Waatidi Nuna Ziqqi Oottana Danddayiyoo?

BANA ZIQQI OOTTIYOOGEE AYBEE?

Banttana ziqqi oottiyaageeti harata bonchchoosona. Otorettokkonanne hara asay eta xoqqu xoqqu oottanaadan koyokkona. Bana ziqqi oottiya uri haratussi wozanappe qoppeesinne etappe tamaaranawu koyees.

Issi issitoo bana ziqqi oottiyoogee laafatettadan xeelettees. Tumaa odanawu, bana ziqqi oottiyoogee laafatetta gidennan, issi asi ba balaa ammananaadaaninne I oottana danddayennabaa akeekanaadan maaddiya minotetta.

BANA ZIQQI OOTTIYOOGEE KOSHSHIYOY AYBISSEE?

• Bana ziqqi oottiyoogee dabbotettawu maaddees. Ze Narsizism Epidemik giyo maxaafay, “Xaaxi waaxi xeelliyo wode, banttana ziqqi oottiya asati haratuura laggetanawu metootokkona” yaagees. Gujjidikka, hegaa mala asati “hara asatuura haasayanawunne issippetettan deꞌanawu metootokkona” yaagees.

• Intte naꞌay bana ziqqi oottiyoogee sinttanaa deꞌuwawu A maaddees. Intte naꞌay bana ziqqi oottiyoogaa haꞌꞌi tamaarikko, I gitatidi ooso oyqqanawu metootenna. Dottoree Leonard Sakisi hagaadan giidi xaafiis: “Issi yelagay bessiyaagaappe aattidi babaa qoppikkonne I oottana danddayennabaa akeekana xayikko, ooso oyqqanawu koyiyo wode, oychchiyaageeta ufayssenna. SHin qaxariyaageeti xoqqu ootti xeelliyoobaa eranawu koyiya yelagay ooso oyqqana danddayees.”a

NAꞌI BANA ZIQQI OOTTANAADAN WAATI TAMAARISSANA DANDDAYETTII?

Babaa bessiyaagaappe aattidi qoppennaadan intte naꞌaa maaddite.

GEESHSHA MAXAAFAY YOOTIYO MAARAA: “Aissi giikko, issi urai ainne hanennan de7iiddi, aibakko i hanidobaa ayyo milatikko, ba huuphiyaa cimmees.”—Galaatiyaa 6:3.

• Hanennabaa intte naꞌaassi zaari zaari yootoppite. “Ne amottiyoobaa ubbaa demmana danddayaasa,” qassi “Ne koyiyooba ubbaa hanana danddayaasa” giyoogaa malabay denttettiyaaba milatikkonne hegee deꞌuwan darotoo polettenna. Intte naati polana danddayiyoobaa halchchiyaabanne hegaa polanawu minni oottiyaaba gidikko loꞌꞌo ayfiyaa demmana.

• Nashettana bessiya oosota shaakkidi nashshite. Intte naꞌaa gooba woy mino giyoogaa xallay intte naꞌay bana ziqqi oottanaadan maaddenna. Mino giissidabaa shaakkidi yootite.

• Intte naꞌay Intternneetiyan asaara gayttiyoogan daro wodiyaa aattennaadan oottite. Intternneetiyan asaara gayttiyoogee darotoo issi asi ba eraanne ba oottidobaa yootiyoogan bana zaassiyoogaara gayttidaba—hegee bana ziqqi oottiyoogaappe keehi dummatiyaaba.

• Intte naꞌay ellellidi tawu atto ga gaanaadan minttettite. Intte naꞌay mooriyo wode I he mooruwaa akeekanaadaaninne mooridoogaa ammananaadan maaddite.

Galatanaadan minttettite.

GEESHSHA MAXAAFAY YOOTIYO MAARAA: “Galatite.”—Qolasiyaasa 3:15.

• Meretaa gishshawu galatiyoogaa. Naati merettida ubbabawu galatananne nuuni deꞌuwan deꞌanawu hegeeti ay keena koshshiyaakko erana bessees. SHemppanawu carkkoy, uyanawu haattaynne, maanawu qumay koshshees. Meretan deꞌiya maalaaliya ubbabawu eti nashshanaadaaninne galatanaadan ha leemisotun goꞌettite.

• Asaa galatiyoogaa. Asa ubbay appe aadhdhiyoobay deꞌiyoogaa intte naꞌawu hassayissite, qassi I harata eta eraaninne hiillan qanaatiyoogaappe, etappe waati tamaarana danddayiyaakko bessite.

• Galataa qonccissiyoogaa. Intte naati qaala xallan gidennan, wozanappe nashshiyoogan galatays gaanaadan tamaarissite. Galatiyoogee nuuni nu huuphiyaa ziqqi oottanaadan maaddees.

Harata maaddiyoogee loꞌꞌoba gidiyoogaa intte naata tamaarissite.

GEESHSHA MAXAAFAY YOOTIYO MAARAA: “Issoi issuwaappe gitatais yaagidi qoppennan, issoi issuwaayyo intte huuphiyaa kaushshite. Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:3, 4.

• Intte naꞌa so oosuwaa ootissite. So oosuwan maaddana koshshennaagaa intte naꞌaassi intte yootiyoogee, I ba oottiyoobaa keehi gitabadan xeellanaadan oottees. So giddo oosoy kaassaappe kasetana bessees. So giddo oosoy harata waati goꞌꞌiyaakkonne harati A nashshanaadaaninne bonchchanaadan waati oottiyaakko yootite.

• Haratuyyo oottiyoogee loꞌꞌoba gidiyoogaa minttidi yootite. Naati yaatiyoogee eti wozannaama gidanaadan maaddana. Hegaa gishshawu, intte naꞌay maadoy koshshiyoogeeta shaakki eranaadan minttettite. I eta maaddanawu ay oottana danddayiyaakko aara tobbite. I harata maaddiyo wode intte naꞌa galatitenne kaafite.