Suuttaa Xeelliyaagan Xoossay Yootidobaa Ammanaas
Issi Aakimee Yootidoogaa
ISSI bitanee hayqqidoy aybissakko A anhaa mirmaray qonccissiyoobaa hosppitaaliyaa addaraashan shiiqida dottoretussi yootays. Hayqqida bitaniyaa bolli iita xiiꞌee deꞌees; taani hagaadan gaas: “Ha bitanee hayqqidoy daro suuttay imetto gishshawu, zoꞌo suuttaa seeleti qohettidoogaappenne kilahoy oottiyoogaa aggidoogaappe denddidaagaana.”
Issi profeeseree eqqi denddi hanqqettiiddi, “Yaatin, hanenna suuttaa immideta gay?” yaagiis. Yaagin, “Taani hegaadan gabeykke” yaagaas. Bitaniyaa kilahuwawu amarida shaahuwaa islaydiyan bessayda, gujjada hagaadan gaas: “Kilaho giddon daro zoꞌo suuttaa seeleti hayqqidoogaa beꞌiyo gishshawu, hegee kilahoy oosuwaa agganaadan oottiyoogaa akeekana danddayoos.”a Hegee tana daganttin ta doonay meliis. Taani yelaga dottoree, I qassi profeesere gidikkokka, ta qofaa laammabeykke.
He wode taani Yihoowa Markka gidikke. Taani Jaappaanen huuphessa baggan deꞌiya Senday kataman, 1943n yelettaas. Ta aaway aakime gidiyo gishshawu, taanikka akkamuwaabaa tamaaranawu kuuyaas. Akkamuwaabaa timirttiyan naaꞌꞌantto layttan deꞌaydda, 1970n, Masuko giyo yelagiyo machchaas.
Paatoolojiyaa Xannaꞌiyoogaa Doommaas
Taani tamaariyo wode nuuyyo koshshiyaabaa kunttanawu Masuka oottawusu. Akkamuwaa timirttiyaa keehi dosaas. Asi keehi makkisettidi merettidoogee tana daro maalaalees! SHin Medhdhidaagee deꞌiyoogaa mule qoppa erikke. Akkamuwaa timirttee taani ufayttanaadan oottana gaada qoppaas. Yaatiyo gishshawu, aakime gida simmada, harggiyaa hanotaa, gaasuwaanne hegee kaalettiyoobaa pilggiyo, Paatoolojiyaa xannaꞌiyoogaa doommaas.
Kansseriyaa gaasuwan hayqqida asaa anhaa pilggiyo wode, akkamuwawu suuttaa goꞌettiyoogee maaddenna gaada qoppiyoogaa doommaas. Kansseree wolqqaamido asawu zoꞌo suuttaa seeleti keehi guuxxananne izaawu keehi daafurana danddayees. Kansseriyaa akkamoy hanotay yaa iitanaadan oottana danddayiyo gishshawu, aakimeti darotoo suuttaa immoosona. SHin taani suuttaa immiyoogee kansseree bolla giddon ubbasaa gakkanaadan oottana gaada qoppiyoogaa doommaas. Hanotay aybanne gidin, kansseriyaa harggiyaa akkamuwawu suuttaa goꞌettiyoogee kixay zaarettidi diccanaadan oottiyoogan hargganchchati eesuwan paxennaadan, ubba hayqqanaadan oottiyoogee ha wodiyan erettiis.b
Doomettan odidobay 1975n tana gakkidaba. He profeseree suuttaa harggiyaabaa eranchcha, qassi hayqqida hargganchchaabay A xeellees. Yaatiyo gishshawu, he hargganchchaa woriday akkamuwawu suuttaa ekkidoogaa gin, I yiillotidoogee garamissenna! SHin taani ta qofaa loytta qonccissin, I guyyeppe woppu giis.
