Atto Giyoogaa

“TAANI NU SON CASHSHAANNE WAASUWAA SIYAYDDA DICCAAS,” yaagada Paatriso giyo maccaasiyaa yootaasu. “Taani atto giyoogaa tamaarabeykke. Taani gastta asa gidadakka, issi uri tana naaqqidobaa daro gallassawu qoppiyo gishshawu xiskkikke.” Yiillotiyoogeenne lancciyoogee ufayssaa demissenna, qassi payyatettaa qohees. Xinaatee qonccissiyoogaadan atto geenna asay kaallidi deꞌiyaabaa oottana danddayees:

• Yiilloy woy ixoy dabbotaa mooranaadan paqqadees; hegaappe denddidaagan eti shaahettoosonanne boorasoosona

• Sohuwaara yiillotees, hirggees woy keehi unꞌꞌettees

• Deꞌuwan ufayttennaadan oottiya balabaa ubbatoo qoppees

• Atto giyoogee likke gidiyoogaa eriyo gishshawu eti woppu gookkona

• Suuttaa likkee keehi gujjiyoogaa, wozanaa harggiyaa, xossaanne huuphiyaa qoxuwaa gujjin, unꞌꞌettanaadaaninne keehi sahettanaadan ootteesa

ATTO GIYOOGEE AYBEE? Atto giyoogee naaqqida uraa maariyoogaa, qassi hanqquwaa, uluwan lancciyaa oyqqiyoogaanne haluwaa kiyanawu qoppiyoogaa aggiyoogaa giyoogaa. Hegee oottido balaa xaasayi xeelliyoogaa, laafabadan xeelliyoogaa woy mule oosettibeennabadan qoppiyoogaa gidenna. Atto giyoogee sarotettaa medhdhanawu, qassi nuna naaqqida uraara deꞌiya dabbotaa zaaretti minttanawu woy dabbotay moorettennaadan oottanawu siiqoy denttettin yuushshi qoppidi oottiyooba.

Atto giyoogee akeekanchcha gidiyoogaakka bessiyaaba. Nuuni ubbay haasayiyoobaaninne oottiyooban baliyoogaa woy nagaraa oottiyoogaa atto giya uri akeekees. (Roome 3:23) Qassi Geeshsha Maxaafay hagaadan gees: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago.”—Qolasiyaasa 3:13.

Hegaa gishshawu, atto giyoogee “issippe shiishshi qachchiya” siiquwawu waanna macara giyoogee bessiyaaba. (Qolasiyaasa 3:14) Mayo Kilinikiyaa weybsaytee yootiyoogaadan, atto giyoogee . . .

• Azzaniyoogaa, issi uraa hanotaa akeekiyoogaanne nuna naaqqida urawu qarettiyoogaa gujjin, dabbotay loꞌꞌo gidanaadan maaddees

• Guuggiyaa payyatettawunne Xoossaara sarotettan deꞌanaadan maaddees

• Kaseegaadan hirggennaadan, unꞌꞌettennaadaaninne ixxennaadan oottees

• Wozanan unꞌꞌettennaadan oottees

NE HUUPHIYAA ATTO GA. Disebliti end Rihabliteeshin giyo maxeetee yootiyoogaadan, issi uri ba huuphiyaa atto giyoogee “keehi deexxiyaaba” gidikkonne, guuggiyaanne bollaa “payyatettawu keehi koshshiyaaba.” Neeni ne huuphiyaa atto gaanawu aybi maaddana danddayii?

• Neeni wottiyoobi baynna asa gaada nena qoppoppa; shin nu ubbaagaadan neenikka baliyoogaa akeekana bessees.—Eranchchaa 7:20

• He mooruwaa zaarettada oottennan agganawu ne balaappe tamaara

• Nebaa danddaya; issi issi iita eeshshatinne meezeti sohuwaara xayana danddayokkona.—Efisoona 4:23, 24

• Nena minttettiya, neeyyo loꞌꞌobaa qoppiyaanne kehiya, qassi nebaa neessi tumaa yootiyaageetuura laggeta.—Leemiso 13:20

• Neeni issi uraa naaqqikko, hegaa ammana, qassi sohuwaara maarotaa oychcha. Neeni sarotettaa medhdhiyo wode, woppu gaana.—Maatiyoosa 5:23, 24

GEESHSHA MAXAAFA MAARAY KEEHI MAADDEES!

Doomettan ibaa denttido Paatrisa Geeshsha Maxaafaa xannaꞌa simmada, atto giyoogaa tamaaraasu. A hagaadan gaasu: “Ta deꞌuwaa moorida hanqquwaappe taani laꞌa kiyidabadan tawu siyettees. Taani haꞌꞌi kaseegaadan waayettikke, qassi harati waayettanaadankka oottikke. Geeshsha Maxaafaa maarati Xoossay nuna siiqiyoogaanne nuussi loꞌꞌobaa amottiyoogaa yootoosona.”

Roona giyo bitanee hagaadan giis: “Taani haratu qofaanne eti oottiyoobaa teqqana danddayikke. SHin taagaa teqqana danddayays. Taani sarotettaa koyikko, lanccana koshshenna. Yiillota uttada sarotettan deꞌana danddayennaagaa akeekaas. Haꞌꞌi tawu loꞌꞌo kahay deꞌees.”