1. Nuuni Tuggatanaadan Oottiyay Xoossay?
Hegaa Erana Koshshiyo Gaasuwaa
Daro asay nuuni tuggatanaadan oottiyay Xoossaa giyo gishshawu awu goynnanawu koyenna.
Qoppana Koshshiyaabaa
Qoncciyan woy qoncce gidenna ogiyan haymaanootiyaa kaalettiya daroti nuuni tuggatanaadan oottiyay Xoossaa giidi tamaarisoosona. Leemisuwawu, issoti issoti kaallidi deꞌiyaagaadan goosona:
Meretay gattiyo daafabay Xoossaa qixaate.
Naati hayqqiyoy Xoossawu saluwan hara kiitanchchati koshshiyo gishshataassa.
Tuggay daranaadan oottiyay Xoossay olan exatiyo gishshataassa.
SHin haymaanootiyaa kaalettiyaageeti Xoossaabaa tamaarissiyoobay bala gidana danddayii? Xoossay eti tamaarissiyoobaa ekkennaba gidikko shin?
GUJJADA ERA
Geeshsha Maxaafaa Xannaꞌana Koshshiyoy Aybissee? giyo biiduwaa jw.org/wal saytiyaappe beꞌa.
Geeshsha Maxaafay Yootiyoobaa
Nuuni tuggatanaadan oottiyay Xoossaa gidenna.
Nuuni tuggatanaadan oottiyay Xoossaa gidikko, hegee Geeshsha Maxaafan qonccida A eeshshatuura phalqqettees. Leemisuwawu:
“[Xoossaa] oge ubbaikka suure. . . . I tumanchchanne suure.”—ZAARETTIDO WOGAA 32:4.
“Ubbaa Danddayiya Xoossai iitabaa mulekka oottenna.”—IYYOOBA 34:10.
“Ubbaa Danddayiya Xoossai suure pirddaa geellayenna.”—IYYOOBA 34:12.
Xoossaabaa bala ogiyan tamaarissiya haymaanootiyaa Xoossay ixxees.
Hegeeti nuuni tuggatanaadan oottiyay Xoossaa giidi tamaarissiya haymaanootetanne olaanne danobaa minttettiyaageeta.
“Hananabaa yootiyaageeti ta [Xoossaa] sunttan wordduwaa yootoosona. Taani eta kiittabeikke, woikko azazabeikke, woikko etau yootabeikke. Eti intteyyo hananabaa giidi yootiyoobai worddo [ajjuutaanne] . . . qoppi ekkidi yootiyo worddobaa.”—ERMMAASA 14:14.
Haymaanootiyaa asay haniyo iitabaa Yesuusi boriis.
“Saluwan de7iya ta Aawai giidoogaa oottiya urai saluwaa gelanaappe attin, ‘Ta Godau, ta Godau’ giya ubbai gelenna. He gallassi daro asai tana, ‘Nu Godau, nu Godau, nuuni ne sunttan hananabaa yootibookkonii? Ne sunttan xalaheta kessibookkonii? Qassi nuuni Xoossai oottiyo malaataa ne sunttan oottibookkonii?’ yaagana. Taani he wode eta, ‘Taani inttena mulekka erikke; iitabaa oottiyaageeti intte ta matappe haakkite yaagana.’”—MAATIYOOSA 7:21-23.