4. Xoossay Nuuni Tuggatanaadan Medhdhidee?

Hegaa Erana Koshshiyo Gaasuwaa

Ha oyshaa zaaroy deꞌuwaa xeelliyaagan ne xeelaa laammees woy laammenna.

Qoppana Koshshiyaabaa

Loꞌꞌiya darobata medhdhida Xoossay tuggaa paqqadidoy aybissee?

Haymaanoote baynna asay tuggay gakkiyo gaasoy Xoossaa halchcho woy ubba qassi Xoossay deꞌiyoogaa siroosona. Eti tuggay (1) Xoossay hegaa essanawu wolqqi baynna gishshawu, (2) Xoossay hegaa essanawu koyenna gishshawu woy (3) Xoossay baynna gishshawu gakkees giidi ammanoosona.

Asay tuggatiyo tumu gaasoy hegee?

Geeshsha Maxaafay Yootiyoobaa

Tuggatanaadan Xoossay nuna medhdhibeenna.

Nuuni deꞌuwan ufayttanaadan I koyees.

“Asi ba de7ido laittan lo77iyaabaa oottiyoogaappenne, ufaittiyoogaappe aadhdhiyaabi aibinne [baa] . . . Qassi, asassi au a daafurau waaga gidiyaabi muussaaninne ushshan bana ufaissiyoogaa; hegeekka au Xoossaappe imettida imota.”—ERANCHCHAA 3:12, 13.

Xoossay koyro asa gidida naaꞌꞌati tuggattennan deꞌanawu etawu koshshiya ubbabaa immiis.

Eti woy eta zareti tuggatanaadan I medhdhibeenna.

“Xoossai eta hagaadan [giis] . . . ‘Yelettite; corattite; ha sa7aa kumitenne haarite.’”—DOOMETTAABAA 1:28.

Koyro naaꞌꞌu asati Xoossawu azazettanawu dooribookkona.

Hegaa gaasuwan eta bollinne eta zerettatu ubbaa bolli daro tuggay gakkanaadan oottidosona.

“Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis.”—ROOME 5:12.a

Asay banttana banttarkka kaalettiyo eraa Xoossay immibeenna.

Asi haattaa garssan deꞌana danddayennaagaadan, bana barkka haarana danddayenna.

“Ba hemetaa suurissanaagee aawu shene [gidenna.]”—ERMMAASA 10:23.

Xoossay nuuni tuggatanaadan koyenna.

Danddayettida keenan nuuni metuwaappe naagettanaadan I koyees.

“Neeni ta azazuwaa siyidabaa gidiyaakko, ne sarotettai shaafaa haattaadan goggana.”—ISIYAASA 48:18.