Wozanan Unꞌꞌettiya Yelagata —Gaasoy Aybee? Eta Aybi Maaddanee?

AANAa hagaadan gaasu: “Taani wozanan unꞌꞌettiyo wode, haray atto taani oottanawu darotoo dosiyoobaakka gidin oottanawu koyikke. Ta koyiyoy xiskko xalla. Tana ooninne siiqennabadan, taani pattennabadaaninne haratussi tooho gididabadan ubbatoo qoppays.”

Juuliya hagaadan gaasu: “Taani hayqqanawu qoppaas. Taani hayqqanawu wozanappe koyikke. Taani koyidoy hegaadan qoppiyoogaa aggana xallaassa. Taani qarettiyaanne qoppiya asa; shin taani wozanan unꞌꞌettiyo wode, oossinne qarettikke woy aybissinne qoppikke.”

Aananne Juuliya wozanan unꞌꞌettiyoogaa doommiyo wode yelaga naꞌab. Hara yelagati issi issitoo azzanana danddayikkonne, Aananne Juuliya bantta wozanan daro saaminttawu woy aginawu unꞌꞌettiiddi takkoosona. Aana hagaadan gaasu: “Hegee kiyiyoosi baynna xuma ciimma ollan geliyoogaa mala. Wozanay kahay bayidabadan neeyyo siyettees.”

Aaninne Juulee hanotay darota gakkiyaaba. Wozanan unꞌꞌettiyoogee qonccido yelagatu qooday keehi gujji gujji biyaaba milatees; qassi “10ppe biidi 19 laytta gidido attuma naatinne macca naati sahettanaadaaninne asatettan woy qofan qohettanaadan oottiya waannabay” wozanan unꞌꞌettiyoogaa gidiyoogaa Alamiyaa Payyatettaa Dirijjitee yootees.

Wozanan unꞌꞌettiyoogaa bessiyaabay panttatettaa layttan qonccana danddayees; qassi xiskkiyoonne qumaa miyo hanotay laamettiyoogee, hegaadankka orddiyo woy leeꞌiyo hanotay hegeetuppe amaridaagaa. Issi urawu leelanaadan, i yibbaatanaadan, azzananaadaaninne pattennabadan qoppanaadankka oottana danddayees. Asaappe baqatiyoogee, issibaa qoppanawu woy hassayanawu metootiyoogee, hayqqanawu qoppiyoogee woy maliyoogeenne aakimeti erenna hara malaataykka deꞌees. Guuggiyaa aakimeti issi uri wozanan unꞌꞌettennan aggenna gi qoppiyo wode, darotoo izaawu deꞌuwaa qohiya cora malaatay daro saaminttaa takkiyoogaa eranawu koyoosona.

YELAGATI WOZANAN UNꞌꞌETTANAADAN OOTTANA DANDDAYIYAABAA

Alamiyaa Payyatettaa Dirijjitee yootiyoogaadan issi uri darobaa gaasuwan wozanan unꞌꞌettana danddayees. Issi ura harati oyqqiyo ogee, i hirggiyoogee woy asatettan qohettiyoogee hegawu gaaso gidana danddayees.

Asatettan qohettiyoogaa. Juulee hanotay wozanan unꞌꞌettiyoogee darotoo so asan deꞌiyoogaa bessees; hegee geelladan guuggiyan deꞌiya kemikaaliyaa oosuwaa qohiya, zariyaappe laattiyooba gidennan aggenna. Hegawu gaaso gidiya harabay wozanaa sahuwaanne hormonee dariyoogaa woy guuxxiyoogaa, qassi wozanan unꞌꞌettanaadan oottennaba gidikkonne, hegee yaa daranaadan oottiya jallissiyaabaa ubbatoo goꞌettiyoogaa.c

Hirggiyoogaa. Guuttaa hirggiyoogee bessiyaaba gidana danddayees, shin daro wodiyawu hirggiyoogee woy keehi hirggiyoogee asatettaaninne qofan qohana danddayees; hegee sohuwaara qohettiya yelagay issi issitoo wozanan unꞌꞌettanaadan oottana danddayees. Gidikkonne, wozanan unꞌꞌettanaadan oottiyaabay hanno gakkanawu erettenna; qommoora odettidaagaadan hegawu darobay gaaso gidana danddayees.

