Ne oonatettaa nashshiyoogee gote mala gididabaa danddayanaadan maaddees
YELAGATA MAADDIYAABAA
9 Oonatettaa
HEGEE AYBEE?
Ne oonatettay ne sunttaanne ne meraa xallaa bessiyaaba gidenna. Hegee ne kaalliyo maaraara, ammaniyoobaaranne ne eeshshaara gayttidaba. Ne oonatettay ne kumetta hanotaa bessiyaaba.
NE OONATETTAA ERIYOOGEE KOSHSHIYO GAASUWAA
Neeni ne oonatettaa keehi nashshiyaaba gidikko, laggetun xoonettiyoogaappe ne ammaniyoobawu exataasa.
“Daro asay, suuqiyan deꞌiya, bayzziyoobaa mayzzidi asaa bessiyo ashanguluute mala. Eti maayanabaa doorokkona; hara asay etawu doorees.”—Adriyana.
“Suure gididabawu exatiyoogee metiyo wodiyankka, yaatana bessiyoogaa tamaaraas. Ta tumu laggeti taani kaalliyo maaraa bonchchiyo gishshawu etaara gayttiyo wode taani ufayttays.”—Kortneyo.
GEESHSHA MAXAAFAY YOOTIYO MAARAA: “Xoossai intte qofaa muumeera dummayidi, inttena laammoppe attin, ha sa7aa asaa milatoppite.”—Roome 12:2.
AY OOTTANA DANDDAYAY?
Neeni mino gididobaa, shugo gididobaanne ne ammaniyoobaa yiggiyoogan haꞌꞌi ay mala asaakko, qassi sinttappe ay mala asa gidanawu koyiyaakko qoppa. Kaallidi deꞌiya oyshata zaariyoogan doommana danddayaasa.
Mino gididobaa: Tawu deꞌiya eray aybee, qassi taani hiillanchcha gididoy aybiinee? Taani mino gididoy aybiinee? (Leemisuwawu, taani saatiyaa naagiya, ta huuphiyaa naagiya, minnada oottiyaanne keha asee?) Taani oottiyo loꞌꞌobay aybee?
MAADDIYA HARA QOFAA: Neeni oottido woy haasayido loꞌꞌobaa shaakka eranawu metootay? Yaanikko, nena yelidaageeti woy neeni ammanettiyo laggee neeni aybin goobakko, qassi hegaa waata bessiyaakko yootanaadan oychcha.
GEESHSHA MAXAAFAY YOOTIYO MAARAA: “Asai ubbai huuphiyan huuphiyan ba oosuwaa paacco; hegaappe guyyiyan, hara asaagaara giigissennan, ba huuphe ooso xalaalan ceeqettiyoobaa demmana.”—Galaatiyaa 6:4.
SHugo gididobaa: Eeshshaara gayttidaagan taani giigissana bessiyaabay aybee? Taani balabaa oottanawu keehi paacettiyoy awudee? Taani ta huuphiyaa keehi naagana koshshiyoy aybiinee?
GEESHSHA MAXAAFAY YOOTIYO MAARAA: “Nuuni nunan nagari baawa giikko, nurkka nuna cimmoos.”—1 Yohaannisa 1:8.
Ammaniyoobaa: Taani kaalliyo kandduwaa maaray aybee, qassi aybissi? Xoossaa ammaniyaanaa? I deꞌiyoogaa taani ammananaadan oottidabay aybee? Taani bessennabadan qoppiyo oosoy aybee, qassi aybissi? Sinttappe hanana gaada taani ammaniyoobay aybee?
GEESHSHA MAXAAFAY YOOTIYO MAARAA: “Nena adussi qoppiyoogee naagana; akeekaikka nena saro ashshana.”—Leemiso 2:11.