Asho Gaytotettaabaa Intte Naꞌaa Tamaarissite

METIYAABAA

Unddenna layttappe kase asho gaytotettaabaa bantta naꞌaassi woy naꞌeessi koyro denttiyo loꞌꞌo qaaday aawatussinne aayotussi deꞌees. Qassi eti naꞌaa layttaadan woy assi koshshiyaagaadan loddan loddan he hanotaabaa yootana danddayoosona.

He ubbabay haꞌꞌi laamettiis. Ze Lolita Ifekt giyo maxaafay, “Pokkobay naati guutta naatettan deꞌishin moobayliyaa kiitan etawu kiitettees, qassi naatussi odiyooban pokkobay gujji gujji bees” yaagees. Ha ooratta hanotay naata maaddiiyye qohii?

INTTE ERANA BESSIYAABAA

Pokkobay ubbasan kumiis. Debrah Rofman giyo maccaasiyaa Tok tu Mi Ferst giyo maxaafan, “haasayan, erissotun, pilmetun, maxaafatun, yettaa danttotun, televizhiine prograametun, kiitatun, kaassatun, kaqettida erissotuuninne silkkiyaankka komppiyuteriyankka beꞌiyooban pokkobaa qofisiyaabay, pokko qaalaynne hara iitabay kumido gishshawu, [panttaara deꞌiya naati, yelagatinne, haray atto yiira naatikka] daroti akeekennan, asho gaytotettay . . . aybippenne aaruwan koshshiyaaba giidi kuuyana” danddayiyoogaa yootaasu.

Zalꞌꞌe dirijjiteekka oyshettiyaaba. Erissiyaageetinne zalꞌꞌanchati naati naatettaappe doommidi bantta puulaabaa keehi qoppanaadan oottanawu pokkiya maayuwaa erissoosonanne bayzzoosona. So Seksi So Sun giyo maxaafay, “naati bantta laggetun nashettanawu koyiyoogaa zalꞌꞌanchati eriyo gishshawu” cimuwan eta boggiyoogaa yootiis. Gujjidikka, “zalꞌꞌanchati pokkobaa bessiya he ubba misiletanne harabaa giigissiyoy naati asho gaytotettaa polanaadan gidennan bantta koyiyoobaa bayzzanaassa” gidiyoogaa yootiis.

Eriyoogaa xallay gidenna. Kaamee waati oottiyaakko eriyoogee a akeekan laaggiyoogaappe dummatiyoogaadan, asho gaytotettaabaa eriyoogee hegaara gayttidaagan loꞌꞌobaa kuuyiyoogaappe dummatees.

Qoppana koshshiyaabaa: Ne naati ‘iitaa kehaa shaakkanawu’ bantta akeekaa loohissanaadan neeni awudeegaappenne aaruwan ha wodiyan eta maaddana bessees.—Ibraawe 5:14.

INTTE OOTTANA DANDDAYIYOOBAA

Hegaa haasayite. Asho gaytotettaabaa yootiyoogee borssiyaaba milatikkonne, hegaabaa intte naatuyyo yootana bessiyay inttena. He aawatettaa ekkite.—Geeshsha Maxaafaa maaraa: Leemiso 22:6.

Amaridabaa haasayite. Issi kutti darobaa haasayiyoogaappe, intte naꞌaara issisaa biyo wode woy issibaa oottiyo wode hara wodiyaagaadan coo haasayite. Intte naꞌay ba qofaa yootanaadan oychiyoogan i ba wozanan deꞌiyaabaa odanaadan maaddite. Leemisuwawu, “Asho gaytotettawu denttettiya he erissuwaa dosay?” yaagidi oychiyoogaappe, “Zalꞌꞌanchati bayzzanabaa hegaa mala misiliyaa bessidi erissiyoy aybissa gaada qoppay?” gaana danddayeeta. Intte naꞌay zaari simmin, “Hegan neeyyo aybi siyettii?” giidi oychana danddayeeta.—Geeshsha Maxaafaa maaraa: Zaarettido Wogaa 6:6, 7.

Naꞌaa layttawu haniyaabaa tamaarissite. Timirttiyawu biron gakkiya naatussi asho gaytotettaara gayttida bolla qommuwaa sunttaa, qassi etaara asho gaytotettaa polana koyiyaageetuppe waanidi naagettanaakko tamaarissanawu danddayeeta. Naati dicciyo wode, yelettiyoogaara gayttidabaa yootana danddayeeta. Naati panttatettaa wode, asho gaytotettaabaanne hegaara gayttida kandduwaabaa loyttidi erana koshshees.

Loꞌꞌo maaraa tamaarissite. Ammanettiyoogaa, suuretettaanne bonchiyoogaa xeelliyaagan naata naatettaappe doommidi tamaarissite. Yaatikko, asho gaytotettaabaa yootanawu baasuwaa baaseeta. Qassi intte kaalliyo maaraa geeshshidi yootite. Leemisuwawu, aqo oyqqanaappe kase asho gaytotettaa poliyoogee bessennabadan xeellikko, hegaa yootite. Qassi hegee bessennabanne qohiyaaba gidiyoy aybissakko qonccissite. Biyond ze Big Tok giyo maxaafay, “panttatettaa wodiyan naati asho gaytotettaa poliyoogaa eta yelidaageeti maayennaagaa eriya naati asho gaytotettaa polennan aggana danddayiyoogaa” yootees.

Loꞌꞌo leemiso gidite. Intte tamaarissiyo maaraa kaallite. Leemisuwawu, pokko qiriyan miicceetii? pokkiya maayuwaa maayeetii? lambbeecheetii? Yaatikko, hegaara gayttidaagan intte eta tamaarissiyoobaa naati xaasayi xeelloosona.—Geeshsha Maxaafaa maaraa: Roome 2:21.

Loꞌꞌobaa yootite. Asho gaytotettay Xoossaa imota gidiyo gishshawu, ekki gelidi maara gayttiyo wode keehi ufayssiyaaba gidana danddayees. (Leemiso 5:18, 19) Intte naꞌay aqo oyqqennan asho gaytotettaa poliyoogan azzaniyoogaappenne hirggiyoogaappe, takkidi i he imotan ufayttana danddayiyoogaa yootite.—1 Ximootiyoosa 1:18, 19.