Harggee Woy Hayqoy Deꞌenna
Ta keettaayiyaa Yihoowa Markka gidida cima maccaaseera gayttidoy he wode. A haasayaydda “Yihoowa” gaasu; yaatin ta machchiyaa hegee woygiyoogaakko oychchaasu. Yaatin he Yihoowa Markkiyaa, “Yihoowa giyoogee tumu Xoossaa suntta” yaagaasu. Masuka naatettaappe doommada Geeshsha Maxaafaa nabbabawusu; shin a nabbabiyo Geeshsha Maxaafay Xoossaa sunttay deꞌiyoosan “GODAA” yaagees. A Xoossaassi sunttay deꞌiyoogaa eraasu!
Masuka he cima Yihoowa Markkeera Geeshsha Maxaafaa xannaꞌiyoogaa sohuwaara doommaasu. Taani hosppitaaliyaappe qammi 7:00 saatiyan soo yiyo wode, ta keettaayiyaa ufayttaydda taayyo, “Geeshsha Maxaafay harggeenne hayqoy xayanaagaa yootees!” yaagaasu. Yaagin taani, “Hegee keehi loꞌꞌo!” yaagada zaaraas. A gujjadakka, “Ooratta alamee yaanawu matido gishshawu, neeni ne wodiyaa coo wurssanaadan koyikke” yaagaasu. Taani dottore gidada oottiyoogaa agganaadan koyawusu gaada qoppido gishshawu, keehi yiillotaas; nu dobbotaykka moorettana haniis.
Gidikkokka, ta keettaayiyaa ta koshshaa denttettanawu maliyoogaa aggabeykku. A woossada tawu haniya xiqiseta koyada tana bessaasu. Eranchchaa 2:22, 23y yootiyoobay ta wozanaa denttettiis: “Salo gufantton asi keehi daafuridi oottiyoobaappe ubbaappe ai go77a demmii? . . . Harai atto qammikka a huuphee qofaappe shemppenna; gido shin, he ubbaikka hada.” Hagee tawukka haniya qofa; taani qamminne gallassi akkamuwaara gayttidabaa oottikkonne tumu ufayssaa demmabeykke.
Isiine 1975n issi Woggaa galla maallado, ta keettaayiyaa Yihoowa Markkatu SHiiquwaa Addaraashaa ba simmin, taanikka yaa baanawu denddaas. A tana yan beꞌada keehi maalaalettaasu; qassi ishanttinne michchontti tana ufayssan mokkidosona. He wodeppe doommada, Woggaa gallassi aggennan shiiquwaa bays. Issi aggina gidiya wodeppe guyyiyan, issi ishay tana Geeshsha Maxaafaa xannaꞌissiyoogaa doommiis. Ta keettaayiyaa Yihoowa Markkatuura gayttoosappe heezzu aginay aadhdhin xammaqettaasu.
Suuttaa Xeelliyaagan Xoossay Yootidobaa Ammanaas
Kiristtaaneti ‘suuttaa uyennaadan’ woy appe haakkananaadan Geeshsha Maxaafay yootiyoogaa sohuwaara akeekaas. (Oosuwaa 15:28, 29; Doomettaabaa 9:4) Akkamuwawu suuttaa ekkiyoogee maddanaagaa taani kasekka siriyo gishshawu, suuttaa xeelliyaagan Xoossay yootidobaa ammananaagee tana metibeenna.c Taani, ‘Medhdhidaagee deꞌiyaabanne hegaadan giyaaba gidikko, I giyoobay tuma gidana’ gaada qoppaas.
Harggiyawunne hayquwawu gaasoy Addaameppe laattido nagaraa gidiyoogaakka akeekaas. (Roome 5:12) He wode, taani arteeriyosileroosis giyoobaa xannaꞌays. Nuuni cimiyo wode, suuttay wozanaappe kiyiyoonne geliyo xaphoti minniyoonne xuummiyo gishshawu, daro qommo wolqqaama harggee oyqqees. Hegawu gaasoy nuuni laattido nagaraa giyoogee ammanttees. Hegaappe simmin, akkamuwaaba minna xannaꞌiyoogaa agga agga baas. Harggiyaanne hayquwaa xayssana danddayiyay Xoossaa Yihoowa xalla!
