Sijaaraa Uyiyoogaa Agganawu Nena Aybi Maaddanee?

“Sijaaraa uyiya asati he amaliyaa agganaadan maaddida issi waannabay agganawu wozanappe murttiyoogaa.”—“Istop Ismoking Nawu!”

NEENI sijaaraa uyiyoogaa agganawu koyikko, wozanappe murttana bessees. Sijaaraa uyiyoogaa agganawu nena aybi maaddanee? Hegawu maaddiya issibay, sijaaraa uyiyoogaa aggiyoogee nena ay keena goꞌꞌiyaakko qoppiyoogaa.

Miishshaa qoraphphaasa. Galla galla issi paakko sijaaraa uyiya uri layttan daro shaꞌu biraa kessees. “Taani sijaarawu ay keena miishshaa kessiyaakko akeekabeykke.”—Giyanu, Neepaale.

Ne deꞌuwan daro ufayttana. “Taani deꞌiyoogaa doommidoy sijaaraa uyiyoogaa aggido wode; qassi ta deꞌoy giigi giigi biis.” (Rejino, Tohossa Afirika) Sijaaraa uyiyoogaa aggida asati kaseppe qumaa malꞌꞌuwaanne peenuwaa shaakkoosona; qassi kaseegaappe minonne payya gidoosona.

Kaseegaappe payya gidaasa. “Sijaaraa uyiyoogaa aggiyoogee yelagawukka cimawukka payyatettawu keehi maaddees, qassi sohuwaara maaddees.”—Amarkkaa biittan payyatettaara gayttidaagan oottiya dirijjitiya.

Neeni koyiyooba oottana danddayiyoogaa akeekaasa. “Sijaaray tawu goda gidana mala koyabeenna gishshawu, A uyiyoogaa aggaas. Ta bollawu taani goda gidana koyaas.”—Hening, Denmarke.

Ne so asaynne ne laggeti goꞌettana. “Sijaaraa uyiyoogee . . . ne matan deꞌiya asaa payyatettaa qohees. . . . Harati sijaaraa uyishin kiyiya cuway geliyoogaappe denddidaagan goofiniyaa kansseriyaninne wozanaa harggiyan layttan layttan daro shaꞌu asay hayqqiyoogaa pilggidobay bessees.”—Amarkkaa Kansseriyaa Maabaraa.

Nena Medhdhidaagaa ufayssaasa. ‘Ta siiqotoo, nu ashuwaa tunissiya ubbabaappe nu huuphiyaa ane geeshshoos.’ (2 Qoronttoosa 7:1) ‘Intte asatettaa Xoossaa ufayssiya geeshshaba oottidi Xoossawu shiishshite.’—Roome 12:1.

“Bollaa tunissiyaabaa Xoossay ixxiyoogaa era simmada, sijaaraa uyiyoogaa agganawu kuuyaas.”—Siylviyo, Isppeene.

SHin uyiyoogaa agganawu wozanappe koyiyoogaa xallay gidenna. So asay, laggetinne harati maaddiyoogee koshshana danddayees. Eti waatana danddayiyoonaa?