Payyatettaanne Ufayssan Gencciyoogaa

AGGENNA HARGGEE WOY BOLLAY MAARA OOTTENNAAGEE ISSI URA DEꞌUWAA CAMETTANA DANDDAYEES. Kase minonne payya gidida Ulfi A bollay qaaxxennan ixxi simmin, “Taani keehi unꞌꞌettaas. Ta minotettay, xalatettaynne wolqqay tippi gi xayiis . . . Ta xayidabadan tawu siyettiis” yaagiis.

Ulfa gakkidabay ooninne ba payyatettaa muleera naagana danddayennaagaa nuuni hassayanaadan oottees. Gidikkokka, nuuni harggiyaappe naagettanawu amaridabaa oottana danddayoos. Nuna keehi sakkikko shin? Hegee nuuni ufayttennaadan oottiyaabee? Mule oottenna; yaagiyoy aybissakko beꞌana. SHin, payyatettawu maaddiya issi issi maarata ane koyro beꞌoos.

‘KIPHATANCHCHA’ GIDA. (1 Ximootiyoosa 3:2, 11) Daro qumaa miyoogaanne daro ushshaa uyiyoogaa meeze oottiyoogee miishshaa xallan gidennan, payyatettankka qohiyaaba! “Daro woine eessaa uyiyaageetuuranne ashuwaa muussau yaaretiyaageetuura zuppetoppa; aissi giikko, mattottiyaageetinne yoranchchati manqqana.”—Leemiso 23:20, 21.

NE ASATETTAA TUNISSOPPA. “Nu ashuwaanne nu shemppuwaa [“ayyaanaa,” NW] tunissiya ubbabaappe nu huuphiyaa ane geeshshoos.” (2 Qoronttoosa 7:1) Asay gaayyiyaa sarbbiyo wode, woy tambbuwaa coommiyo wode, woy mattottiyo wode, woy jallissiyaaba goꞌettiyo wode, ba asatettaa tunissees. Leemisuwawu, Yu Es Senters for Diziiz Kontrol end Privenshin giyo dirijjitee, sijaaraa uyiyoogee “sahettanaadaaninne bollay maara oottennaadan, ubba qassi bolla qommo ubbay qohettanaadan” oottiyoogaa yootiis.

NE ASATETTAANNE NE DEꞌUWAA ALꞌꞌO IMOTADAN XEELLA. “Nuuni [Xoossan] paxa de7oosinne de7idi qaaxettoos.” (Oosuwaa 17:28) Hegaa nashshiyoogee oosuwan, kaamiyaa laaggiyo wode woy allaxxiyoobaa dooriyo wode nuna qohana danddayiyaabaappe naagettanaadan denttettees. Sohuwaara xayiya ufayssawu giidi nu deꞌo ubban qohettana koshshenna!

IITABAA QOPPOPPA. Nu asatettay nuuni qoppiyoobaara keehi gayttidaba. Hegaa gishshawu, koshshennaban hirggennan agganawu, hanqquwaa teqqanawu, qanaatiyoogaanne qohiya hara qofaa agganawu baaxeta. Mazamure 37:8y, “Hanqquwaa agga; yiilluwaappe teqetta” yaagees. Qassikka Geeshsha Maxaafay, “Wonttobau hirggoppite; aissi giikko, wonttoi bau hirggana” yaagees.—Maatiyoosa 6:34.

LOꞌꞌO QOFAN SHEEKKA. Leemiso 14:30y, “Woppu giida wozanai bollaa payya wottees” yaagees. Qassikka Geeshsha Maxaafay, “Wozani ufaittiyoogee asassi lo77o xale” yaagees. (Leemiso 17:22) He qofay loꞌꞌo gidiyoogee saynisiyankka qoncciis. Iskkotilanden deꞌiya issi dottoree hagaadan giis: “Intte ufayttiyaageeta gidikko, ufayttennaageetuugaa keenaa sinttappe sahettennan aggana danddayeeta.”

UFAYSSAN GENCCA. Qommoora abaa denttido Ulfaagaadan aggenna paaciyan nuuni genccanawu koshshennan aggenna. Gidikkokka, genccanawu maaddiyaabaa nuuni koyana danddayoos. Issoti issoti hegan keehi unꞌꞌettoosona; hegee qassi hanotay yaa iitanaadan oottees. Leemiso 24:10y, “Neeni metuwaa gallassi laafikko, ne wolqqai guutta giyoogaa” yaagees.

Harati geella koyro keehi azzani simmdi, guyyeppe minnana danddayidosona. Eti hegaa meezetidosona. Qassi eti genccanawu maaddiyaabaa koyoosona. Ulfi hegaadan oottiis. I daro woossidinne Geeshsha Maxaafan deꞌiya ufayssiyaabaa wotti dentti qoppi simmidi, “xubbiyaabaa aggidi oottana danddayiyoobaa akeekiyoogaa” doommidoogaa yootiis. Hegaa bollikka, wolqqaama metoy gakkiyo darotuugaadan, I haratussi qarettiyoogaanne qoppiyoogaa tamaariis; hegee I Geeshsha Maxaafaappe minttettiyaabaa haratussi yootanaadan denttettiis.

Keehi waayettida haray Isttiva giyo bitaniyaa. Awu layttay 15 gidiyo wode, I mittaappe kunddin qooreppe xade baggay qaaxxennan ixxiis. Awu layttay 18 gidiyo wode, A kushee qaaxxiyoogaa doommiis. I hegaappe simmin yuniversttiyaa geliis; yan sohuwaara jallissiyaabaa goꞌettiyoogaa, daro ushshaa uyiyoogaanne shunchchiyoogaa doommiis. I loꞌꞌo hidootaa demmanaadaaninne iita eeshshaa agganaadan maaddida, Geeshsha Maxaafaa xinaatiyaa doommana gakkanaashin awu hidooti xayiis. I, “Ta deꞌuwan issibay paccidabadan daro wodiyawu siyettiyoogee aggiis. . . . Ta deꞌoy haꞌꞌi sarotettan, ufayssaaninne woppan kumiis” yaagiis.

Isttivinne Ulfi yootidobay Mazamure 19:7, 8n deꞌiya, “GODAA higgee suure; shemppuwaa zaarees. . . . GODAA wogai likke; wozanaa ufaissees. GODAA azazoi geeshsha; wozanaa poo7issees” yaagiya qofaa hassayanaadan oottees.