Geeshsha Maxaafaa xannaꞌiyoogaa doommoosappe laappun aginay aadhdhin, Laappune 1976n, hosppitaaliyaa yuniversttiyan tamaariyoogaa aggaagaas. Hegaappe guyyiyan aakime gidada oottanaagaa siraas; shin hara hosppitaaliyan oosuwaa demmaas. Uddufune 1976n xammaqettaas. Taani ta deꞌuwan ubba wode haggaaziya aqinye gidiyoogee aybippenne aadhdhiyaaba gidiyoogaa kuuyaas; yaatada Isiine 1977n hegaadan haggaaziyoogaa doommaas.
Suuttaa Xeelliyaagan Xoossay Yootiyoobawu Exatiyoogaa
Hidaare 1979n, Masukanne taani sabbakiya asay keehi koshshiyo CHiba Prefekcher giyo heeri biida. Issi hosppitaaliyan amarida gallassaa oottiyo ooso demmaas. Oosuwaa doommido gallassi, asaa shukkiya amarida dottoreti taakko shiiqidi, “Neeni Yihoowa Markka gidiyo gishshawu, suuttaa immana koshshiyo issi hargganchchay yiikko waatuutee?” giidi mintti oychchidosona.
Xoossay suuttaa xeelliyaagan odidobaa kaallanaagaa etawu bonchchuwan yootaas. Suuttaa goꞌettennan akkamiyo hara ogeekka deꞌiyoogaanne hargganchchaa pattanawu taani oottana bessiya loꞌꞌobaa ubbaa oottanaagaa etawu yootaas. Issi saate gidiyaagaa haasayi simmin, shukkiya dottoretu halaqay, “Ne qofaa akeekaas. SHin daro suuttay gukkido asi akkamettanawu yiyo wode hegaa nu oyqqana” yaagiis. He halaqay asaara maayettenna giyo asa; shin nuuni hegaa haasayi simmin tanaara aynne baa saro, qassi I ubbatoo ta ammanuwaa bonchchees.
Suuttaa Bonchchiyoogan Gakkida Paaciyaa
Nuuni CHiban haggaaziyo wode, Jaappaanen Ibina giyoosan Yihoowa Markkatu ooratta macara biiroy keexettiiddi deꞌees. Taaninne ta keettaayiyaa Beeteele geetettiya he keettaa keexxiya ishatunne michchotu payyatettaa xeellanawu saaminttan issi gallassaa yaa boos. Amarida aginay aadhdhi simmin, Ibina Beeteelen ubba wode oottanaadan shoobettida. Yaatiyo gishshawu, Laappune 1981n, bantta dosan oottiya 500ppe dariya ishati amarida wodiyawu deꞌanaadan giigida keettan deꞌiyoogaa doommida. Maallado, keexettiya sohuwan deꞌiya, bollaa meecettiyoosaanne sheeshsha keettaa geeshshays; saateppe guyyiyan qassi ishanttu payyatettaa maramarays.
Taani akkamido hargganchchatuppe issinniyaa, misoonaawe gidada Awustiraaliyaappe 1949n Jaappaane yiida Iilmo. A luukemiya giyo harggiyaa harggiyo gishshawu, amarida agina xallaa deꞌanaagaa I aakimeti yootidosona. Iilma suuttaa ekkada ba bariyaa adussanawu koyabeenna gishshawu, hayqqana gakkanaashin Beeteelen takkanawu koyaasu. He wode zoꞌo suuttaa seeletu qooday daranaadan oottiya eriytiropoytin giyoogaa mala xaleti deꞌokkona. Yaatiyo gishshawu, issi issitoo I himoglobiinee 3 woy 4 giraame! (Payya asaagee 12-15 giraame.) SHin taani O akkamanawu tawu danddayettida ubbabaa oottaas. Iilma laappun laytta gidiyaagaa takkada Ichchashe 1988n hayqqana gakkanawu, Xoossaa Qaalaa mintta ammaniyoogaa aggabeykku!
