Qaacuwaa Qooriyaa

MEKANIKAL INJINERETI qaacoy baappe daro kushiyaa deexxiyaabaa tookkana danddayiyoogan maalaalettoosona. Amarkkan Ohayo Isttet Yuniversttiyan deꞌiya injinereti qaacuwaa bollaa hanotaa, a eeshshaanne i qaaxxiyo hanotaa bessiya misiliyaa komppiyuteriyan medhidosona. Eti qaacuwawu bolla gidduwaa bessiyaabaa eraajiyan denttiyoogaaninne qaacoy deexxiyaabaa tookkiyo wode ba wolqqaa waati goꞌettiyaakko bessiyaabaa goꞌettiyoogan he misiliyaa medhidosona.

Qaacoy daro deexxiyaabaa ba doonan saxxidi tookkanaadan keehi maaddiya a bollaa kifilee qooriyaa. Qaacuwaa qoore giddon deꞌiya shugobay keehi mino gidida, a tiraaranne huuphiyaara xambbixalletti uttido hanotay, kushiyaa biradheti issoy issuwaara xambbixallettiyoogaa mala. Hegaa xannaꞌiyaageetuppe issoy hagaadan giis: “SHugonne mino gidida qaacuwaa bollati issoy issuwaara oyqettidonne merettido hanotay qooriyaa kuree oottiyoobawu keehi maaddees. Qaacuwaa qooriyaa kuree keehi minnanaadan oottiyay minonne shugo gididabay issoy issuwaara oyqettido dumma hanotaa gidennan aggenna; a qooree keehi deexxiyaabaa tookkanaadan maaddiyay hegaa gidana.” Hegaa xannaꞌiyaageeti, qaacuwaa qooree waati oottiyaakko loytti akeekiyoogee kaseegaappe loytti oottiya roobooteta medhanawu maaddana giidi qoppoosona.

Ne qofay aybee? Qaacuwaa qooree hegaadan oyqettidoynne mino gididoy coo qaadaaneeyye maalaalissiya hanotan merettido gishshataassee?