Ammanettiyaagaa Gidiyo Ogiyaa

AMMANETTIYAAGAA GIDIYOOGEE AYBEE?

Issibaa oottana mala intte ammanettiya ura oychchiyo wode, I hegaa loytti oottanaagaanne keerido wodiyan polanaagaa intte ereeta.

Issi naꞌi biron guutta gidikkonne, ammanettiya naꞌa gidiyoogaa tamaarana danddayees. Parenting Wizawut Borders giyo maxaafay hagaadan gees: “Naatussi 15 agina kumiyo wode eti banttana yelidaageeti oottanaadan yootiyoobaa oottoosona. Qassi 18 agina kumiyo wode yelidaageeti oottiyo ubbabaa oottanawu koyoosona. Daro biittatun, naatussi layttay ichchashaappe biidi laappuna gidiyo wode, naati so giddo oosuwan waati maaddana danddayiyaakko yelidaageeti bessoosona. Qassi naati guutta gidikkonne, daro oosota loytti oottana danddayoosona.”

AMMANETTIYAAGAA GIDIYOOGEE KEEHI KOSHSHIYOY AYBISSEE?

Issi issi biittatun, daro yelagati banttarkka deꞌanawu baaxetikkonne, yaatanawu danddayibeenna gishshawu yelidaageetuura deꞌanawu guyye simmidosona. Issi issitoo hegaadan haniyoy, yelagatuyyo miishshaa waati oyqqanaakko, so oosuwaa waati oottanaakko, woy bantta deꞌuwan ubba galla waanidi ammanettiya ura gidanaakko loohissoy mule imettibeenna gishshataassa.

Hegaa gishshawu, intte naati gitaa gidiyo wode ay oottanaakko erana mala, eti haꞌꞌi ammanettiya ura waanidi gidanaakko tamaarissiyoogee loꞌꞌo. Hawu tu Reyz an Adalt giyo maxaafay hagaadan gees: “Tammanne hosppun laytta gakkanaashin eti ubbabawu inttekko xeellidi deꞌin, wurssettan eti erenna alamiyan eta kessi olana koyekketa.”

AMMANETTANAADAN TAMAARISSIYO OGIYAA

So giddon issi issibaa ootissite.

GEESHSHA MAXAAFAY YOOTIYO MAARAA: “Minnidi oottidoban ubban go77ai de7ees.”—Leemiso 14:23.

Yelidaageeti oottiyo ubbabaa guutta naati etaara oottanawu yeemottoosona. Naati meretan oosuwaa oottanawu koyiyo he koshshaa so giddo oosuwaa eta ootissanawu goꞌettana danddayeeta.

Yelida issoti issoti yaatanawu koyokkona. Issi issi aawatinne aayoti bantta naatussi timirtte keettan ubba galla imettiya so oosoy keehi daro gidiyo gishshawu giidi so giddo ooso eta ootissanawu koyokkona.

Son oottiyoogee issi oosuwaa doommidi poliyoogaa eta tamaarissiyo gishshawu, so giddon oottiya naati timirtte keettan imettiya oosuwaa loytti oottoosona. Hegaa bollikka, Parenting Wizawut Borders giyo maxaafay hagaadan gees: “Nu naati naatettan maaddanawu koyiyo wode nuuni eti maaddanaadan oottana xayikko, hara asaa maaddiyoogee keehi koshshennabadan eti qoppana . . . Etayyo koshshiyaabaa harati oottana bessees giidi qoppiyoogaakka doommoosona.”

He qofay bessiyoogaadan, naati so giddo oosuwaa ubbatoo oottiyoogee eti bantta xallaa siiqiyaageeta gidennan, harata waati maaddanaakko tamaarissees. Naati so giddon oottiyo wode, eti son keehi maaddiyaageeta, qassi he oosoy eti oottana koshshiyaaba gidiyoogaa akeekoosona.

Intte naati mooriyo wode hegee kaalettiyoobay deꞌiyoogaa akeekanaadan maaddite.

GEESHSHA MAXAAFAY YOOTIYO MAARAA: “Zoriyaa siya; timirttiyaakka ekka. Yaatikko, neeni wurssettan aadhdhida eranchcha gidana.”—Leemiso 19:20.

Intte naati mooriyo wode—leemisuwawu, intte naꞌay woy intte naꞌiyaa hara uraabaa akeekennan moorikko, hanidabaa genttoppite. Ha hanotan, atto gaanaadan oychchiyoogaaninne, ubba qassi moorettidabaa giigissiyoogan, hanidabay kaalettiyo ufayssennabaa naati eeno gi ekkana danddayoosona.

Naati bantta mooruwan oyshettiyoogaa akeekiyo wode, kaallidi deꞌiyaagaadan goꞌettana:

• Tumanchchanne bantta balaa ammaniyaageeta gidana

• Bantta mooruwaa haratu bolli wottokkona

• Bantta mooruwaa aybinkka gaasoyokkona

• Koshshiyo wode, atto gaanaadan oychchiyaageeta gidana