Heather Broccard-Bell/iStock via Getty Images
HAGAA GIIGISSIDAY DEꞌII?
Diyabolikal Ayrenklad Giyo Zinzzuwa Koohuwa
Diyabolikal Ayrenklad (Fileyodis diyabolikes) giyo zinzzoy Huuphessa Amarkkan arggo baggan deꞌees. Pilggiyageeti qonccissidoogaadan, ha zinzzoy ba deexuwappe 39,000 kushe gidiyagaa dariya deexuwa eqettana danddayees, qassi kaamee A bollaara biikkokka hayqqennan attana danddayees. Ha zinzzoy hagaa mala hanotan waani attana danddayii?
Ha zinzzuwa bolla bagganne garssa bagga koohoy naaꞌꞌu bagga miyyiyan issoy issuwara zooze malaban oyqqettiis. Zoozetuppe issoy issibay A duge naaqqiyo wode A bollay qohettennaadan minnidi teqqees. Naaꞌꞌantto zoozee keehi mino gidenna, sohuwara qalamꞌꞌettees. Heezzantto zoozee zinzzuwa koohoy yaa haa qaaxxanaadan oottees. Yaa haa qaaxxiya ha heezzantto zoozee he zinzzoy ba bollaa guuttidi mittaa poquwa garssan woy guutta shuchchatu giddon qosettanaadan oottees.
Hegaa bollikka, he zinzzuwa koohuwa gidduwan shiggireta giyo, kiyi kiyi uttida darobay deꞌees; misiliya medhdhanawu issuwa issuwara gattiyobaadan, hegee issoy issuwara gayttidi, A bolli wodhdhiya deexoy issisa xallan attennaadan oottees. He shiggireti issoy issuwara prootiniyan shidaadan oyqettidosona. Issibay duge naaqqiyo wode, he prootinee guuttaa zaꞌeesinne hegee guyyeppe paxees, qassi he shiggireti meꞌennan deexxiyabaa tookkanaadan oottees.
Misiliya medhdhanawu issuwa issuwara gattiyobaadan, shiggireti issoy issuwara oyqettidosona
Zoꞌꞌo malaatay zinzzuwa koohuwawu bolla baggaanne garssa baggaa gattiya zooziya bessees. Bulla malaatay koohuwawu gidduwan issoy issuwara oyqettiya shiggireta bessees
Kaamiya medhdhiyageeti, qassi zarphphiyanne pooqiya keexxiyageeti deexuwa woy sugiyabaa teqqanawu ha zinzzuwa koohuwa leemisuwa goꞌettana danddayiyogaa eranchchati yootoosona.
Ne qofay aybee? Diyabolikal ayrenklad giyo zinzzuwa koohoy lodda laamiyan yiidabeeyye? Woy giigissiday deꞌii?