Aawaynne aayyiyaa paraman woy coo shaahettiyoogaa, siiqiyo uri hayqqiyoogaa, asatettan woy ashuwaa amuwaa polanawu qohiyoogaa, wolqqaama daafay gakkiyoogaa, sahuwaa, woy timirttee metiyo gishshawu issi naꞌi bana ooninne dosennabadan qoppiyoogaa gaasuwan hirggiyoogee wozanan unꞌꞌettanaadan oottana danddayees. Aawaynne aayyiyaa issi naꞌi timirttiyan ba danddayiyoogaappe aaruwan gooba gidanaadan naagiyoogee hegaara gayttidaba gidana danddayees. Asi addettiyoogee, sinttanaabaa hirggiyoogee, wozanan unꞌꞌettida aayyiyaa woy aaway siiqennaageenne aawaa woy aayee eeshshay eesuwan laamettiyoogee wozanan unꞌꞌettanaadan oottana danddayees. Issi yelagay wozanan unꞌꞌettikko, hegaa xoonanawu a aybi maaddana danddayii?

NE QOFAANNE NE BOLLAA NAAGA

Wozanan guuttaa unꞌꞌettiyoogeekka keehi unꞌꞌettiyoogeekka xaliyaaninne guuggiyaa haakimiyaa zoriyan darotoo aggees.d Yesuus Kiristtoosi, “Hargganchchatuppe attin, payyatuyyo aakime koshshenna” yaagiis. (Marqqoosa 2:17) Sahoy nu guuggiyaa gujjin, nu bollaa ubbaa qohana danddayees! Nu qofay nu bollaara gayttidaba gidiyo gishshawu, deꞌuwaa hanotaa laammiyoogeekka loꞌꞌo gidana danddayees.

Neeni wozanan unꞌꞌettikko, ne asatettaanne ne guuggiyaa payyatettaa bessiyaagaadan naaga. Leemisuwawu, maaddiya qumaa ma, loytta xiskka, qassi bollaa minttettiyaabaa darotoo ootta. Bollaa minttettiyoogee neeni ufayttanaadan, wolqqaa demmanaadaaninne loytta xiskkanaadan maaddiya kemikaalee merettanaadan oottana danddayees. Danddayettiyaaba gidikko, wozanan unꞌꞌettiyoogee doommiyoogaa bessiya malaatata akeekanawu mala, qassi maaddiyaabaa oottanawu halcha. Neeyyo ammanettiya urawu yoota. So asaynne laggeti neeni wozanan unꞌꞌettiyoogaa xoonanaadan maaddana danddayoosona; hegee malaatati darennaadan oottana danddayees. Neeyyo siyettiyaabaanne ne qofaa xaafa; qommoora ibaa denttido Juuliyo hegaadan oottiyoogee maaddiis. Ubbabaappe aaruwan, neessi ayyaanaaban koshshiyaabaa kuntta. Hegee neeni deꞌuwaabaa maara qoppanaadan keehi maaddana danddayees. Yesuus Kiristtoosi, “Bantta ayyaanan hiyyeesa gididoogaa eriyaageeti anjjettidaageeta” yaagiis.—Maatiyoosa 5:3.

Aanakka Juuliyakka Yesuusi yootidobay tuma gidiyoogaa akeekidosona. Aana hagaadan gaasu: “Ayyaanaabaa oottiyoogee taani ta meto xallaa gidennan, hara asaabaa qoppanaadan oottees. Hegee issi issitoo metiyaaba gidikkonne, yaatidoogee taani keehi ufayttanaadan maaddiis.” Woossiyoogeenne Geeshsha Maxaafaa nabbabiyoogee Juuliyo minttettiis. A hagaadan gaasu: “Tana qofissiyaabaa Xoossawu woosan yootiyoogee tana woppu oottees. Qassi Xoossay tana alꞌꞌobadan xeelliyoogaanne taassi wozanappe qoppiyoogaa taani akeekanaadan Geeshsha Maxaafay maaddees. Geeshsha Maxaafaa nabbabiyoogee taani sinttanaabaa kehabaa qoppanaadankka oottees.”

Nuna medhida Xoossaa Yihooway nu diccido hanotay, nu deꞌuwan beꞌidobaynne nu meretay nu xeelaanne nu qofaa waatiyaakko loytti erees. Hegaa gishshawu, i nuussi qarettiyaanne nu metuwaa akeekiya asaa baggaara koshshiyaaban nuna maaddananne minttettana danddayees. Hegaa bollikka, Xoossay asatettan woy qofan nuna sakkiya ubbabaappe pattiyo wodee yaana. He wode deꞌiya ‘ooninne, “Taani harggays” yaagennaagaa’ Isiyaasa 33:24y yootees.

Ee, Geeshsha Maxaafay, “Xoossai [nu] aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna” yaagees. (Ajjuutaa 21:4) Hegee keehi minttettiyaaba! Xoossay asawunne saꞌawu halchidobaa gujjada eranawu koyikko, jw.org giyo nu web saytiyaa xomoosa. He saytiyan loꞌꞌo Geeshsha Maxaafaynne wozanan unꞌꞌettiyoogaabaa gujjin, dumma dumma allaalliyan giigida huuphe yohoti deꞌoosona.