Aadhdhida layttatun, Jaappaanen deꞌiya Yihoowa Markkatu macara biiruwan bantta dosan oottiya daroti akkamuwawu shuhettidosona. Matan deꞌiya hosppitaaletun oottiya dottoreti suuttaa goꞌettennan shukkiyoogan maaddidosona; hegee galatissiyaaba. Eti shukkiyo wode hanotaa kaallanaadan darotoo tana shoobboosona; ubba issi issitoo shuukkiyoogankka eta maadda erays. Suuttaara gayttidaagan Yihoowa Markkatu ammanuwaa bonchchiya he dottoreta galatays. Etaara oottiyoogee darotoo ta ammanuwaabaa etawu yootanawu danddayanaadan maaddiis. He dottoretuppe issoy mata wode xammaqettidi Yihoowa Markka gidiis.
Dottoreti Yihoowa Markkata akkamiyo wode suuttaa goꞌettennan aggidoogee akkamuwaara gayttidaagan keehi maaddiis. SHukkiyo wode suuttaa goꞌettennaagee akkamuwawu suuttaa goꞌettennan aggiyoogaa goꞌꞌaa akeekanawu maaddiis. Hegaadan akkamettida asay eesuwan paxiyoogaanne shuhaara gayttida metoy etawu darennaagaa xinaatee bessees.
Ooppenne Aadhdhiya Aakimiyaappe Tamaariyoogaa
Akkamuwaara gayttida oorattabaa haꞌꞌikka eranawu malays. SHin ooppenne aadhdhiya Aakimiyaa, Yihoowappekka ubbatoo tamaarays. I nubaa qoncci beettiyaabaa xalla gidennan, nu kumetta oonatettaa xeellees. (1 Sameela 16:7) Taani akkamiyo wode, harggiya uraa kumetta oonatettaappe attin, A hargge xallaa xeellikke. Yaatiyoogee taani izaawa loytta akkamanaadan maaddees.
Taani haꞌꞌikka Beeteelen oottays; qassi Yihooway suuttaa xeelliyaagan yootiyoobaa gujjin, asay A eranaadan maaddiyoogee tana keehi ufayssees. Qassi Ubbaappe Aadhdhiya Aakimee, Xoossaa Yihooway hargge ubbaanne hayquwaa matan xayssanaadan woossays.—Yasushi Ayzawi yootidoogaa.
[Tohossa qofaa]
a Issi eranchchay “kase suuttaa ekkida, shahaara woy bolla qommoy hara asappe imettido asawu, suuttaa ekkidoogaa gaasuwan guyyeppe zoꞌo suuttaa seeleti hayqqana danddayiyoogaa” yootiis. “Hegaa mala hanotan, suuttaa immanaappe kasetidi maramariyoobay metoy gakkana danddayiyoogaa bessenna. Suuttaabaa yootiya issi maxaafay, maayettenna suuttaa guuttaakka immikko, zoꞌo suuttaa seeleti hegaadan hayqqana danddayiyoogaa qonccissees. Kilahoy oottiyoogaa aggiyo wode, suuttaa geeshshenna gishshawu, izaawu harggees.”
b SHuhaa wode suuttaa ekkennaageeti paxana danddayiyo qaaday suuttaa ekkiya hargganchchatuugaappe loꞌꞌo gidiyoogaa kansseriyaa akkamuwaara gayttidaagan 1988n attamettida issi maxeetee yootees.
c Suuttaa xeelliyaagan Geeshsha Maxaafay yootiyoobaa gujjada eranawu, Yihoowa Markkati attamissido, Suuttay Nena Waati Ashshana Danddayii? giyo brooshuriyaa xeella.
[Qonccissuwaa]
“Suuttaa goꞌettennan akkamiyo hara ogeekka deꞌiyoogaanne hargganchchaa pattanawu taani oottana bessiya loꞌꞌobaa ubbaa oottanaagaa etawu yootaas”
[Qonccissuwaa]
“SHukkiyo wode suuttaa goꞌettennaagee akkamuwawu suuttaa goꞌettennan aggiyoogaa goꞌꞌaa akeekanawu maaddiis”
[Misiliyaa]
Huupheessaagaa: Geeshsha Maxaafaappe tamaarissays
Ushachchaagaa: Ha wodiyan, ta keettaayee Masukiira