Gencciyo Ogiyaa

GENCCAY AYBEE?

Gencciya asi metoy gakki simmin sohuwaara minettiya ura. He eeshshay deꞌuwan beꞌiyoobaappe tamaariyooba. Issi naꞌi kunddennan issi issitoo waati hemettanaakko tamaarana danddayennaagaadan, I issi issitoo metoy gakkennan, ba deꞌuwaa waati ushachchissanaakko tamaarana danddayenna.

GENCCAY KEEHI KOSHSHIYOY AYBISSEE?

Issi issi naati issibay etawu hanennan ixxiyo wode, eta metoy gakkiyo wode woy eti oottiyooban balidobaa harati yootiyo wode azzanoosona. Harati muleera hidootaa qanxxoosona. Gidoppe attin, kaallidi deꞌiya tumaa eti akeekana koshshees:

• Nuuni oottiyo issi issibay ushachchennaagee wottin deꞌiyaaba.—Yaaqooba 3:2.

• Deꞌuwan metiyaabay ubba asaa gakkees.—Eranchchaa 9:11.

• Nuuni mooridobaa hara asi yootiyoogee tamaaranawu keehi koshshiyaaba.—Leemiso 9:9.

Gencciyoogee deꞌuwan metoy gakkiyo wode xooni kanttanaagaa intte naꞌi ammanettanaadan maaddana.

GENCCANAADAN TAMAARISSIYO OGIYAA

Intte naꞌi mooriyo wode.

GEESHSHA MAXAAFAY YOOTIYO MAARAA: “Xillo asi laapputoo kunddikkokka denddees.”—Leemiso 24:16.

Issi metoy wolqqaamakkonne woy wolqqaama gidennaakko intte naꞌi waati kuuyanaakko tamaaranaadan maaddite. Leemisuwaassi, I timirtte keettan issi paaciyan wullikko, waananee? I, “Taani aynne likkebaa oottana danddayikke!” giidi hidootaa qanxxana danddayees.

Intte naꞌi haroode waatidi kaseppe loytti oottana danddayiyaakko qoppanaadan maaddite. Yaatikko, I he metuwaa suurissanawu baaxetana, qassi azzaniyoogaa aggana.

Hegaa bollikka, intte naꞌi metootido metuwaa intte suurissennaadan naagettite. SHin, hegaa suurissiyo ogiyaa koyanaadan maaddite. Intte A woy O hagaadan oychchana danddayeeta: “Neeni tamaaraydda deꞌiyo yohuwaa loytta akeekanawu waatana danddayay?”

Iitabay gakkiyo wode.

GEESHSHA MAXAAFAY YOOTIYO MAARAA: “Wontto intte de7oi ai hananaakkonne erekketa.”—Yaaqooba 4:14.

Deꞌoy hananabay erettenna. Hachchi dure gidida asi wontto hiyyeesa gidana danddayees; hachchi payya gidida asi wontto harggana danddayees. Geeshsha Maxaafay hagaadan gees: “Eesotiya wottanchchati ubba wode xoonokkona; woikko mino olanchchatikka ubba wode olan xoonokkona; . . .  SHin ubbaikka qaadainne wodee oottoogaadan [“wodee oottiyoobaaninne qoppennan gayttiyaaban,” NW] hanees.”—Eranchchaa 9:11.

Intte aawa woy aayo gidiyo gishshawu, intte naꞌi qohettennaadan naaganawu inttessi danddayettida ubbabaa ootteeta. SHin, intte naꞌa iitaba ubbaappe intte naagana danddayennaagee qoncce.

Intte naꞌa azzanttiyaabi, leemisuwawu mata laggee woy so asappe issoy hayqqiyoogaa malabay gakkiyo wode, I genccanaadan maaddite. Yaatiyoogan, I gasttiyo wode oosuwaappe yedetettiyo woy miishsha metootiyo wode waati genccanaakko tamaarisseeta.a

Intte naꞌawu woy intte naꞌeessi seeray imettiyo wode.

GEESHSHA MAXAAFAY YOOTIYO MAARAA: “Zoriyaa siya; . . .  Yaatikko, neeni wurssettan aadhdhida eranchcha gidana.”—Leemiso 19:20.

Intte naꞌa issi uri seeriyoy yashissanaassa woy qohanaassa gidennan, suureyana koshshiyaabaa suureyanaadaana.

Intte naꞌi seeraa ekkanaadan intte tamaarissiyo wode, inttekka intte naꞌikka goꞌettana. Jona giyo issi aaway hagaadan giis: “Naati bantta mooruwaa suurissana xayikko, eti mule tamaarokkona. Eti bantta deꞌuwan daro metuwan gelana, qassi intte eta mooruwaa ubbatoo suurissana. Hegee yelidaageetunne eta naꞌaa deꞌuwaa azzanttiyaaba oottees.”

Seeray intte naꞌa goꞌꞌanaadan waati maaddana danddayeetii? Timirtte keettan woy harasan intte naꞌawu seeray imettiyo wode, he seeray bessennaba yaagoppite. SHin, hagaadan oychchana danddayeeta:

• “Seeray neessi imettidoy aybissa gaada qoppay?”

• “Neeni waata kaseegaappe loyttana danddayay?”

• “Neeni haroode hegaa malabaa oottikko waatuutee?”

Seeray intte naꞌi haꞌꞌikka sinttappekka goꞌettanaadan oottiyoogaa hassayite.