziyoogaa Baabiloone xuufee yootees.” Kawuwaa Naabukadanaxoora wodiyaappe ekettida issi xuufee hagaadan gees: “Eta xayssite, xuuggite, eettite, . . . taman olite . . . eta cuway pude kiyanaadan oottite, eti hayqqanaadan taman eta yeggite.”
Hagee Geeshsha Maxaafaa nabbabiyaageti Daaneela shemppo 3n odettidabaa hassayanaadan oottees. Baabiloone katamaappe kareera deꞌiya Duura dembban Kawuwaa Naabukadanaxoori gita misiliyaa worqqaappe medhdhidoogaa hegee yootees. Sidiraaqa, Misaaqanne Abddanaaga geetettiya heezzu Ibraawe yelagati he misiliyaayyo gufannidi goynnennan ixxido wode, Naabukadanaxoori eta bolli hanqquwaa suullidi itoone “tamai kase eexxiyoogaappe laappun kushiyaa aadhdhidi” eexxanaadaaninne ha heezzu attumaageeta “eexxiya itoone tamaa giddo olanaadan” azaziis. Wolqqaama kiitanchchay hayquwaappe eta ashshiis.—Dane. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Naabukadanaxoora sunttay woocetti xaafettido xuubiyaa
Baabiloonen beettida xuubetikka Geeshsha Maxaafay tuma gidiyoogaa bessoosona. He xuubetuppe darotun kawuwaa sabbiya qofay deꞌees. Hegeetuppe issoy hagaadan gees: “Baabiloone Kawuwaa, Naabukadanaxoora . . . Kawo keettaa, taani Gita Kawoy keexxidoogaa . . . Ta zerettati merinawu haariyaageeta gidona.” Hagee Daaneela 4:30n Naabukadanaxoori otoruwan yootido qofaa mala: “Hagee ta kawo keettai an de7ana mala, taani ta gita wolqqan, ta gitatettaa bonchchuwaassi gimbbissido Baabiloone katamaa gitaa gidennee?”